Taniel 5 - Intas Etipup

Nuarin tas alupas 5.

1 Inhag alupas u Belsasar et auahas inliinmopoi Atua vaig aien. 5 Et ehioehio inliinmopoi natimarid van tas er aged, era eti ato a ilpu atimi arapakau. 10 Van tas o natimarid takata er imiapan Taniel ehelen. 17 Et acaiji natimarid aien va nijinies u inliinmopon im nedo apat o un. 25 Et esvi intas iyehki aien um asuptecnaig nesgantas iran. 30 Era leh natimi alupas u nedan a nup u Mitya.

¹ IS ago nakaro alupas a Belsasar natimarid vai ilpu atimi alupas o un, eris wun dausant ara, um unmyi waina an nuhup ura.

² Is wat umnyi waina a Belsasar, is asaig aien mika eri imiapan nipjiitai colt im silver iji ehki is lucsei a Nebukatnesar etpon anliin neom ahlap an maliyum Jerusalem; miki yi umwig iran a natimarid im ilpu atimi alupas o un, im ilpu ehnaa o un, im ilpu takata amen ehelen.

³ Eris imiapan nipjiitai colt iji ehki ara eris lucsei an neom ahlap anliin nimnim, itap u Atua Jerusalem; is umwig iran a natimarid, im lep ilpu atimi alupas o un, im ilpu ehnaa o un, im ilpu takata amen ehelen.

⁴ Eris umnyi waina ara, um imiahpas niji atmasimai colt, im silver, im bras, im aiurn, im incai, im inhat.

⁵ Is ehcohos nupsikma atimi an nuarin nepig iyehki, um aged intas an nuprei an yipin neom u natimarid an nuhup u nitai atijai incap alahala iran: is ecetai nupsikman iyehki is aged intas a natimarid.

⁶ Is eche nesganimtai natimarid, is lep ohocred inliiumopon aien, is auatialidi nehtag vai yin, is lep ahtet jipe nijin neduon ehro.

⁷ Is efehtas a natimarid, um ika eri imiapan ehelen ilpu atimi itap, im nup u Kaltia, im ilpu atimi asaig yi opdicrai itai. Is tas a natimarid, um ika ehele ilpu atimi arapakau Babelon, Aien et esvi intas inigki aien er aged, um asuptecnaig nesgantas iran ehelek, uhpu aso yin an napelumai cap, um ati nitaahnaig colt an nauinwan, etpu atimi alupas dirt aien an nelcau unyak.

⁸ Eris apan a ilpu atimi arapakau asega u natimarid: ja eris eti emda ara par esvi intas iyehki eris aged um asuptecnaig negantas iran ehele natimarid.

⁹ Is ohocred alupas a Belsasar, is eche nesganimtan eris lep imtitaig a ilpu atimi alupas o un.

¹⁰ Ja is apan a natimarid takata an neom hag, van tas o natimarid im ilpu atimi alupas o un: is tas a natimarid takata, um ika, Ak natimarid, namu umoh aiek irai iji mesese: namu jim ohocred aiek va naktaktai u inliinmopom, um jim eche nesganimtam:

¹¹ et amen a natimi et ethi an nelcau unyum, et amen ehelen narapakau u ilpu atua upene; is amen ehelen an nopan umoh u etpom inlah, im nato itai, im narapakau, et idivaig narapakau u ilpu atua; is idim ati yin a etpom natimarid Nebukatnesar, etpom natimarid marom, mika yi esjilid aien irai ilpu atimi arapakau, im ilpu atimi itap, im nup u Kaltia, im ilpu atimi asaig yi opdicrai itai;

¹² is idim amen ehele Taniel narapakau esjilid, im inlah, im nato itai; is asuptecnaig nesgantas an numjeg ahnag aien, um ahopdicraig intas ecsipece, um ehvaig niji itai ehka: is anvi nidan a natimarid par ika Beltesasar: uhmu ahlaig vai Taniel, etpu asuptecnaig nesgantas aien.

¹³ Eris imiapan Taniel an nuhup u natimarid. Is tas a natimarid um ika ehele Taniel, Nai Taniel aiek ira atimi iji ehki eris lucsei ra an pece Juta, is iknipagki ra Juta a etpok natimarid, ka oʼo?

¹⁴ Ek mun atahaijeg intas vai euc ainyak, mika et amen ehelum narapakau u ilpu atua, um lep amen ehelum inlah, im nato itai, im narapakau esjilid.

