Taniel 7 - Intas Etipup

Nuarin tas alupas 7.

1 Et ahuumtidec a Taniel um ecetai niji itai aleg et for. 9 Nitai ehvaig va nelcau u Atua. 15 Intas asuptecnaig vaig.

¹ IS wat atupun a Belsasar um atimarid an pece Babelon, is umjeg ahnag a Taniel um ahuumtidec an tinan: ja is par aged intas va numjeg ahnag o un aien, um asuptecnaig itai asega.

² Is tas a Taniel, um ika, Kis ecetai ainyak an numjeg ahnag unyak an nepig, mika is ehtet au jap alupas nimtinjap et for an nohatag.

³ Eris ahes an jap um aridjai niji itai eklim edo irai pece aleg is for, is lep alupas, eris acheiachei jipe ara.

⁴ Is idivaig laion nitai aleg uhup, is eteuc iran nehpai meijcop alupas: kis yasyas ainyak um almoi mika eris atgeig yi amud nehpan ehro, eris lep alcacsei jai yin ijinies an uobohtan, eris um ika yi atidai jai um idivaig natimi, eris lep alupai yin inliinmopoi atimi.

⁵ Kis lep ecetai nitai aleg is eche ainyak, nitai aleg sekunt marom, is idivaig beer aien, is atidai aien an nahaijin, is eseij neduon is idivaig neduon riti atimi an nipjineucsen an niblai eijin: eris ika ehelen ara, Atidai aiek, um caig ohu itai inyi ahinag.

⁶ Kis par apitac ainyak um yasyas, um lep ecetai nitai aleg is eche is idivaig pander aien, is eteuc nehpai man is for an cehen; is lep for nidjini nitai aleg iyehki; eris um ika yi atimarid aieu.

⁷ Kis par apitac ainyak, um ecetai irai itai eris ehvaig ehelek an nepig nitai aleg ford, eris imtitaig vai nitai iyehki um eucjeucjeucaij, is alupas um esjilid nemda o un; is eteuc iran neijin aiurn is alupas: is caig itai aien um ces yi oplecoplec, um auwihise an nobohtan nahaiji itai is eled: is eche aien jam lep eche nitai aleg erahki ehtijis uhup iran ahtaij; is um ten nipat o un.

⁸ Kis aktaktai ipat iji ehki ainyak, um ecetai mika is chcohos jai ehele ra nipat haklin is eche, eris atipagki nipat is dri irai ipat iji ehki is upyi eteuc an nuhup o un: is idim eteuc nesganimtan nipat iyehki um idivaig nesganimta atimi, im lep nipjineucsen is asaig intas alupas iran.

⁹ Kis almoi ainyak um yetpan an nopan iyehki eris ikni dorona, is lep ateuc Aien is eteuc aien itu acen, is ahi napelumai iran um idivaig sno, um idivaig nalau irai siip upene numri nidjinin: is idivaig incap alaume dorona o un, um idivaig incap alaume nitai arehed iran.

¹⁰ Is ahes an nuhup o un incap um ared pam: eris auaraheca o un a ilpu agelo is dausant is ahinag, eris um aiji an nuhup o un a ilpu agelo is dausant is ahinag acen: eris ago upene itai mika eri almaijidjid atimi, eris elgelgei niji itaasviitai.

¹¹ Kis yasyas ainyak van motjan tas alupas is asaig nipat iyeh-ki: kis idim yasyas ainyak um yetpan an nopan iyehki eris atgei nitai aleg iyehki, eris lep auahas nohun, um ethaigjai an cap iyehki is cas.

¹² Eris atipagki natimi alupas u ehtaij itai aleg is eche: ja eris ika ehtiji umumoh ahtaij um yetpan an tah nopan eris ati.

¹³ Kis ecetai ainyak irai itai eris ehvaig ehelek an nepig, mika is yetpam irai apat an nohatag tah is idivaig Inhal u natimi, is yetpam aien ehelen is eteuc Aien itu acen, eris um imiapan yin ara an nuhup o un.

