Taniel 3 - Intas Etipup

Nuarin tas alupas 3.

1 Et ati natmasimai irai colt Tura a Nebukatnesar. 8 Er atijai itai irai Setrak, im Misak, im Abetneco, mika ehtaij eti alaigaheni vai natmasimai iyehki ahtaij. 13 Eh wat acaiji ehtaij, ehtaij asuptecnaig upene intas ahtaij. 19 Et imiatamai ehtaij van cap alupas acen a Atua. 26 Et wat ecetai nitai imiali iyehki a Nebukatnesar, et imiahpas Atua aien.

¹ IS ago natmasimai colt a Nebukatnesar natimarid, is kubit is sikste nijinies iran, im kubit is siks netgeig iran: is aduwi an nuarin marara Tura aien an nuarin pece Babelon.

² Is abra atimi a Nebukatnesar natimarid, mika eri asjapicnaig ilpu atimi alupas esjilid, im ilpu atimi aminjinaig inpece, im ilpu atimi alupas, im ilpu atimi tas alep, im ilpu atimi aminjinaig mune, im ilpu atimi ato intas alep, im ilpu atimi asuptecnaig intas alep, im ilpu atimi alupas asega irai iji uari pece, um apam par ati natmasimai iyehki is aduwi a Nebukatnesar natimarid.

³ Eris asjapicnaig a ilpu atimi alupas esjilid, im ilpu atimi aminjinaig inpece, im ilpu atimi alupas, im ilpu atimi tas alep, im ilpu atimi aminjinaig mune, im ilpu atimi ato intas alep, im ilpu atimi asuptecnaig intas alep, im ilpu atimi alupas asega irai iji uari pece, va nati vaig natmasimai iyehki is aduwi a Nebukatnesar natimarid; eris aiji ara an nuhup u natmasimai iyehki is aduwi a Nebukatnesar.

⁴ Is efehtas a natimi tauai, um ika, Ak natimi iji igki, im nup urai iji pece, im ilpu atimi auoh iji tas, intas alep ehelemia nigki,

⁵ Aku wit atahaijeg nohran toho aijaua, im inhutlavlav, im harp, im sakbut, im saltere, im tulsimer, im niji ohrai itai asega, akumu atpuse aijaua um alaigaheni vai natmasimai colt inigki et mun aduwi a Nebukatnesar natimarid:

⁶ aien et eti atpuse aien um alaigaheni, uhpu ethaigjai yin an nuarin nadiat iyehki juju an nehpan uum ehri acen.

⁷ Va nitai inigki an nuarin nadiat iyehki, eris wat atahaijeg nohran toho natimi asega, im inhutlavlav, im harp, im sakbut, im saltere, im niji ohrai itai asega, eris atpuse natimi asega, im nup urai iji pece, im ilpu atimi auoh iji tas, um alaigaheni vai natmasimai colt iyehki is aduwi a Nebukatnesar natimarid.

⁸ Ja eris apan ubutpotet a nahaiji nup u Kaltia an nopan iyehki, um atijai itai irai nup u Juta.

⁹ Eris tas ara ehele Nebukatnesar natimarid, um ika, Ak natimarid, namu umoh aiek irai iji mesese.

¹⁰ Ak natimarid, as tas alep aiek um ika, Eru wit atahaijeg nohran toho natimi, im inhutlavlav, im harp, im sakbut, im saltere, im tulsimer, im niji ohrai itai asega, eri atpuse ara asega um alaigaheni vai natmasimai colt inigki:

¹¹ ja aien et eti atpuse aien um alaigaheni, uhpu ethaigjai yin juju an nehpan uum ehri acen.

¹² Ehtaij amen igcaki a nup u Juta et eseij, as ikni ehtaij aiek mika ehtiji atimi alupas irai itai an pece Babelon ahtaij, nan Setrak, im Misak, im Abetneco; ehtaij eti ecen vai euc ahtaij, ak natimarid: ehtaij eti auanaheca vai ilpu atmas unyum ahtaij, um eti alaigaheni vai natmasimai colt inigki na mun aduwi aiek.

¹³ Is atavaitap a Nebukatnesar um edemda, um asaig mika eri imiapan ehelen Setrak, im Misak, im Abetneco. Eris imiapan ehtaij rahki an nuhup u natimarid ara.

¹⁴ Is tas a Nebukatnesar ehele ehtaij, um ika, Et inveijec, ak Setrak, im Misak, im Abetneco, mika, ehtaij eti auanaheca irai ilpu atmas unyak aijautaij, um eti alaigaheni vai natmasimai colt inigki ek mun aduwi ainyak, ka oʼo?

