Taniel 11 - Intas Etipup

Nuarin tas alupas 11.

1 Et ahau pan nup u Persia a natimarid u nup u Crisi. 5 Era asig jipe niji tas etipup a ilpu atimarid u nup Ijipt im ilpu atimarid u nup u Siria, era lep ehtauo jipe ara. 30 Era apam a nup u Roma um ehcerucai atimi.

¹ AN mesese uhup is atimarid a Taraius nup u Mitya, kis aiji ainyak par atau iran um ago emda yin.

² Im lep inig, ekpu asuptecnaig ehelum intas inveijec ainyak. Ehtijpu lep atidai jai natimarid an pece Persia inyi dri; ja etpu atimi ikni itai a natimarid ford um esjilid acen irai ehtaij atimarid erahki: etpu ika aien va nemda o un im nikni itai o un eri ati nedoa ara asega vai nup u Crisi.

³ Ja par apitac etpu atidai a natimarid emda inyi ethi etpu atimarid aien an nelcau alupas, um ago nedo inig etpu merit vaig aien.

⁴ Ja etu wit atidai aien, eri auoplecoplec nelcau o un, um ahaig ehni ira ahaijin nohatag et for; jam eti alupai ilpu hal o un, inyi eti alupas nelcau inigki um idivaig iyehki is atimarid iran aien: eri idim ahidaig pagki nelcau o un, um alupai atimi era eti leh imi ra ara.

⁵ Etpu emda a natimarid u nup Ijipt, ja etpu esjilid iran tah irai ilpu atimi alupas o un, etpu atimarid aien; etpu idim alupas nelcau o un.

⁶ Etu wit ti pan itac hal mesese erupu tup ethi ache arau; etpu idim apam ehele natimarid u nup u Siria a inhalav atahig u natimarid u nup Ijipt par asan nigpa: ja inyi eti amen aktit ehelen nemda o un; inyi eti lep amen aktit aien, im lep natimi alupas o un: ja uhpu atcijaig yin, im lep ra eris imiapan yin ara, im lep inhal o un, im lep yin is ago emda yin aien ira adiat iji ehki.

⁷ Ja etpu atidai jai a natamaig iran takata iyehki um isjeupigmoig yin, etpu hame aien im ilpu eucsupo o un, um yetpan an maliyum inig et ipjin u natimarid u nup u Siria, etpu aat ira ra aien, um esjilid ira ra:

⁸ etpu tup imiapan an pece Ijipt niji atmasimai ura aien, im lep ilpu atimi alupas ura, im niji ipjiitai upene ura er ago irai silver im colt; etpu esjilid irai natimarid u nup u Siria aien irai hal mesese.

⁹ Etpu yetpan an nelcau o un a natimarid u nup Ijipt, um adumoij an pece o un,

¹⁰ Ja uhpu ahugni ohwat hal u natimarid u nup u Siria, eraupu asjapicnaig ilpu eucsupo inyi ahinag acen arau: ja etpu idim ham tah rau, um apaahni an pece, um atga o im: ja etpu lep ham aien um ati nedoa, um yetpan an maliyum inig et ipjin o un.

¹¹ Etpu edemda alupas a natimarid u nup Ijipt, um apan um aubilid yin par ati nedoa vai yin, vai natimarid u nup u Siria marom: etpu esyei atimi inyi ahinag a natimarid u nup u Siria; ja uhpu atcijaig pan ehele natimarid u nup Ijipt natimi iji ehki eri ahinag ara.

¹² Etu wit iknipagki atimi iji ehki a natimarid u nup Ijipt eri ahinag ara, etpu ijinies inliinmopon aien; etu wit erekhaig se atimi aien inyi ahinag dausant ira ra, etpu eti esjilid aien.

¹³ Etpu idim adumoij a natimarid u nup u Siria, um lucsei atimi inyi ahinag acen irai ra sji ehki uhup, etu wit ti pan itac hal mesese etpu idim ham aien, im ilpu eucsupo inyi ahinag ehelen, im inpadiaig alupas o un.

¹⁴ Erupu atidai natimi inyi ahinag an nopan iyehki um aat irai natimarid u nup Ijipt: erupu lep ago emda ra a ilpu atimi imipalea irai nup uran pece unyum mika eri ehneijid nitai ehvaig; ja erupu eropropse ara.

