Sekaraia 6 - Intas Etipup

NUARIN TAS ALUPAS 6.

1 Et ahuumtidec aien um ecetai jariot et for. 9 Er asuptecnaig irai cat adgaig esjilid vai Josua neom itap im nelcau u Kristo. Inrancai iyehki.

¹ IS lep aketo ainyak um yasjipan, um almoi, um ecetai jariot is for, is ahes an niblan nedoon is ero; is edoon bras nedoon erahki.

² Eris cap niji hors u jariot uhup; um apig niji hors u jariot sekunt;

³ um ahi niji hors u jariot dirt; um ugnyitugnyit um ilmaicap niji hors u jariot ford.

⁴ Kis tas ainyak ehele nagelo iyehki is tas ehelek aien, um ika, Ak natimi alupas unyak, inhe nitai iji igki?

⁵ Is tas a nagelo iyehki, um ika ehelek, Nesgai itai an nohatag et for ji igki, era aiji ara an nuhup u Natimarid an nobohtan asega ja par yetpam.

⁶ Et yetpan an pece inig et ahes narutu iran jariot inaico et amen niji hors apig iran; et yetpan an nete o un niji hors ahi; ja et yetpan alaig an pece inig et ahes nuritoga iran niji hors ugnyitugnyit.

⁷ Is yetpan niji hors ilmaicap, um ugyi mika eri atga jipe an pece: is ika aien, Apan aijaua, um atga jipe an pece. Eris atga jipe ara an pece.

⁸ Is ahlaig pam vai nyak aien, um tas ehelek, um ika. Almoi sji igki eris yetpan an pece inig et ahes narutu iran ara, era mun ago eropse inliinmopok ara vai inpece iyehki.

⁹ Is yetpam intas o Ihova ehelek, um ika,

¹⁰ N;unu lucsei hal aiek irai ra sji ehki eris lucsei pan ra irai taka pece an nedoa, nikavaig, irai ilpu mapoi Helteai, im ilpu mapoi Tobaija, im ilpu mapoi Jiteya, eris ahes Babelon ara, namu apam aiek an nadiat iyehki, um apan anliin neom u Josaia inhal u Sefanaia;

¹¹ um leh silver im colt, um ago cat adgaig iran, um adgan cat imi Josua inhal u Josetek, natimi esjilid an nahlap;

¹² um tas ehelen, um ika, Et tas a Ihova esjilid acen, um ika, Almoi natimi inig nidan inrancai; etpu edel aien an nohuun cai, etpu lep actaig neom ahlap iran u Ihova aien:

¹³ etpu idim actaig neom ahlap iran u Ihova aien; etpu o un nimiahpas, etpu atimarid aien um ateuc an nitai ateuc iran o un; etpu lep atimi ahlap aien um ateuc au nitai ateuc iran o un: uhpu asan nigpa vai natimarid o un im natimi ahlap o im.

¹⁴ Etmu eteuc incat adgaig iji igki imi Hilem, im Tobaija, im Jiteya, im Hen inhal u Sefanaia, vai nitai imiehva itai vaig anliin neom ahlap iran u Ihova.

¹⁵ Erupu lep ham a ilpu atimi amen itac acen, um actaig an neom ahlap iran u Ihova, ja akupu ato aijaua mika, et mun abraig pam nyak ehelemia a Ihova esjilid acen. Etpu yetpam nitai inigki, el eka atahaijeg upene aijaua intas o Ihova Atua unyimia.