Sekaraia 13 - Intas Etipup

NUARIN TAS ALUPAS 13.

1 Nimtanwai par ago adicinadicin nup u Jerusalem, 2 va nedo apat ura, im intas o ilpu profeta efaifa. 7 Inmas u Kristo, im intas va nahaiji atimi.

¹ AN nopan iyehki etpu ehcohos nimtanwai imi ilpu mapoi Tevit, im nup u Jerusalem, va neruvaig ira atimi im nedo has ura.

² Et ika a Ihova esjilid acen; An nopan iyehki ekpu ahni idai niji atmasimai an nobohtan ainyak, eri eti lep imiehva ra: ekpu lep iknipagki ilpu profeta efaifa im ilpu atimi araces an nobohtan ainyak.

³ Va nitai inigki el et ika tah er ahu intas iran, arupu ika ehelen a etman im risin, ohwat atmil o un marom, Napu eti umoh aiek; vaig inig nikavaig, na mun asan tas ahcil aiek va nidai Ihova: etu wit ika aien er ahu intas iran, arupu ahcai yin an mopul a etman im risin, ohwat atmil o un marom.

⁴ An nopan iyehki erupu ehcamai a ilpu profeta, athi um athi ehni, va nitai iji igki eris ehvaig ehele ra, eru wit ika ara er ahu intas ira ra; erupu eti lep aso ra ira apelumai alau irai itai ara par imiahnag atimi vaig:

⁵ erupu ika ara, athi um athi ehni, Ek eti aprofeta ainyak, ek atimi ahapol ainyak; kis auanaheca ainyak an takuras unyak um imihum pam an nopan inig.

⁶ Ja etpu ika ehelen tah, Et echamecha inmocop irai ikmam? Ja etpu ika aien. Kis leh inmocop iji igki ainyak anliin neom u ilpu etwak.

⁷ Et ika a Ihova esjilid acen; Ak nauitoga, aijilahlah aiek va natimi unyak et asgi siip aien, im lep va natimi inig et tup ethi ache pam irak aien: auud natimi asgi siip aiek, ja uhpu imiterimterim siip: ekpu ahidaig nikmak ainyak par imiatamaig niji siip haklin.

⁸ Et ika a Ihova, Uhpu iknipagki nahaijin inyi ero an pece asega, etpu lep emesmas; ja etpu eled um amen iran nahaijin dirt.

⁹ Ekpu imiatga nahaijin dirt an cap ainyak, ekpu ahre nohok ira ra et idivaig er ahre nohok irai silver, ekpu asjaaicnaig ira ra ainyak et idivaig er asjaaicnaig irai colt: erupu arohwai nidak ara, ekpu lep atahaijeg ra ainyak: ekpu ika ainyak, Era ilpu atimi unyak ara: erupu lep ika ara, Et Atua unyima a Ihova.