¹⁴ Eris alupai yin natimi alupas, im nimiahpas, im nelcau, mika eri auanaheca o un natimi asega, im nup urai iji pece, im ilpu atimi eris auoh iji tas ara: etpu eteuc irai iji mesese natimi alupas o un, inyi eti tiih pan, eri eti auahas nelcau o un.

¹⁵ Is ohocred inliinmopok ainyak im lep nohuk, kis eti eropse ainyak vai itai iji ig eris ehvaig ehelek.

¹⁶ Kis apan ainyak ubutpotet ehelen tah ra eris aiji eahki ara, um ahodai yin nesgantas irai itai iji ehki asega. Is asuptecnaig ehelek aien, um ahopdicraig ehelek nesgantas irai itai iji ehki.

¹⁷ Era elcau et for niji itai eklim edo irai pece aleg iji igki et for, et alupas, etpu eteuc au nobohtan.

¹⁸ Ja erupu leh nelcau a ilpu atimi upene o un et esjilid Aien, um ohuun nelcau irai iji mesese, idim irai iji mesese asega.

¹⁹ Ja kis par merit ainyak par ato nesgantas u nitai aleg ford, is eche aien jam lep eche erahki is eseij, eris imtitaig alupas vaig, is idivaig aiurn neijin, is lep idivaig bras nihinagai nikman; is caig itai aien, um ces yi oplecoplec, is lep auwihise an nobohtan nahaiji itai is eled aien.

²⁰ Kis lep merit ainyak par ato nesgantas irai ipat is ten is eteuc an nidjinin, im lep vaig iyehki is eche is ehcohos jai, ehtijis eropropse an nuhup o un ahtaij erahki; nipat iyehki marom is eteuc nesganimtan, im lep nipjineucsen nasaig vaig intas ijinies acen, is has nes-ganimtan aien irai itai aleg is eche.

²¹ Kis almoi ainyak mika is ati nedoa vai ilpu atimi upene nipat iyehki um esjilid ira ra;

²² um yetpan an nopan iyehki is apam Aien is eteuc aien itu acen, eris lep ika eri almaijidjid atimi a ilpu atimi upene o un et esjilid acen Aien; is lep yetpam nopan iyehki eri ohuun nelcau a ilpu atimi upene.

²³ Is ika aien. Etpu elcau ford an nobohtan nitai aleg ford, etpu eche niji elcau asega, erupu auahas nobohtan asega a nup uran nelcau iyehki, um auwihise, um auoh oplecoplec.

²⁴ Era ilpu atimarid et ten erupu eteuc ara niji ipat et ten is ahes an nelcau inigki; etpu epitpitac ira ra tah um eteuc; etpu eche aien jam lep eche iyehki is uhup, etpu ahlo natimarid inyi dri aien.

²⁵ Etpu asaig intas a natimarid an nelcau iyehki vai yin et esjilid acen Aien, um atgei ilpu atimi upene o un et esjilid acen Aien, etpu lep ika aien yi eche niji opan im niji tas alep: uhpu atcijai pan ra ehelen um yetpan au nopan inyi eseij im lep nahaijin taka opan.

²⁶ Ja eri almaijidjid atimi, erupu lep atipagki natimi alupas o un ara, par ahni iran um auahas ehni.

²⁷ Eri atcijaig nelcau, im natimi alupas, im lep niji itai asega an nelcau itlian nohatag asega, ehele atimi, ilpu atimi upene marom o un et esjilid acen Aien, etpu amen irai iji mesese nelcau o un, erupu auanaheca o un um imiaiji intas o un a ilpu atimi alupas asega.

²⁸ Et mun ti intas vai nitai iyehki. Kis ohocred alupas ainyak Taniel vai naktaktai u inliinmopok, is um eche nesganimtak ainyak: ja kis aminjinaig nitai inigki an liinmopok ainyak.