Sekaraia 2 - Intas Etipup

NUARIN TAS ALUPAS 2.

1 Et abraig tah nagelo a Atua mika yi asjaaicnaig inmaliyum Jerusalem, va naktaktai o un vaig. 6 Nimiatamaig u nup u Saion. 10 Intas va namen ehele ra u Atua.

¹ KIS aketo ainyak um yasjipan, um ecet natimi is ethi, is alhe inya asjaaicnaig aien an nikman.

² Kis um ika ainyak, Nalaig eda nigki unyum? Is um ika ehelek aien, Par asjaaicnaig an maliyum Jerusalem, mika eri ato netgeig iran, im lep nopra iran.

³ Is apan a nagelo iyehki is tas ehelek aien, is lep apan a nagelo is eche mika yi aubilid yin,

⁴ um ika ehelen, Namu athut aiek, um tas ehele intakuras inig-ki, um ika, Erupu amen Jerusalem natimi, et idivaig era amen ara irai maliyum iji ig et eti eteuc nathatahau iran, va nahinag u atimi im kurimatau iran:

⁵ vaig inig nikavaig, et ika a Ihova, Ekpu idivaig nathatahau an cap ainyak um arehed ira ra, ekpu idivaig nitai naunau an niblara ainyak.

⁶ Et ika a Ihova, Ak ra sji igki, ak ra sji igki, akumu udei inpece inig aijaua et ahes narutu iran, um athut pam; et ika a Ihova, Kis idim imiterimterim caua ainyak irai uarin pece iji ig et ahes iran niji imtinjap et for.

⁷ Ak nup u Saion, eka amen aijaua ehele nup u Babelon, akumu imiatamaig caua aijaua.

⁸ Et ika a Ihova esjilid acen; Is upyi hup aien um ika yi ati natimi alupas imi caua, ja is par apitac aien um abrai nyak ehele nup urai pece iji ig eris atoraliak itai unyimia ara; et idim inveijec, nikavaig, aien et ego tah nedo has vai caua aien, et ago nedo has aien va nohwanaga apig an nesganimtan.

⁹ Ekpu idim avaktit ra ainyak an nikmak, erupu atoraliak itai ura a ilpu aheca ura: akupu lep ato aijaua mika et mun abraig pam nyak a Ihova esjilid acen.

¹⁰ Ak nup u Saion, akumu acesaces nohranitai aijaua um imiacitak: et ika a Ihova, Ek idim hame ainyak, ekpu amen an niblamia ainyak.

¹¹ Im lep inig, an nadiat iyehki erupu apol irai Ihova a nup urai iji pece inyi ahinag acen, erupu ilpu atimi unvak ara: ekpu amen ainyak an niblamia, ja akupu ato aijaua mika, et mun abraig pam nyak ehelemia a Ihova esjilid acen.

¹² Etpu ohuun nup u Juta a Ihova, erupu amen ara an pece itap, etpu lep imiacitak nup u Jerusalem aien.

¹³ Erumu eucsup an nuhup u Ihova a nup uran nobohtan asega: et mun idim atidai aien an nuarin itap o un.