Taitus 2 - Intas Etipup

Nuarin-tas alupas 2.

¹ NAMU asuptecnaig nitai iji eigki aiek et upene an nesege inivaijec, nikavaig,

² eri aminjina nedo ura a ilpu fatimi, um ago nedo upene, um aktaktai upene; etmu cehcehe nimyiisjis ninivaijec ura, im naiheuc va atimi ura, im nedo eti auatiemda ura.

³ Et idim lep ucco vai ilpu takata efatimi, erumu lep ago nedo ineigki ara et upene vai ilpu takata alaigaheni, um jim tas has va atimi, um jim umnyi alupas waina, jam esege niji itai upene;

⁴ um lep ated upene ilpu takata takuras, mika yi aiyu inliinmopura ara vai ilpu atamnyura, im lep vai ilpu hal ura,

⁵ um aktaktai upene, um eti ago ingaijid, um aminjinaig upene nimnim ura, um ago nedo upene, um imyiaiji intas o ilpu atamnyura, va uhpu eti asan tas has vai intas o Atua.

⁶ Um lep ated ilpu takuras aiek, mika eri aktaktai upene ara:

⁷ namu itai asjaaicnaig aiek an nedo upene asega: etmu inivaijec nesege unyum, um upene, um emda,

⁸ um asan tas inivaijec ineig, inyi ehka vaig tah nauud yi aijiraig vaig; va erupu ehcamai a ilpu atimi imyiisjis itai, um ti asan tas has vai caua.

⁹ Namu ated ilpu aheca aiek, mika eri imyiaiji intas o ilpu atimi alupas ura ara, um ago nedo ineig et upene vai ra an niji itai asega; um jim imyiisjis itai;

¹⁰ um jim ehneg itai, jam ago nedo inivaijec asega; va uhpu imyiahpas nesege u Atua vai ra an niji itai asega, aien aigki et imyiatamaig caija aien.

¹¹ Is ehcohos pam naiheuc ineig o Atua er imyiatamaig atimi asega vaig,

¹² um esege imi caija, mika ti ude nedo has akaija, im inmerit has u inliinmopja itu, jam aktaktai upene, um ago nedo atoh, im nedo eccen vai Atua, an nobohtan ineigki;

¹³ um eas va nitai upene ineig er idim aitgaig, im nehcohos pam u natimi alupas u Atua esjilid, im Natimi imyiatamaig caija Iesu Kristo;

¹⁴ aien is ahtai yin aien vai caija, mika yi auarimtaija aien va nedo has uja, um ago adicinadicin ilpu atimi esjilid imi yin, um emda u nedo upene.

¹⁵ Namu esege nitai iji eigki aiek, um tas upene ehele atimi, um ated emda ra. Etmu jim amcel vai euc tah natimi.