¹⁵ Etpu idim ham a natimarid u nup u Siria, um assijai nedoon inyi ethi, um atoraliak niji maliyum iji ig et ipjin um alupas nathatahau iran: eri eti atapnes ra a ilpu eucsupo u natimarid u nup Ijipt, im ilpu atimi is ikni ra aien, inyi ti nemda ura par atapnes ra.

¹⁶ Etpu ago nitai merit o un a natimi iyehki etpu yetpam aien par aat iran, inyi ti tah par aiji an nuhup o un: etpu aiji aien an pece esjilid iyehki, etpu ohuun inpece iyehki asega aien.

¹⁷ Im lep inig, etpu imiisjis aien mika yi atga an pece iyehki aien im ilpu atimi emda an nelcau o un asega, im lep ilpu atimi ago nedo atoh ehelen; etpu idim ago aien: etpu alupai natimarid u nup Ijipt inhalav atahig o un aien, mika yi ago nedo efaifa vai yin aien: ja inyi eti amen aktit vai etman aien, um eti apol iran.

¹⁸ Ja etpu apitac aien um merit alupas vai niji hakli pece an jap, etpu lucsei inyi ahinag imi yin aien: ja etpu ika tah natimi alupas et ethi ehelen, yi udei nedo iyehki eri auoh ehcamai yin vaig; is lep aru nedo o natimarid u nup u Siria aien, um ika yi ehcamai aien.

¹⁹ Ja etpu aktaktai aien va niji maliyum iji ig et ipjin an pece o un: ja etpu epihtau aien um eropse, eri eti lep ecet yin.

²⁰ Etpu atidai um isjeupigmoig yin tah natimi asjapicnaig an nakwanaham irai iji itai esjilid an nelcau o un: ja etu wit ti pan itac nadiat eti elpat uhpu auahas yin, jam eti an nedemda ka an nedoa.

²¹ Etpu atidai um isjeupigmoig yin a natimi inyi ethi eri amcel vai yin, erupu eti alupai yin nimiahpas u ilpu atimarid ara: ja etpu apam aien an nedo igpa, um leh natimi alupas van tas o un inyi updak jam ahcil.

²² Eri auahas ilpu eucsupo o nup Ijipt, inpece inig et ahgarero inwai iran, an nuhup o un, eri lep auahas ra; im lep natimarid inig eris asaig intas etipup ehelen ara.

²³ Eri asan nigpa ehelen ara ja etpu ago nedo efaifa aien; etpu idim apan an pece Ijipt aien, um emda vai ilpu atimi o un inyi eti elpat.

²⁴ Etpu tup eklim yetpan irai uarin esjilid an nilpun pece aien; etpu ago hal itai aien is eti ago a etman im ilpu retpon tupko, im ilpu retpon itu acen; etpu ahaig ira atimi itai eris atoraliak, im naga eris lucsei an nedoa, im inpadiaig o un: etpu lep aktaktai irai hal adiat nedo arapakau va niji maliyum iji ig et ipjin.

²⁵ Etpu ahugni nemda o un aieu im lep inliinmopon vai natimarid u nup ljipt um leh inpak an nedoa alupas o un; etpu atidai a natimarid u nup Ijipt par ati nedoa aien im inpak an nedoa alupas um emda o un; ja inyi eti amen aktit aien: erupu idim ago nedo efaifa vai yin ara.

²⁶ Erupu auahas yin ara sji ig era hag ehelen ara; erupu apaahni an pece inpak an nedoa o un, par atgei atimi inyi ahinag.

²⁷ Eraupu aktaktai ahwat atimarid eraigki par auahas rau jipe, eraupu asan tas ahcil arau u nitai hag et ethi ache; ja inyi eti upene: etpu idim yetpam nehni vaig an nopan eris asaig.

²⁸ Ja etpu apitac aien um adumoij an pece o un, um lucsei inpadiaig alupas o un; etpu edemda aien vai intas etipup upene; etpu ago hal edo aien, ja par adumoij pan an pece o un.

