Sekaraia 8 - Intas Etipup

NUARIN TAS ALUPAS 8.

1 Nehteduo vaig an maliyum Jerusalem. 9 Et ahugni ra aien mika eri actaig, va nedo aiheuc u Atua vai ra. 16 Et ika aien eri ago nedo upene ara, 18 ja erupu imiacitak ara um amen upene.

¹ IS aketo um yetpam ehelek intas o Ihova esjilid acen, um ika,

² Et ika a Ihova esjilid acen; Kis idivaig natimi oporei ainyak vai nup u Saion um atavaitap alupas, kis idivaig natimi oporei ainyak vai ra um edemda alupas.

³ Et ika a Ihova; Ek mun adumoij pam ehele nup u Saion ainyak, ekpu amen ehele nup u Jerusalem ainyak; eri anvi Jerusalem par ika, Inmaliyum u ilpu atimi inveijec; eri lep anvi nedoon u Ihova esjilid acen par ika, Nedoon u ilpu atimi upene.

⁴ Et ika a Ihova esjilid acen; Erupu lep amen irai efalaig Jerusalem a ilpu atamaig im lep ilpu takata, erupu efatimi ara, erupu lep iseuc ara asega va nefatimi ura, athi um athi ehni.

⁵ Erupu ohua a ilpu dualep im ilpu halav atahig irai efalaig an maliyum, um ago nedo imiacitak jipe irai efalaig.

⁶ Et ika a Ihova esjilid acen; El et itai imiali nitai iji igki an nuhup u nahri nup uran pece inigki an nopan inig, ja, et ika a Ihova esjilid acen, el et eti itai imiah an nuhup unyak.

⁷ Et ika a Ihova esjilid acen; Ekpu idim imiatamaig ilpu atimi unyak ainyak irai pece an ridjai o un, im lep irai pece an nete o un;

⁸ ekpu imiapam ra ainyak, erupu amen an maliyum Jerusalem ara: erupu ilpu atimi unyak ara, ekpu Atua ura ainyak, an nedo inveijec im lep an nedo atoh.

⁹ Et ika a Ihova esjilid acen; Etmu emda nikmamia aijaua, eka atahaijeg aijaua an nopan inig intas iji igki irai ipjieucse ilpu profeta, eris asaig intas ara an nopan ati nededuon neom u Ihova esjilid acen, mika eri actaig neom ahlap iran.

¹⁰ Vaig inig nikavaig, an nopan iyehki is ti pan itac is ti nimtan imi atimi, um ti nimtan vai niji itai eklim edo irai pece; is lep ti nigpa vai ra eris apan ara ka vai ra eris apam ara, va nedo o ilpu atimi tak atimi ira ra; kis lep ika ainyak eri edemda jipe natimi asega.

¹¹ Et ika a Ihova esjilid acen; Inki eti ago ainyak irai nahri nup uran pece inigki, et idivaig kis ago ainyak an nopan iyehki.

¹² Etpu idim eteuc iran nohwai itai an nigpa; etpu oho vaine, um ededel itai an nobohtan, etpu ahes an nohatag nopoigmul um asuol iran; ekpu ika ainyak eri ohuun nitai iji igki asega a nahri nup uran pece inigki.

¹³ Im lep inig, eris idim asan tas ahlaijaig vai caua, an namen unyimia ehele nup urai iji pece, ak nup u Juta, im nup Isreel; et idim uco, ekpu imiatamaig caua ainyak, eri lep asan tas acis yi alwai vai caua: jim imtitaig, etmu emda nikmamia aijaua.

¹⁴ Et ika a Ihova esjilid acen; Kis idim aktaktai ainyak par atijai nohocred iramia, eris wat ati nohuun nedemda vai nyak a ilpu retpomia, is eti lep eche naktaktai unyak ainyak:

¹⁵ et idim uco, et ika a Ihova esjilid acen, Ek mun lep aktaktai ainyak an nopan inig par ago nedo upene vai nup u Jerusalem im lep vai nup u Juta: akumu jim imtitaig aijaua.

¹⁶ Akumu ago nedo inigki aijaua; nikavaig, Akumu asaig jipe intas inveijec aijaua asega; um tas alep inveijec um igpa irai uarin tas alep unyimia:

¹⁷ um jim aktaktai an liinmopomia aijaua par aru jipe nedo has unyimia vai caua, athi um athi ehni; um jim merit vai intas yi aktit inig et ahcil: et ika a Ihova, Ek amcel ainyak va nitai iji igki asega.

¹⁸ Is yetpam ehelek intas o Ihova esjilid acen, um ika,

¹⁹ Et ika a Ihova esjilid acen; Erupu imiacitak um cediaig um amen upene a nup u Juta, an nopan atwakam an mohoc ford, im lep an natwakam an mohoc fifd, im lep an natwakam an mohoc sevend, im lep an natwakam an mohoc tend; ja akumu merit aijaua vai intas inveijec im namen upene.

²⁰ Et ika a Ihova esjilid acen; An nopan iyehki erupu apam a nup urai iji pece, im nup urai maliyum inyi ahinag:

²¹ erupu apan a nup uran maliyum et ethi ehele nup uran maliyum et eche, um ika, Ti fi auroauro akaija um apan, um atpuse an nuhupu Ihova; ecrupu lep idim atau aijama um ahilek Ihova esjilid acen.

²² Maiya, erupu ham a nup urai pece inyi ahinag im nup urai pece emda, par ahilek Ihova esjilid acen an maliyum Jerusalem, um atpuse an nuhup u Ihova.

²³ Et ika a Ihova esjilid acen; An nopan iyehki erupu asjiraig natimi inyi ten irai nup urai iji pece asega et acheiachei jipe intas ura, maiya, erupu asjiraig intid an napclumai o un tah nup u Juta ara, um ika, Ecrupu ahced caua aijama, ecra mun atahaijeg aijama mika et amen ehelemia a Atua.