Taniel 2 - Intas Etipup

Nuarin tas alupas 2.

1 Et umjeg ahnag a Nebukatnesar ja et par ahnag iran aien, et lep ahodaig nup u Kaltia aien eaig, um ika yi alupai ra nimtan ka yi ati nohocred vai ra. 10 Era ika ara et ehka vai ra par asuptecnaig vaig, et tas alep aien mika eri atgei ra. 14 Et leh tah naiheuc vai yin a Taniel, ja et par ato numjeg ahnag aien. 19 Et imiahpas Atua vaig aien. 24 Et atapnes intas alep iyehki aien, eh lep imiapan yin ehele natimarid. 31 Numjeg ahnag iyehki. 36 Nasuptecnaig vaig iran. 46 Et imiaridjai Taniel a Nebukatnesar.

¹ IS wat atimarid a Nebukatnesar an mesese is ero, is umjeg ahnag aien, is ohocred inliinmopon aieu vaig, is lep eti umjeg aien.

² Is um asaig a natimarid mika eri asjapicnaig ilpu atimi arapakau, im ilpu atimi itap, im ilpu atimi araces, im nup u Kaltia, par asuptecnaig ehele natimarid numjeg ahnag o un. Eris apan ara um aiji an nuhup u natimarid.

³ Is ika ehele ra a natimarid, Ek mun umjeg ahnag ainyak, et lep ohocred inliinmopok ainyak par ato numjeg ahnag unyak.

⁴ Eris tas a nup u Kaltia ehele natimarid an tas Siria, um ika, Ak natimarid, namu umoh aiek irai iji mesese: namu asaig ehele ilpu aheca unyum aiek numjeg ahnag unyum, ja ecrupu asuptecnaig nesgantas iran aijama.

⁵ Is tas a natimarid ehele nup u Kaltia, um ika, Ek eti imiehva nitai iyehki ainyak: el eka eti asuptecnaig ehelek numjeg ahnag unyak aijaua, im lep nesgantas iran, uhpu auud yi amud caua, um ika yi uarin ethan nohok iran nimnim unyimia.

⁶ Ja el eka asuptecnaig numjeg ahnag unyak aijaua, im nesgantas iran, ekpu alupai caua niji itai tup ahtai ainyak, im nimtan, um ika eri ago nedo ecen vai caua: va nitai inigki akumu asuptecnaig ehelek numjeg ahnag unyak aijaua, im nesgantas iran.

⁷ Eris lep tas ara, um ika, Ak natimarid, namu asaig numjeg ahnag unyum aiek ehelema ilpu aheca unyum, ja ecrupu asuptecnaig nesgantas iran aijama.

⁸ Is tas a natimarid, um ika, Ek idim ato ainyak mika, akupu ecrap aijaua, eka idim ato aijaua mika ek eti imiehva nitai iyehki ainyak.

⁹ Ja el eka eti asuptecnaig ehelek numjeg ahnag unyak aijaua, et ethi ache intas alep vai caua: eka aktaktai intas ahcil im intas efaifa aijaua par asaig ehelek, um yetpan an taka opan: va nitai inigki akumu asaig ehelek numjeg ahnag unvak aijaua, ekpu lep ato ainyak mika eka emda aijaua par asuptecnaig ehelek nesgantas iran.

¹⁰ Eris tas a nupu Kaltia an nuhup u natimarid, um ika, Et eti emda tah natimi an nobohtan nasuptecnaig vaig nitai inigki et mun ecetai a natimarid: va nitai inigki is eti eteuc tah natimarid, ka tah natimi alupas, ka tah natimi tas alep, is ahodaig tah natimi arapakau aien, ka tah natimi itap, ka tah nup u Kaltia, va niji itai et idivaig inig.

¹¹ Et ehka nitai inig nai merit vaig aiek, ak natimarid, et eti emda tah nasuptecnaig vaig ehelum, ak natimarid, ilpu atua ache, era eti amen ehele atimi ara.

¹² Va nitai inigki is atavaitap a natimarid, um edemda alupas, um asaig mika eri atgei ilpu atimi arapakau asega Babelon.

¹³ Is apaahni intas alep par atgei ilpu atimi arapakau; eris lep ahilek Taniel im ehtaij etwan mika eri atgei ra.

¹⁴ Is tas upene um arapakau a Taniel ehele Eriok natimi alupas u ilpu eucsupo aminjinaig natimarid, is apan aien par atgei ilpu atimi arapakau Babelon:

¹⁵ is tas aien ehele Eriok natimi alupas u ilpu eucsupo o natimarid, um ika, Et ehcamecha intas alep u natimarid par auroauro alupas? Is asuptecnaig nitai iyehki a Eriok ehele Taniel.