²⁹ Etpu adumoij pam aien an nopan eris asaig, um apan alaig apan an pece Ijipt; ja inyi eti idivaig iyehki uhup, ka iyehki is apitac.

³⁰ Eri apam um aat iran niji elcau u nup u Kitim: etpu ohocred vaig aien, ja par adumoij, um edemda vai intas etipup upene: etpu uce nago itai o un; etpu adumoij aien, um imiacaij ra era egeigei intas etipup upene ara.

³¹ Erupu aiji a ilpu eucsupo an nahaijin nedoa o un, erupu auahas inmaliyum itap et ipjin ara, erupu atipagki nitai ahlap ara er ago irai iji adiat, erupu lep ati iran nitai er amcelvaig par auahas neom itap vaig.

³² Ara era atladwi intas etipup upene ara, etpu imiahnag ra aien irai tas o un et updak jam ahcil: jai natimi iji ig era ato Atua ura ara, erupu emda ara, um ago nauritai alupas.

³³ Jai ara era ato itai ara ira atimi, erupu esege imi atimi inyi ahinag ara: ja erupu eropropse ara an nedoa, im incap, uhpu imiapan ra irai taka pece, um atoraliak itai ura, ira adiat inyi ahinag.

³⁴ Ja eru wit eropropse ara, eri atau imi ra jam atau tintin ache: ja erupu apol ira ra natimi inyi ahinag, um asaig intas updak jam ahcil.

³⁵ Erupu lep eropropse nahaiji ra era arapakau ara, par atgeh ra, um ago upene ra, um ago ahi ra, um yetpan an nehni u itai iji igki: et idim eti fi yetpam nopan eris asaig.

³⁶ Etpu ago a natimarid yi idivaig inmerit o un; etpu imiaridjai yin aien, um ika et esjilid aien irai ilpu atmas asega, etpu asaig intas ijinies aien vai Atua esjilid acen, etpu lep amen upene aien um yetpan an nopan ahni u nedemda: eri idim ago nitai inig eris asaig.

³⁷ Inyi eti aktaktai Atua u ilpu retpon aien, ka inmerit vai ilpu takata, um eti aktaktai tah natmas: etpu ika aien et esjilid aien irai iji itai asega.

³⁸ Ja etpu ateri Atua emda acen aien an nitai ateuc o un, um imiahpas tah natmas inyi ethi eris eti ato yin a ilpu retpon, um ati imi yin colt, im silver, im inhat esjilid, im niji itai upene.

³⁹ Etpu ago nedo inigki aien irai iji maliyum ipjin vaig tah natmas an taka pece, etpu aktaktai yin aien, um ika eri imiahpas alupas yin: etpu ikni ra aien mika eri esjilid ara ira atimi inyi ahinag, etpu ahaig inpece aien mika yi leh nimtan aien.

⁴⁰ Ja etu wit yetpam nehni u itai iji igki, etpu ati nedoa vai yin a natimarid u nup Ijipt: etpu teloteloh pan ehelen a natimarid u nup u Siria, im niji jariot o un, im ilpu atimi ateuc irai hors, im nelcau itoga o un inyi ahinag, yi idivaig narakiraki; etpu lep auahas niji pece aien, um apaahni iran, um atga o un.

⁴¹ Etpu lep yetpan an pece esjilid iyehki aien, uhpu auahas nup urai pece inyi ahinag: jai eri imiaras vai yin nup Itom, im nup u Moab, im lep ilpu atimi alupas u ilpu mapoi Amon.

⁴² Etpu lep atgeig yi apidi nikman aien irai iji pece: uhpu eti lep imiatamaig inpece Ijipt.

⁴³ Ja etpu leh imi yin inpadiaig aien, im colt im silver, im lep niji itai upene asega an pece Ijipt: erupu apitac yin a nup u Libya im nup Idiopia.

⁴⁴ Ja etpu ohocred aien vai tas etpu ahes an ridjai o un, im lep an pece inig et ahes narutu iran: ja etpu apan aien an nedemda alupas o un, par auahas um atgei atimi inyi ahinag.

⁴⁵ Etpu imiatidai jai nimnim atimi o un aien an niblan jap ehro an nedoon esjilid et itap; etpu yetpan u unmas o un aien, ja inyi ti tah par atau imi yin.