Taniel 12 - Intas Etipup

Nuarin tas alupas 12.

1 Etpu imiatamaig nup Isreel va nohocred ura a Maikel. 5 Er asuptecnaig ehele Taniel vai iji opan.

¹ AN nopan iyehki etpu atidai a Maikel, natimi alupas esjilid et atidai aien va atimi an pece unyum: etpu yetpam tah nopan ohocred et ethi, is eti uce tah nopan ohocred, ahes an nopan natupun ira atimi um yetpam an nopan inig: ja an nopan iyehki eri imiatamaig nup uran pece unyum, ra sji igki asega marom uhpu aged nidara an nitaasviitai u Atua.

² Erupu anusjai natimi inyi ahinag irai ra sji igki era umjeg se ara an mah an nobohtan, erupu leh nitai umoh iran irai iji mesese nahaijira, ja erupu leh nitai ehcamai im namcel vai ra irai iji mesese nahaiji ra.

³ Ara era arapakau ara erupu naunau ara um idivaig naijoran lah an nohatag; im lep ra era ahidai atimi inyi ahinag pan u nedo atoh erupu idivaig moijeuv ara irai iji mesese asega.

⁴ Ja aiek, Taniel aigki, namu atapnes irai tas iji igki aiek, um atapnes an nitaasviitai an nitai asjaaicnaig, um yetpan an nehni u itai iji igki: erupu athut jipe natimi inyi ahinag, um esege imi atimi inyi ahinag, erupu ato itai ara.

⁵ Kis yaspan ainyak Taniel, um ecet natimi is ero is eche, erus aiji arau is ethi an nohmun nofowai igcapam, im lep is ethi an nohmun nofowai igcapan.

⁶ Is um ika is ethi ehele natimi iyehki eris aso yiu ira apelumai yilyil, is amen aien ijinies irai wai an nofowai, Inyi ehed nadiat ja uhpu ago ehni nitai iji igki er imiali vaig?

⁷ Ja kis ahgei natimi iyehki ainyak eris aso yin ira apelumai yilyil, is amen ijinies an nofowai aien is adaigjai nikman inmatan im lep inmauun an nohatag aien, um asan tas aktit vai yin et umoh Aien irai iji mesese, is ika aien, Etpu yetpam nitai iji igki irai yier inyi dri im lep an nahaijin yier; eri terimterim ehni an nemda u ilpu atimi itap, japar ago ehni nitai iji igki asega.

⁸ Kis atahaijeg ainyak, jam eti ato: ja kis par ika ainyak, Ak Natimarid unyak, et echamecha nehni u nitai iji igki?

⁹ Is um ika aien, Ak Taniel, atga unyum aiek: er atapnes um ago ipjin an nitai asjaaicnaig intas iji igki, um yetpan an nopan ahni u itai iji igki.

¹⁰ Erupu eteuc natimi inyi ahinag, uhpu ago upene ra, um lep ago ahi ra, um lep atgeh ra; ja erupu ago nedo has a ilpu atimi auatatimi: inyi eti aktaktai itai tah irai ilpu atimi auatatimi; ja erupu aktaktai itai a ilpu atimi arapakau.

¹¹ Inyi adiat wun dausant tu huntret im nainte (1,290), ahes an nopan iyehki eri atipagki nitai ahlap er ago irai iji adiat, um yetpan an nopan iyehki eri ati nitai er amcel vaig par auahas neom itap.

¹² Et mun ahesmoij aien et aktaktai alupas aien, um yetpan ira adiat wun dausant dri huntret im dirte faiv (1,335).

¹³ Ja namu atga unyum aiek um yetpan an nopan ahni u itai iji igki: napu idim atumop aiek, um aiji an nuarin inig na ohuun aiek etu wit ti niji adiat.