¹⁵ Er imiapam ehelek ilpu atimi arapakau, im ilpu atimi itap an nuhup unyak, mika eri esvi intas inigki ara eris aged, um asuptecnaig nesgantas iran: ja et ehka vai ra nasuptecnaig vaig nesgantas an tas iyehki:

¹⁶ ja ek mun atahaijeg intas vai euc ainyak mika na emda aiek par asuptecnaig itai, um ehvaig niji itai ehka: el et emda aiek par esvi intas inigki eris aged um asuptecnaig ehelek nesgantas iran, erupu aso euc ara an napelumai cap, um ati nitaahnaig colt an nauinwam, napu atimi alupas dirt aiek an nelcau unyak.

¹⁷ Is tas a Taniel an nuhup u natimarid, um ika, Etmu unyum niji itai tup ahtai unyum, namu lep alupai intak atimi nimtan unyum aiek; ja ekpu esvi intas inigki eris aged ainyak ehelum, ak natimarid, um asuptecnaig ehelum nesgantas iran.

¹⁸ Ak natimarid, is alupai Nebukatnesar etpom nelcau o un a Atua esjilid, im lep natimi alupas, im nemda, im nimiahpas:

¹⁹ eris eucjeucjeucaij an nuhup o un natimi asega im nup urai pece, im ilpu atimi auoh iji tas, um imtitai yin, va natimi alupas is alupai yin aien: is atgei ra sji ehki aien is merit aien natgei ra vaig; is lep imiatamai ra sji ehki aieu is merit aien nimiatamai ra vaig; is atijai ra sji ehki aien is merit aien n atij ai ra vaig; is lep imiasuol ra sji ehki aien is merit aien nimiasuol ra vaig.

²⁰ Ja is wat ijinies inliinmopon aien, um meto nijinies u inliinmopon, eris atipagki yin a dorona esjilid o un, um atipagki natimi alupas o un:

²¹ is aha va atimi aien; is idivaig inliinmopoi itai eklim edo irai pece inliinmopon, is lep amen aien ehele togke aleg: is caig nefelelicai aien et idivaig kurimatau, is lep edin nohun va nopoigmul an nohatag; um imihum pan an nopan iyehki is ato aien mika, et atimarid a Atua esjilid acen an nelcau u atimi, um lep ati natimi inig et merit vai yiu aien mika yi atimarid iran aien.

²² Ak Belsasar mapon, as idim ato nitai iji igki asega aiek, ja et eti upoupo inliinmopom aiek;

²³ ja as ago nedo ijinies aiek vai Natimarid an nohatag; um imiapam nipjiitai an neom o un an nuhup unyum; na mun lep umnyi waina iran aiek, im lep ilpu atimi alupas unyum, im ilpu ehnaa unyum, im ilpu takata amen ehelum; na mun lep imiahpas niji atmasimai silver aiek, im colt, im bras, im aiurn, im incai, im inhat, et eti alum itai, um eti ahgei itai, um eti ato itai: jam eti imiahpas Atua inig na umoh vai yin aiek, et lep aminjinaig nedo asega unyum aien:

²⁴ va nitai inigki is ahes ehele Ihova nupsikmai natimi iyehki, um aged intas inigki.

²⁵ Intas eris aged nigki, nikavaig, Mine (Eris esvi), Mine (Eris esvi), Tikel (Eris asjaaicnaig), Yufarsin (Eris atiakoai).

²⁶ Nesgantas au tas iyehki nigki: Mine; Et mun esvi niji adiat an nelcau unyum a Atua, et mun tiih.

²⁷ Tikel; Er atijai euc an nitai asjaaicnaig, ja na aiheucaiheuc aiek.

²⁸ Pires; Eh mun atiakoai nelcau unyum, um alupai nup u Mitya im nup u Persia.

²⁹ Is tas a Belsasar, ja eris aso Taniel ara an napelumai cap, um ati nitaahnaig colt an nauinwan, is um imiapaahni intas vai yin aien mika yi atimi alupas dirt an nelcau aieu.

³⁰ Eris atgei Belsasar natimarid u nup u Kaltia an nepig iyehki.

³¹ Is atoraliak nelcau iyehki a Taraius nup u Mitya, is idivaig is eteuc inmesese is sikste tu iran an nopan yehki.