¹⁶ Is apan a Taniel um ugyi natimarid, mika yi eklim erop aien va etpu asuptecnaig ehele natimarid nesgantas iran aien.

¹⁷ Is apan a Taniel an nimnim o un, um asuptecnaig nitai iyehki ehele ehtaij etwan, nan, Hananaia, im Miseel, im Asaraia:

¹⁸ mika eri ugyi Atua an nohatag ara, mika yi aiheuc vai ra aien va nitai adenaig iyehki; va eri jim emesmas ara, nan, Taniel im ehtaij etwan inyi tup ethi ache pan irai ilpu atimi arapakau asega Babelon.

¹⁹ Eris ehvaig nitai adenaig iyehki ehele Taniel an nahuumtidec o un an nepig. Is par ago naaurinig vai Atua an nohatag a Taniel.

²⁰ Is tas a Taniel, um ika, Uhmu imiahpas nidai Atua irai iji mesese: et idim o un narapakau im nemda:

²¹ et ika aien yi acheiachei niji opan im niji adiat: et iknipagki ilpu atimarid aieu, um lep ikni ilpu atimarid: et alupai ilpu atimi arapakau narapakau ura aien, et lep alupai ilpu atimi aktaktai itai lelra upene aien.

²² Et ika aien eri ecetai irai uarin ubo, et lep ehvaig niji itai adenaig aien: et ato aien niji itai et amen an napat, et lep amen inlah ehelen.

²³ Ek ago naaurinig vai euc ainyak, um imiahpas euc, ak Atua u ilpu retpok, as alupai nyak narapakau aiek im nemda, na mun lep asuptecnaig ehelek aiek an nopan inig nitai inigki ecris ugyi euc vaig aijama: na mun ehvaig ehelema aiek nitai iyehki is ecetai a natimarid.

²⁴ Is idim apan a Taniel ehele Eriok, aien ahki is ati yin a natimarid par atgei ilpu atimi arapakau Babelon: is apan aien um ika ehelen; Namu jim atgei ilpu atimi arapakau Babelon aiek: imiapan nyak an nuhup u natimarid, ekpu asuptecnaig ehele natimarid ainyak numjeg ahnag o un im nesgantas iran.

²⁵ Is auroauro a Eriok um imiapan Taniel an nuhup u natimarid, um ika ehelen, Et mun ecet natimi et ethi ainyak ehele nup u Juta eris lucsei pam ra igcaki an nedoa, etpu asuptecnaig ehelum aien, ak natimarid, numjeg ahnag unyum im nesgantas iran.

²⁶ Is tas a natimarid ehele Taniel, tak idan Beltesasar, um ika, Na emda aiek par asuptecnaig ehelek numjeg ahnag inig ek mun ecetai ainyak, im lep nesgantas iran, ka oʼo?

²⁷ Is tas a Taniel an nuhup u natimarid, um ika, Et ehka vai ilpu atimi arapakau, im ilpu atimi itap, im ilpu atimi araces, im ilpu atimi asaig yi opdicrai itai, nasuptecnaig vaig ehele natimarid nitai adenaig inigki marom na mun asaig aiek, ak natimarid;

²⁸ ja et amen a Atua an nohatag et ehvaig niji itai adenaig aien, um asuptecnaig ehele Nebukatnesar natimarid nitai iji igki etpu yetpam an taka opan. Numjeg ahnag unyum im nitai iji ehki as ecetai aiek an tinam ji igki;

²⁹ ak natimarid, is ehlohos naktaktai u inliinmopom aiek an tinam va niji itai etpu yetpam an taka opan: aien et ehvaig niji itai adenaig aien et asuptecnaig ehelum aien nitai iji igki etpu yetpam.

³⁰ Ja er eti asuptecnaig ehelek nitai adenaig inigki, vaig tah narapakau unyak et esjilid irai narapakau ui tak atimi asega, ja vaig inigki ache, mika eri asuptecnaig nesgantas ehelum, ak natimarid, im lep mika an ato naktaktai u inliinmopom aiek.

³¹ Ak natimarid, as idim ecetai natmasimai alupas aiek. Is aiji an nuhup unyum natmasimai alupas iyehki, is esjilid neklim upene iran; is lep itai imititaig vaig nago iran.

