Taniel 4 - Intas Etipup

Nuarin tas alupas 4.

1 Et tas upene a Nebukatnesar va nelcau u Atua. 4 Et tas aien va niji umjeg ahnag o un, is ehka vai ilpu atimi arapakau par asuptecnaig iran. 8 Et atahaijeg numjeg ahnag iyehki a Taniel. 19 Et asuptecnaig iran aien. 28 Intas va nitai iyehki eris ago.

¹ INTAS unyak nigki Nebukatnesar natimarid, ehelemia natimi asega, im nup urai iji pece, im ilpu atimi auoh iji tas, eka amen au nobohtan asega aijaua; Etmu eteuc nigpa alupas ehelemia aijaua.

² Kis aktaktai ainyak mika et upene vai nyak nasuptecnaig vaig niji itai asjaaicnaig, im niji edo imiali is ago vai nyak a Atua esjilid.

³ Et esjilid acen niji itai asjaaicnaig o un! et emda nedo imiali o un! inyi eti lep ti nelcau o un, etpu lep atimarid aien irai iji mesese asega.

⁴ Ainyak aigki Nebukatnesar, kis atumop ainyak anliin neom unyak, um amen upene an nimnim atimi unyak.

⁵ Kis umjeg ahnag ainyak um imtitaig vaig, kis lep ohocred ainyak va naktaktai unyak an tinak, im lep niji itai kis ecetai ainyak.

⁶ Va nitai inigki kis tas alep ainyak mika eri imiapam ilpu atimi arapakau asega Babelon an nuhup unyak, mika eri asuptecnaig ehelek ara nesgantas an numjeg ahnag unyak.

⁷ Eris apam a ilpu atimi arapakau, im ilpu atimi itap, im nup u Kaltia, im ilpu atimi asaig yi opdicrai itai: kis asaig numjeg ahnag unyak ainyak an nuhup ura; ja eris eti asuptecnaig nesgantas iran ehelek ara.

⁸ Ja is epitpitac um apam an nuhup unyak a Taniel, tak idan Beltesasar, nilpun nidai natmas unyak, et amen ehelen narapakau u ilpu atua upene: kis asaig numjeg ahnag unyak ehelen ainyak, um ika,

⁹ Ak Beltesasar, natimi alupas u ilpu atimi arapakau, ek idim ato ainyak mika et amen ehelum narapakau u ilpu atua upene, um eti ehka vai euc tah nitai er adenaig, va nitai inigki namu asuptecnaig ehelek aiek nitai iji igki ek mun ecetai an numjeg ahnag unyak ainyak, im lep nesgantas iran.

¹⁰ Is um uce nitai iji ehki ek mun ecetai an tinak ainyak; ek mun idim ecetai incai juju an nobohtan ainyak, is esjilid nijinies iran.

¹¹ Is edel incai iyehki, um emda, is ijinies um ahlaujai an nohatag, eris lep ecetai an tid an nobohtan asega:

¹² is eklim upene nerin, um ahinag nohwan, is lep itai caig incai niji itai asega: eris amen niji itai eklim edo irai pece an naiyu iran, eris lep amen irai ran inman an nauanohata g, eris caig nohwan niji itai umumoh asega.

¹³ Kis ecetai an tinak ainyak mika, is ahes an nohatag um asuol a natimi aminjinaig itai is ethi, nagelo upene marom;

¹⁴ is efehtas aien, um ika, Uhmu acaldei nauincai inigki, um isjid ran, um atipagki nerin, um imiterimterim nohwan: erumu aha niji itai eklim edo irai pece ithan, erumu lep udei inran inman:

¹⁵ jam udei nohun neucvan an nobohtan, um ika yi ipjin vai wau aiurn im bras, irai efelelicai an pece; etmu edin vai nopoigmul an nohatag, etmu lep asipiaig nefelelicai an nobohtan aien im niji itai eklim edo irai pece:

¹⁶ uhmu adenaig inliinmopoi atimi vai yin, um alupai yin inliinmopoi itai eklim edo irai pece; etmu lep amen aien irai mesese inyi seven.

¹⁷ Et yetpam nitai inigki vai intas alep u ilpu atimi aminjinaig itai; et lep ahes irai tas o ilpu agelo upene nedo inigki: va erupu ato a ilpu atimi umumoh mika, et atimarid Aien et esjilid acen aien an nelcau u atimi, et lep alupai natimi inig et merit vai yin aien, um lep ati natimi inig et ihkin natimi aien, mika yi atimarid iran.

¹⁸ Numjeg ahnag unyak nigki, ek mun ecetai ainyak Nebukatnesar natimarid. Namu idim asuptecnaig nesgantas iran aiek, ak Beltesasar, era idim auatialidi a ilpu atimi arapakau asega an nelcau unyak par asuptecnaig ehelek nesgantas iran: ja na emda aiek; et idim amen ehelum narapakau u ilpu atua upene.

¹⁹ Is imiali a Taniel, tak idan Beltesasar, an nuarin nadiat is ethi, is lep ehioehio inliinmopon aien. Is tas a natimarid, um ika, Ak Beltesasar, etmu jim ehioehio inliinmopom aiek va numjeg ahnag unyak im nesgantas iran. Is tas a Beltesasar, um ika, Ak natimarid, etmu ura era edemda vai euc ara numjeg ahnag inigki, etmu lep ura era tak atimi iram ara nesgantas iran.

