Sekaraia 14 - Intas Etipup

NUARIN TAS ALUPAS 14.

1 Eh mun auahas ilpu atimi iji ig eris auahas nup u Jerusalem ara. 4 Napam u Kristo, im lep niji itai upene an nelcau o un. 12 Inmas has u ilpu atimi tak atimi irai nup u Jerusalem. 16 Erupu adumoij pam ehele Ihova a ilpu ahrira, 20 etpu itap naga ura.

¹ ETPU idim yetpam nopan u Ihova, eri ahaig naga unyimia an niblan maliyum unyimia.

² Ekpu idim asjapicnaig nup urai iji pece asega ainyak par ati nedoa vai nup u Jerusalem; erupu atoraliak inmaliyum ara, um tup lucsei itai iraili eom, um auahas ilpu takata; erupu arop irai nahaiji atimi an maliyum ara um imiapan ra an taka pece, ja nahaiji atimi et eche erupu eti iknipagki ra an maliyum ara.

³ Ja etpu ehcohos pan a Ihova, um ago nedoa vai nup urai pece iji ehki, et idivaig an nopan iyehki is wat ago nedoa iran aien.

⁴ An nopan iyehki etpu aiji aien ijinies an nedoon Olivet, et eteuc an nahaijin Jerusalem an ridjai o un, eri ahwai nedoon Olivet juju nahaijin an ridjai o un im lep nahaijin an nete o un, etpu eteuc niskanse alupas; etpu apan alaig an pece inig et ahes narutu iran nahaijin nedoon, um apan alaig an pece inig et ahes nuritoga iran nahaijin.

⁵ Akupu ahapan aijaua an niskanse u niji edoon unyak; etpu idim yetpan Esal niskanse u niji edoon: akupu idim ahapan aijaua et idivaig an naha unyimia va nomoi an nopan umoh u Usaia natimarid u nup u Juta: etpu apam a Ihova Atua unyak, im ilpu agelo upene asega ehelum.

⁶ An nopan iyehki inyi ti inlah an nohatag, jam apat asega.

⁷ Ja etpu yetpam tah nadiat inyi ethi ache, et ato vaig a Ihova, inyi ti nadiat iyehki, um ti nepig iyehki, ja etu wit jupura etpu lah.

⁸ An nopan iyehki etpu ahes Jerusalem inwai inig er umumoh vaig, etpu yah pan nahaijin wai an jap an ridjai o un, im lep nahaijin an jap an nete o un: eri ago nitai iji igki an lidija im lep an mesese.

⁹ Etpu atimarid a Ihova an nobohtan asega: an nopan iyehki etpu eteuc a Ihova ache, im lep nidan ache.

¹⁰ Eri ago upene inpece asega mika yi idivaig nuarin marara, ahes Ciba um yetpan Rimon an nahaijin Jerusalem an nuritoga: eri imiaridjai nobohtan iran, erupu amen natimi eahki, ahes an neucse nathatahau u nup u Benjamin um yetpan an nuarin u neucse nathatahau uhup, um yetpan an neucse nathatahau an nesvi va nathatahau, etpu lep ahes an neom ijinies u Hananiil um yetpan irai iji itai ahtaijiraig nohwai vaine u natimarid.

¹¹ Erupu amen iran ara, inyi eti lep eteuc tah intas ahlaijaig; erupu amen a nup u Jerusalem au nigpa.

¹² Nohocred nigki, etpu auud nup urai pece iji igki asega a Ihova vaig, eri ati nedoa vai nup u Jerusalem ara; nikavaig, Etpu erek nohura ara eru wit ijis jipe ara, eri eti fi emehe ara um asjeuc, etpu ame nesgaiimtara anliin nipjihalav an nesgaiimtama, um etjo pagki namara irai ipjieucsera.

¹³ Im lep inig, an nopan iyehki etpu eteuc ira ra nehtauo alupas etpu ahes ehele Ihova; erupu asjiraig jipe nikmara ara, um alcacsei jai jipe nikmara vai ra.

¹⁴ Erupu lep ati nedoa a nup u Juta an maliyum Jerusalem; uhpu asjapicnaig niji padiaig u nup urai iji pece asega marehed mihtag, nikavaig, colt, im silver, im napelumai, inyi ahinag acen.

¹⁵ Etpu idivaig inmas has inigki inmas has iyehki, etpu yetpam vai hors, im myul, im kamela, im togke, im niji itai eklim edo irai pece asega irai imnim iji igki u ilpu eucsupo.

¹⁶ Im lep inig, nedo nigki u nahri ilpu atimi asega irai up urai pece asega, eris hame ara par ago nedoa vai nup u Jerusalem, erupu aridjipam ara irai iji mesese asega par alaigaheni vai Natimarid, Ihova esjilid acen, um ago nakaro irai iyum wudig.

¹⁷ Ja etpu ti incopda vai ra sji igki irai iji pece asega an nobohtan, erupu eti aridjipam Jerusalem ara, um alaigaheni vai Natimarid, Ihova esjilid acen.

¹⁸ Ja el era eti aridjipam a nup Ijipt, um eti hame, et ti incopda inpece ura; etpu eteuc vai ra inmas has iyehki, etpu auahas nup urai pece iji igki a Ihova, era eti aridjipam ara par ago nakaro irai iyum wudig.

¹⁹ Neruvaig vai nup Ijipt nigki, im lep neruvaig vai nup urai iji pece asega, era eti aridjipam ara par ago nakaro irai iyum wudig.

²⁰ An nopan iyehki eri aged intas inigki irai bel u niji hors, nikavaig, NITAI ITAP VAI IHOVA; etpu lep idivaig niji ipji beson u natau niji ipjiuru an neom u Ihova.

²¹ Maiya, etpu itap vai Ihova esjilid acen nipjiuru asega u nup u Jerusalem im lep u nup u Juta: erupu ham ara asega era atgei itai ara uri iji itai ahlap, um leh hal nai ipjiuru, um atho itai iran: im lep inig, an nopan iyehki etpu eti lep amen tah nup u Kenan an neom u Ihova esjilid acen.