Taniel 10 - Intas Etipup

Nuarin tas alupas 10.

1 Et wat imiasuol yin a Taniel et ecetai nitai ehvaig aien. 10 Et wat ehioehio inliinmopon aien et ago eropse yin a nagelo.

¹ IS wat atimarid an pece Persia irai mesese is dri a Sairus, eris ehvaig nitai is ethi ehele Taniel, tak idan Beltesasar; is inveijec nitai iyehki, ja inyi eti fi yetpam: is lep ato nitai iyehki aien; um aktaktai upene nitai ehvaig.

² Kis taigtaig ainyak Taniel an nopan iyehki irai wiik is dri asega.

³ Kis eti caig tah nitai caig upene ainyak, is eti yetpam an nipjineucsek nohu itai ka nide vaine, kis lep eti aspi nyak ainyak irai wiik is dri asega.

⁴ An nadiat twente ford an mohoc first, kis amen ainyak u nohmun nofowai alupas, Hitekel marom iyehki;

⁵ kis yaspan ainyak, um ecet natimi is ethi is aso yin ira apelumai yilyil aien, is ahid colt upene u Yufas an wauahid o un:

⁶ is idivaig beril nohun aien, um idivaig nauwainapit nesganimtan, um idivaig incap alahala nesganimtan ero, um idivaig nebras naunau nikman ero im neduon ero, um idivaig inmotjan wai yah et ahinag inmotjan tas o un.

⁷ Kis ecetai nitai ehvaig ainyak Taniel ache: eris idim eti ecetai nitai ehvaig natimi eris amen ehelek ara; eris eucjeucjeucaij alupas ara, um aha par atpuh.

⁸ Kis echim amen ainyak, um almoi nitai ehvaig alupas iyehki, is eti lep eteuc tah nemda unyak: is tup tiih neklim upene unyak, kis tup amah iran ainyak, is eti lep eteuc tah nemda unyak.

⁹ Ja kis atahaijeg inmotjan tas o un ainyak: ja kis wat atahaijeg inmotjan tas o un ainyak, kis umjeg asega ainyak, um atpuse an nobohtan.

¹⁰ Is um atcei pam nyak nikman tah, ja kis par ateuc ainyak an nijin eduok, um aijisji an nakohiaig an nikmak.

¹¹ Is ika ehelek aien, Ak Taniel, na atimi aiek eh merit alupas vai yin, namu ato intas iji ig aiek ek asaig ehelum ainyak, um atidai jai: er idim abrai nyak an nopan inig mika ki apam ehelum ainyak. Is asaig intas iji igki ehelek aien, ja kis aiji ainyak um eucjeucjeucaij.

¹² Is um ika ehelek aien, Namu jim imtitaig aiek, ak Taniel: eris idim atahaijeg niji tas unyum, an nadiat uhup, as ika aiek an aktaktai itai aiek, et lep ohocred inliinmopom aiek an nuhup u Atua unyum, ek idim hame ainyak van tas unyum.

¹³ Ja is atapnes nyak a natimarid an nelcau Persia ira adiat is twente wun: is um apam um atau irak a Maikel, et atimi et ethi irai ilpu atimi alupas esjilid aien; ja kis par amen eahki ainyak ehele ilpu atimarid u nup u Persia.

¹⁴ Im lep inig, ek mun hame ainyak par asuptecnaig ehelum nitai adenaig iji igki etpu yetpam vai nup uran pece unyum ira adiat apitac: eri ehneijid nitai ehvaig etpu idim itu acen.

¹⁵ Is wat asaig intas iji igki ehelek aien, kis yas se ainyak an nobohtan, kis pop ainyak.

¹⁶ Is atcei pam narasi nipjineucsek tah is idivaig natimi aien: kis asalgei nipjineucsek ainyak, um tas, um ika ehelen is aiji an nuhup unyak aien, Ak natimarid unyak, ek ohocred ainyak va nitai ehvaig, et eti lep eteuc tah nemda unyak.

¹⁷ Etpu tas a naheca u natimarid unyak ehele natimarid unyak um uauo? et idim tiih nemda unyak, et idivaig natimi mas ainyak.

¹⁸ Is um lep ham tah um atcei pam nyak is idivaig natimi aien, is ago emda nyak aien,

¹⁹ um ika, Ak natimi inigki eh merit alupas vai euc, namu jim imtitaig aiek: etmu amen ehelum nigpa, namu emda aiek, maiya, namu idim emda aiek. Is wat tas ehelek aien kis emda ainyak, um ika, Namu tas aiek, ak natimarid unyak; na mun idim ago emda nyak aiek.

²⁰ Ja is par ika aien, Na ato nitai inig aiek ek hame ehelum vaig ainyak, ka oʼo? im lep inig, ekpu adumoij ainyak par ati nedoa vai natimarid u nup u Persia: eku wit atga unyak ainyak, etpu hame a natimarid u nup u Crisi.

²¹ Ja ekpu asuptecnaig ehelum ainyak nitai inig er aged an Nitaasviitai inveijec: et lep ti tah par atau irak vai itai iji igki, Maikel ache natimi alupas esjilid unyimia.