Taitus 3 - Intas Etipup

Nuarin-tas alupas 3.

¹ AHUGNI lelra aiek, mika eri eccen ara vai ilpu atimarid, im ilpu atimi tas alep, um lep imyiaiji intas o ilpu atimi alupas, um aitgaig par ago nauritai upene asega,

² um eti asan tas has va atimi, um eti ehtauo, jam ago nedo erop, im nedo updak asega va atimi asega.

³ Intis idim ahnag akaija itu acen, um imyipalea, um imyiisjis nahcil, um aheca u inmerit has u inliinmopja im niji itai imyiacitak acheiachei jipe, um ago nedo edemda im nedo auatitai, um acen inliinmopoi atimi vai caija, um amcel jipe vai caija.

⁴ Ja is ehva nedo upene im nedo aiheuc va atimi o un a Atua ineig et imyiatamaig caija aien,

⁵ um imyiatamaig caija an naiheuc o un, jam eti va nedo atoh intis ago akaija, ja is yiri caija aien an lep apos caija, um ago upene caija an Nesgan Upene;

⁶ aien aigki is atladwi alupas iraija aien, irai Iesu Kristo Natimi imyiatamaig caija;

⁷ mika uhpu ika et atoh nedo uja va naiheuc o un, inta lep ilpu hal o un akaija par aitgaig nitai umoh iran ineig inyi ti lep ti.

⁸ Et inivaijec intas ineigki, ek lep merit ainyak mika an asuptecnaig nitai iji eigki aiek irai iji adiat; mika eri aktaktai upene a ilpu atimi asgeig irai Atua par ago nedo upene. Et upene nitai iji eigki va atimi, uhpu leh leh nimtan.

⁹ Jam ude intas vai intakitai, im intas va nidai ilpu retpoija, im nehtauo, im nimyiisjis itai vai intas alep; et maumau nedo ineigki, um ahnag.

¹⁰ Uhpu ehcero ated natimi ineig et atupun nimyiisjis itai aien, ja par atceijai yin;

¹¹ na idim ato aiek mika, et mun adumoij aien, um ago nedo has, et lep ated yin inliinmopon.

¹² EK wit abraig pam Artemas ka Tikikus ehelum ainyak, namu auroauro aiek, um apam ehelek Nikopolis: ek ika ainyak ki amen eahki an mesese ineig.

¹³ Namu emda aiek um ahced Sinas natimi asuptecnaig intas alep, im Apollos, an natga urau, va eru jim ihki natimi arau vaig tah nitai.

¹⁴ Namu lep esege imi ilpu etoaija aiek, mika eri emda ara, um ago nauritai upene par aiheuc va atimi, va erupu ohoai itai ara.

¹⁵ Era aiheuc vai euc natimi asega amen ehelek. Namu aiheuc vai ra aiek et aiyu inliinmopura ara vai cama va nimyiisjis ninivaijec. Uhmu aiheuc vai caua asega. Emen.