³² Is colt upene nidjini natmasimai iyehki, is silver inritin im nikman, is bras nipjinetgan im inhan,

³³ is aiurn neduon, is aiurn hal uari upseduon im intan apol hal uarin.

³⁴ As ecetai aiek mika, eris ahtalgei inhat is ethi, jam eti irai ikma atimi, is asji neduei natmasimai iyehki, eris ago irai aiurn im intan apol, um ahtagrei.

³⁵ Is ehras ahtagrei aiurn, im intan apol, im bras, im silver, im colt, is lep idivaig narasi hwiit an nuarin auud hwiit iran an lidija; is ahlaadaig pagki nimtinjap, is um ti nuarin amen iran: is lep edoon alupas inhat iyehki is asji natmasimai, is ohua nobohtan asega vaig.

³⁶ Numjeg ahnag unyum nigki; ekpu lep asuptecnaig nesgantas iran ainyak ehelum, ak natimarid.

³⁷ Ak natimarid, na atimarid aiek u ilpu atimarid: et mun alupai euc nelcau a Atua an nohatag, im nemda, im natimi alupas, im nimiahpas,

³⁸ et mun alupai euc niji uarin asega aien era amen iran natimi, im niji itai eklim edo irai pece im inman an nauanohatag um ati euc mika an esjilid ira ra asega aiek: nai idivaig nidjinin iyehki is colt aiek.

³⁹ Nau wit ti aiek, etpu eteuc nelcau inyi eche, ja inyi eti esjilid um idivaig euc, im lep nelcau dirt inyi eche irai bras, etpu esjilid an nobohtan asega.

⁴⁰ Inyi emda um idivaig aiurn nelcau ford: et ahtagrei itai asega aiurn um esjilid iran: etpu idim ahtagrei um ehtoplecoplec itai nelcau iyehki, et idivaig et ahtagrei niji itai asega aiurn.

⁴¹ As ecetai neduon aiek im nupseduon, mika is tan apol u atimi ago ipjiitai nahaijin, im aiurn nahaijin, et idim uco, uhpu atiakoai nelcau iyehki; ja etpu emda et idivaig aiurn, as idim ecetai aiurn aiek eris ago pelaig an tan apol updak,

⁴² Is idim aiurn hal uarin upseduon im intan apol hal uarin; et um uco, etpu emda nahaijin nelcau iyehki, jam auatialidi nahaijin.

⁴³ As lep ecetai aiek mika eris ago pelaig aiurn im intan apol updak, et um uco, erupu tup ethi ache pan irai tup atimi ara: ja eri eti apol jipe ira ra ara, et idivaig et eti apol jipe aiurn im intan apol.

⁴⁴ Ja an nopan u ilpu atimarid iji ehki etpu ati nelcau iyehki a Atua an nohatag, eri eti auahas irai iji mesese: uhpu lep eti atcijaig nelcau iyehki imi nup urai taka pece, etpu ahtagrei um auahas nelcau iji ehki asega, etpu lep amen aktit irai iji mesese.

⁴⁵ As idim ecetai inhat iyehki aiek, eris ahtalgei an nedoon jam eti irai ikma atimi, nahtagrei vaig aiurn im bras, im intan apol, im silver, im colt; et um uco, is ehvaig ehelum, ak natimarid, nitai iji igki etpu yetpam an taka opan a Atua esjilid: et inveijec numjeg ahnag unyum, et lep inveijec nesgantas iran.

⁴⁶ Is atpuse a Nebukatnesar natimarid, um ecen vai Taniel um asaig mika eri ahlap an nitai ahlap vai yin ara, im niji itai auanipin upene.

⁴⁷ Is tas a natimarid ehele Taniel, um ika, Et inveijec intas inig mika, et Atua u ilpu atua a Atua unyimia, im Natimarid u ilpu atimarid, um ehvaig niji itai adenaig; va nitai inigki nai emda aiek par asuptecnaig nitai adenaig inigki.

⁴⁸ Is asaig a natimarid mika yi atimi alupas esjilid a Taniel, is alu-pai yin niji itai tup ahtai esjilid aien, um ati yin mika vi esjilid aien an nuarin pece Babelon asega, um lep atimi esjilid irai ilpu atimi alupas im ilpu atimi arapakau asega Babelon.

⁴⁹ Is ugyi natimarid a Taniel, is lep ati Setrak aien, im Misek, im Abetneco mika ehtijis atimi alupas ahtaij irai itai an nuarin pece Babelon: ja is ateuc a Taniel an neucse nathatahau u natimarid.