Taitus 1 - Intas Etipup

Nuarin-tas alupas 1.

¹ AK Taitus, inhal inivaijec unyak an nimyiisjis ninivaijec uja asega, ek aiheuc vai euc ainyak Paulo, naheca u Atua, im napostolo o Iesu Kristo, par asuptecnaig nimyiisjis ninivaijec ehele ra sji ehki is ehtai ra a Atua, mika eri ato upene intas inivaijec ara par ago nedo eccen vai Atua,

² um aitgaig nitai umoh iran ineig inyi ti lep ti, is upyi asaig a Atua ineig et eti ahcil aien, an naopan iyehki is pam eti eteuc nobohtan;

³ ja is ehvaig intas o un aien an naopan o un an nesege ineig eris ati imi nyak, et idivaig intas alep o Atua ineig et imyiatamaig caija aien:

⁴ Etmu amen ehelum, naiheuc, im neti aru, im neigpa, et ahes ehele Atua Etmaija, im Iesu Kristo Natimarid, Natimi imyiatamaig caija.

⁵ VA nitai ineigki kis ude euc Kriti ainyak, mika an ago atoh nitai iji eigki aiek eris eti ago ehni, um ikni ilpu atimi tas alep irai iji uari-pece asega, et idivaig intas neig kis asaig ehelum ainyak:

⁶ el et eteuc tah el eh eti acaiji yin vaig tah nitai, um ethi ache ehgan, um imyiisjis ninivaijec a ilpu hal o un, er eti lep tas va nauatatimi ura, im nedo imyipalea.

⁷ Eris idim ika va natimi aminjina nakalasia, er eti acaiji yin vaig tah nitai, et idivaig naheca u Atua; um eti imyiisjis itai, um eti fi auroauro um atavaitap, um eti umnyi alupas waina, um eti abli atimi, um eti merit alupas vai inpadiaig has vaig;

⁸ jam alaa atimi, um aiyu inliinmopon vai ilpu atimi upene, um ago nedo erop, im nedo atoh, im nedo upene, um ahtapanes inmerit has o un,

⁹ um apol aktit an tas inivaijec, et idivaig eris esege imi yin, va etpu emda aien par ated ilpu atimi imyiisjis itai, um ahidai ra, an nesege inivaijec o un.

¹⁰ Era ahinag a ilpu atimi imyipalea, im ilpu atimi asaig intakitai, im ilpu atimi efaifa; ja era has esjilid ara ilpu atimi eris aperitome ira ra:

¹¹ eris idim ika uhpu auud yi aijiraig intas ura; era imyiahnag atimi asega irai imnim et ahinag ara, um esege nitai iji eigki et eti upene, mika eri leh inpadiaig has vaig.

¹² Is ika natimi is ethi ira ra, is aprofeta ura aien, “Era atimi asan tas ahcil a nupu Kriti irai iji mesese, um atimi esjilid an nauatatimi, um atimi esjum nago itai vaig, jam hag alupas.”

¹³ Et inivaijec intas ineigki. Va nitai ineigki namu ated emda ra aiek, mika eri cehcehe ara an nimyiisjis ninivaijec ura;

¹⁴ um eti imyiaiji intas ecsipece vai intakitai u nupu Jutaia, im intas alep u atimi iji eig era atidjira ara an tas inivaijec.

¹⁵ Et upene niji itai asega imi ilpu atimi upene; ja et eti upene tah nitai imi ilpu atimi auatatimi im ilpu atimi imyiisjis nahcil; et lep has inliinmopura ara im naktaktai ura.

¹⁶ Era ika ara era ato Atua, jam ateri yin an nedo ura; era ilpu atimi auatatimi ara, um ilpu atimi imyipalea, um auatialidi nagovaig tah nauritai upene.