²⁰ As ecetai incai iyehki aiek is edel, um emda, is ijinies um ahlaujai an nohatag, eris lep ecetai an nobohtan asega;

²¹ is eklim upene nerin, um ahinag nohwan, is lep itai caig incai niji itai asega; eris amen niji itai eklim edo irai pece an naiyu iran, eris lep amen irai ran inman an nohatag:

²² nai cai iyehki aiek, ak natimarid, na alupas aiek um emda: et esjilid natimi alupas unyum um ahlaujai an nohatag, et lep yetpan nelcau unyum irai tid an nobohtan.

²³ As lep ecet natimi aminjinaig itai is ethi, nagelo upene marom, aiek, ak natimarid, is ahes an nohatag aien, um asuol, um ika, Uhmu acaldei incai, um auahas; jam udei nohun neucvan an nobohtan, um ika yi ipjin vai wau aiurn im bras, irai efelelicai an pece; etmu edin va nopoigmul an nohatag, etmu lep asipiaig nefelelicai an nobohtan aien im niji itai eklim edo irai pece, etmu lep amen aien irai mesese inyi seven.

²⁴ Nesgantas nigki, ak natimarid, intas alep o un nigki et esjilid acen Aien, etpu yetpam iram, ak natimarid natimi alupas unyak: nikavaig,

²⁵ napu aha va atimi aiek, napu amen aiek ehele niji itai eklim edo irai pece, um caig nefelelicai et idivaig kurimatau, napu lep edin aiek va nopoigmul an nohatag, napu amen aiek irai mesese inyi seven, um imihum pan an nopan iyehki napu ato aiek mika, et atimarid an nelcau u atimi Aien et esjilid acen aien, um alupai yin et merit vai yin aien.

²⁶ Eris asaig mika eri udei nohun neucvan cai; et um uco, etpu amen ipjin vai euc nelcau unyum, nau wit ato aiek mika et atimarid Aien et amen an nohatag aien.

²⁷ Va nitai inigki, ak natimarid, namu adai intas unyak aiek, um udei nauatatimi unyum, um ago nedo upene, um udei nedo has unyum, um ago nedo aiheuc vai ilpu ihki atimi; kit napu amen upene aiek yi itu iram.

²⁸ Is yetpam nitai iji igki asega irai Nebukatnesar natimarid.

²⁹ Is wat ti pan itac inmohoc is twelv, is atga aien an nimnim atimi o un an maliyum Babelon.

³⁰ Is tas a natimarid, um ika, Et idim Babelon nigki et alupas, ek mun actaig ainyak an nemda u intas unyak, par ago nimnim vai nelcau unyak, mika eri imiahpas natimi alupas unyak.

³¹ Is wat eti fi asaig ehni intas inigki a natimarid, is ahes nohran tah an nohatag, um ika, Ak Nebukatnesar natimarid, intas ehelum nigki; Eh mun atipagki nelcau ehelum.

³² Napu aha va atimi aiek, napu amen ehele niji itai eklim edo irai pece an nobohtan aiek, um caig nefelelicai et idivaig kurimatau, ja napu amen aiek iran an mesese inyi seven, um imihum pan an nopan iyehki, napu ato aiek mika et atimarid Aien et esjilid acen aien an nelcau u atimi, um alupai yin et merit vai yin aien.

³³ Eris ehneijid intas inigki vai Nebukatnesar an nuarin nadiat iyehki: is aha va atimi aien, is caig nefelelicai aien et idivaig kurimatau, is edin nohun va nopoigmul an nohatag, um imihum pan an nopan iyehki, is idivaig nalau an meijcop numri nidjinin, um lep idivaig nihinagai man nihinagai nupsikman im nupseduon.

³⁴ Is wat ti pan itac nadiat iji ehki asega, kis yasji pan an nesganimtak an nohatag ainyak Nebukatnesar, is lep eteuc lelek; kis ago naaurinig ainyak vai yin et esjilid acen Aien; kis imiahpas yin ainyak, um ago nedo ecen vai yin et umoh aien irai iji opan, inyi eti lep ti nelcau o un, etpu lep atimarid aien irai iji mesese asega:

³⁵ era tup takitai natimi asega an nobohtan: et ago nitai merit o un aien irai ilpu agelo au nohatag, im lep ira atimi an nobohtan: et elika vaig tah par atapnes nikman, ka nasaig vaig ehelen, Na ago inhe aiek?

³⁶ Is lep eteuc lelek an nopan iyehki; eris lep imiadumoij pam ehelek natimi alupas an nelcau unyak; eris lep ecen vai nyak, um imiimtacimtac nyak; eris ahilek nyak a ilpu atimi tas alep unyak, im ilpu atimi alupas unyak; eris lep ati nyak an nelcau unyak, is lep esjilid natimi alupas unyak.

³⁷ Ek ago naaurinig ainyak Nebukatnesar um imiahpas, um ago nedo ecen vai Natimarid an nohatag, et inveijec nauritai asega o un, et lep atoh nedo o un: et emda aien par imiasuol ra sji igki et ijinies nedo ura.