Taniel 1 - Intas Etipup

Nuarin tas alupas 1.

1 Eh imiapan Jehoiakim an pece Babelon. 3 Et lucsei Taniel, im Hananaia, im Miseel, im Asaraia a Aspenas. 8 Era ika ara et itap cai ra par hegai itai hegaig u natimarid, era caig nariko ara um umnyi inwai, ja par alupas nohura um eklim upene nesganimtara. 17 Et esjilid narapakau ara.

¹ IS wat atimarid an pece Juta a Jehoiakim an mesese is eseij, is apan an maliyum Jerusalem a Nebukatnesar natimarid an pece Babelon, um ago nedoa vaig.

² Is atcijaig Jehoiakim natimarid an pece Juta ehelen a Natimarid, im lep nahaiji ipjiitai an neom u Atua: is lucsei pan an pece Sainar aien u neom u natmas o un; is lep ikni ipjiitai iji ehki aien anliin neom ikni itai u natmas o un.

³ Is um asaig a natimarid ehele Aspenas natimi esjilid irai ilpu atimi alupas o un, mika yi ahilek hal irai nup Isreel aien, eris ilpu mapoi! natimarid ara, im lep ilpu atimi alupas;

⁴ ilpu takuras marom is ti nitai has ira ra, jam upene nesganimtara, eris lep ato narapakau asega ara, um amarero, eris lep upene ara namen vaig an nimnim u natimarid; va uhpu esege imi ra narapakau im intas u nup u Kaltia.

⁵ Is asaig a natimarid mika eri caig nitai caig u natimarid irai iji adiat, im lep umnyi waina is umnyi aien, um ika eri aminjinai ra an mesese inya eseij, ja eris par amen ara an nuhup u natimarid.

⁶ Eris amen ehele ra sji ehki hal irai nup u Juta, nan, Taniel, im Hananaia, im Miseel, im Asaraia:

⁷ is anvi nidara a natimi esjilid irai ilpu atimi alupas: is anvi nidai Taniel aien par ika Beltesasar; im Hananaia, par ika Setrak; im Miseel, par ika Misak; im Asaraia, par ika Abetneco.

⁸ Ja is ika inliinmopoi Taniel inyi eti auahas yin aien irai itai hegaig u natimarid, im lep waina is umnyi aien: va nitai inigki is ugyi natimi esjilid irai ilpu atimi alupas aien, mika yi jim auahas yin aien.

⁹ Is ika a Atua yi upene um aiyu inliinmopoi natimi esjilid irai ilpu atimi alupas vai Taniel.

¹⁰ Is um tas a natimi esjilid irai ilpu atimi alupas ehele Taniel, um ika, Ek imtitai natimarid ainyak natimi alupas unyak, is asaig nitai caig incamia aien, im nitai umnyi lumamia: el et almoi aien mika et has nesgaiimtamia irai esgaiimtai ilpu takuras era idivaig caua ara; ekpu amen has ainyak vai caua, etpu lep auud yi amud nidjinik a natimarid.

¹¹ Is um tas a Taniel ehele Melsar, natimi iyehki is ati yin a natimi esjilid irai ilpu atimi alupas par aminjinaig Taniel, im Hananaia, im Miseel, im Asaraia,

¹² um ika, Ek ugyi euc ainyak mika an aitgaig ilpu aheca unyum aiek ira adiat inyi ten par ato; erumu lep alaama nohwai itai ara, um alumama inwai.

¹³ Ja uhmu almoi nesgaiimtama an nuhup unyum, im lep nesgaiimtai ilpu takuras era hegaig nitai caig u natimarid ara: namu almoi aiek, ja par ago nedo inigki vai ilpu aheca unyum et upene iram.

¹⁴ Is adai intas ura aien an nitai inigki, um aitgai ra ira adiat is ten par ato.

¹⁵ Is wat ti pan itac nadiat is ten eris ecetai mika, is esjilid neklim upene u nesgaiimtara im lep nupene u nohura irai esgaiimtai ilpu takuras asega eris hegaig nitai caig u natimarid ara.

¹⁶ Is um atipagki nitai caig ura a Melsar, im waina eris ati lumara, um alupai ra nohwai itai.

¹⁷ Is alupai ilpu takuras is for erahki lelra im inliinmopora lah a Atua par ato nesege asega im narapakau: is lep ato niji itai ehvaig asega a Taniel im numjeg ahnag.

¹⁸ Is wat ti pan itac nadiat iji ehki is asaig a natimarid, mika eri imiapan ra ehelen, is imiapan ra an nuhup u Nebukatnesar a natimi esjilid irai ilpu atimi alupas.

¹⁹ Is tas jipe a natimarid im lep ra; eris eti ecet tah ehele ra asega is idivaig Taniel, im Hananaia, im Miseel, im Asaraia: eris idim amen ehele natimarid ara.

²⁰ Is wat ahodai ra a natimarid va narapakau im nato itai asega, is ecetai aien mika eris esjilid acen ara irai ilpu atimi arapakau, im ilpu atimi itap asega an nelcau o un asega.

²¹ Is amen a Taniel um yetpan an mesese uhup u Sairus natimarid.