¹⁵ El ehtaij ika aijautaij ahtiji atpuse aijautaij, aku wit atahaijeg nohran toho aijautaij, im inliut-lavlav, im harp, im sakbut, im sal-tere, im tulsimer, im niji ohrai itai asega, um alaigaheni vai natmasi-mai inigki ek mun ago ainyak; et upene: ja el ehtaij eti alaigaheni aijautaij, uhpu erekhaigjai cautaij juju an nehpan uum ehri acen an nuarin nadiat inigki; ja atua inig yek eda, et emda aien par imiatamaig cautaij va nikmak?

¹⁶ Ehtijis tas ahtaij ehele ua-timarid, nan, Setrak, im Misak, im Abetneco, um ika, Et eti upene i vai cumtaij intas vaig ehelum vai nitai inigki, ak Nebukatnesar.

¹⁷ El et uce, et emda a Atua inig ehtaij aheca o un aijumtaij, par imitamaig cumtaij va nehpan uum ehri acen, etpu lep imiatamaig cumtaij aien va nikmam, ak natimarid.

¹⁸ Ja el et ti, namu ato aiek, ak natimarid, mika ehtijpu eti auanaheca vai ilpu atmas unyum aijumtaij um eti alaigaheni vai natmasimai colt inigki na mun aduwi aiek.

¹⁹ Is atavaitap alupas a Nebukatnesar, is lep eche nesganimtan vai Setrak, im Misak, im Abetneco: is asaig aien mika eri adgan cap an nehpan uum, mika yi eceseven ehri nago iran.

²⁰ Is asaig ehele ilpu atimi emda acen aien irai ilpu eucsupo o un mika eri arore Setrak ara, itu Misak, im Abetneco, um erekhaig jai ehtaij an nehpan uum ehri acen.

²¹ Eris arore ehtaij raliki irai sirt u ehtaij, im trausers u ehtaij, im incat adgaig u ehtaij, im lep hal napelumai u ehtaij, um erekhaig jai ehtaij juju an nehpan uum ehri acen.

²² Is emda intas alep u natimarid, um lep ehri emda nehpan uum, va nitai inigki is auahas natimi iji ehki nalaume u incap eris arop irai Setrak ara, im Misak, im Abetneco.

²³ Ehtijis eropse ahtaij natimi erahki, nan, Setrak, im Misak, im Abetneco juju an nehpan uum ehri acen, is amen inwau irai ehtaij.

²⁴ Is imiali a Nebukatnesar natimarid, um auroauro um atidai, um tas ehele ilpu atimi alupas o un, um ika, Inta mun arore ehtaij eraigki akaija, um erekhaig jai ehtaij an cap, ka oʼo? Eris tas ehele natimarid ara, um ika, Nai inveijec aiek, ak natimarid,

²⁵ Is tas aien, um ika. Ek idim ahnoi natimi et for ainyak, et ti in-wau ira ra, natga vaig anliin cap, ja er eti auahas ra; et lep idivaig inhal u Atua nohui natimi ford.

²⁶ Is apan a Nebukatnesar ubutpotet u neucsen nehpan uum ehri acen, um tas, um ika, Ak Setrak, im Misak, im Abetneco, ehtaij aheca u Atua esjilid acen, ahtijmu ahes iagko aijautaij um apam igcaki. Ehtijis ahes anliin cap ahtaij, nan, Setrak, im Misak, im Abetneco.

²⁷ Eris asjapicnaig a ilpu atimi alupas esjilid, im ilpu atimi alupas ira atimi, im ilpu atimi aminjinaig inpece, im ilpu atimi u natimarid eris tas alep ara, um alum ehtaij atimi erahki, ja is auatialidi incap nauahas vaig nohui ehtaij, is lep eti cas tah numri nidjini ehtaij, is eti lep eche napelumai u ehtaij, eris lep eti ahgei nipin cap irai ehtaij.

²⁸ Is tas a Nebukatnesar, um ika, Naaurinig vai Atua u Setrak, im Misak, im Abetneco, et mun abraig pam nagelo o un aien, um imiatamaig ehtaij aheca o un ehtaij asgeig iran ahtaij, um ahidaig intas o natimarid, um eti imicoho nohui ehtaij, vai ehtiji jim auanaheca vaig tah natmas, um alaigaheni vai yin, Atua u ehtaij ache.

²⁹ Va nitai inigki ek tas alep ainyak mika, el et asaig tah intas ahnag vai Atua u Setrak, im Misak, im Abetneco, tah natimi, ka tah an tah an pece, ka tah ira atimi auoh iji tas, uhpu auud yi amud ra, um ika yi uarin ethan nohok nimnim ura: et idim eti emda tah natmas par imiatamaig atimi et uce.

³⁰ Is ikni Setrak, im Misak, im Abetneco, a natimarid, mika ehtiji esjilid ahtaij an pece Babelon.