Sekaraia 9 - Intas Etipup

NUARIN TAS ALUPAS 9.

1 Et imiaras nup an nakalasia o un a Atua. 9 Er ahugni nup u Saion mika eri imiacitak va napam u Kristo, im nelcau igpa o un. 12 Et ika a Atua yi aminjinai ilpu atimi o un aien um ika eri esjilid ara.

¹ INTAS is asaig a Ihova van pece u Hetrak nigki; jai inyi atumop irai nup u Tamaskus intas inigki: etu wit yasjipan irai Ihova nesganimtai atimi, im lep ilpu eteuc u nup Isreel asega.

² Etpu lep atumop irai nup u Hemad era ubutpotet iran ara; et alupas narapakau u nup u Tairus im nup u Saiton, ja et lep uce vai ra.

³ Eris actaig neom emda imi ra a nup u Tairus, um asjapicnaig silver et idivaig inmah an nobohtan, im lep colt et idivaig nosal irai efalaig.

⁴ Ja etpu idim ahlo ra a Natimarid, etpu auud naga ura aien mika yi eropse an jap; eri auahas inmaliyum ura an cap.

⁵ Erupu ecetai a nup Askelon, ja par imtitaig; erupu lep ecetai a nup u Cesa, ja par ohocred alupas, im lep nup Ekron; erupu idim ehcamai ara vai ra sji igki eris asgeig ira ra ara; etpu atiih a natimarid u nup u Cesa, etpu eucaeucai inmaliyum Askelon.

⁶ Etpu atimarid u nup Astot a natimi an taka pece, ekpu lep atipagki nitai iji igki ainyak et ijinies inliinmopoi nup u Filistia vaig.

⁷ Ekpu atipagki inja irai itai an nipjineucsen, im lep niji itai o un er amcel vaig ahes an niblan neijin; ja aien inyi eled aien, etpu atimi u Atua uja aien, etpu lep idivaig tah natimi alupas an pece Juta aien, erupu lep idivaig hal nup u Jibus a nup Ekron.

⁸ Ekpu amen aktit ainyak um arehed an neom unyak va nahaijin tak edoa, an napan ura marom, im lep an napam ura: inyi eti lep atga ehele ra tah natimi ehtipidai ra: vaig inig nikavaig, ek alum itai an nesganimtak ainyak.

⁹ Ak nup u Saion, akumu imiacitak alupas aijaua; ak nup u Jerusalem, akumu ahlaig va nimiacitak aijaua: almoi! etpu yetpam a Natimarid unyimia ehelemia: et atoh nedo o un, et lep imiatamaig atimi aien; et upoupo inliiumopon aien, et um ateuc irai togke aien, inhakli togke marom.

¹⁰ Ekpu iknipagki niji jariot u nup Ifreem ainyak, im lep niji hors u nup u Jerusalem, eri iknipagki niji efana uri edoa: etpu asaig intas igpa ehele nup urai iji pece aien: etpu atimarid aien ahes an jap et ethi um yetpan an jap et eche, im lep ahes an nofowai um yetpan irai tid an nobohtan.

¹¹ Im lep inig, intas vai caua nigki, vai inja irai tas etipup unyimia iyehki, ek mun atcijaig ainyak ilpu atimi unyimia eris arore ra, mika eri ahes an nehpanitai et ti inwai iran.

¹² Ak ilpu atimi iji ig eka amen irai eom ipjin aijaua jam asgeig irak, akumu adumoij pam u neom emda aijaua: ek asuptecnaig upene ainyak an nadiat inigki mika, ekpu ecero aru imi caua ainyak;

¹³ ek mun ika ainyak eri idivaig inceen nefana unyak a nup u Juta, ek lep ika ainyak eri idivaig nidjai efana unyak a nup Ifreem, ek mun ago emda ilpu atimi unyimia ainyak, ak nup u Saion, par aat irai ilpu atimi unyimia, ak nup u Crisi, ek mun ika ainyak aki idivaig ilpu atimi emda an nedoa aijaua.

¹⁴ Etpu ehcohos pam a Ihova par atau ira ra, etpu atcijaig in tana o un et idivaig nauwainapit: etpu ahlai toho a Ihova Natimarid, um atga ira arakiraki et ahes u namasacen.

¹⁵ Etpu imicoho ra a Ihova esjilid acen; erupu auahas atimi ara, um auwihise niji hat ira amaka; erupu lep umwig ara, um aunyauwaig et idivaig ilpu atimi umnyi waina; erupu ohua ara um idivaig nipjinitai itap, um idivaig niji esvivaig an natau er ahlap iran.

¹⁶ Etpu imiatamaig ilpu atimi o un a Ihova Atua ura an nopan iyehki et idivaig inpak irai siip o un: erupu idivaig niji hat an cat adgaig u natimarid ara, erupu idivaig ilpu atimi alupas ara an pece o un.

¹⁷ Etpu ika aien yi esjilid namen upene ura! um esjilid neklim upene ura! erupu emda a ilpu takuras vai korn, erupu lep emda a ilpu atahig vai nide vaine.