Sekaraia 12 - Intas Etipup

NUARIN TAS ALUPAS 12.

1 Et idivaig nipjinitai era atga autatautat vaig natimi a nup u Jerusalem, 3 im lep inhat opoc vai ilpu atimi tak atimi ira ra. 6 Erupu esjilid a nup u Juta. 9 Erupu adumoij an liinmopora a nup u Jerusalem.

¹ INTAS inig is asaig a Ihova vai nup Isreel nigki; et ika a Ihova, aien aigki et elgelgei nohatag aien, um ati nededuon nobohtan, et lep ago nesgai atimi anliin aien.

² Ekpu idim ika ainyak yi ipjinitai eri ahnag natimi vaig a nup u Jerusalem vai nup urai pece asega marehed mihtag; erupu idim uco a nup u Juta, uhu wit arehed inmaliyum Jerusalem, um aat iran.

³ An nopan iyehki ekpu ika ainyak eri idivaig inhat opoc a nup u Jerusalem vai nup urai iji elcau: erupu leh inmocop alupas ara sji igki asega eri alcacsei inhat iyehki ara; ja erupu asjapicnaig a nup urai iji pece asega an nobohtan par aat ira ra.

⁴ An nopan iyehki, et ika a Ihova, ekpu auud niji hors asega ainyak mika eri imtitaig alupas, im lep ilpu atimi ateuc ira ra mika eri ahnag ara: ekpu almoi pan nup u Juta ainyak, ja ekpu auud niji hors asega u nup uran pece ainyak mika yi apat nesganimtara.

⁵ Erupu ika a ilpu atimi alupas u nup u Juta an liinmopora, Era emda uja a nup u Jerusalem vai Ihova esjilid acen Atua ura.

⁶ An nopan iyehki ekpu ika ainyak eri idivaig inmun uum an niblan cai, um idivaig incap alahala et cas an niblan nuhud hwiit, a ilpu atimi alupas u nupu Juta; erupu auahas atimi asega ara marehed mihtag, au matara im lep an mauura: erupu lep amen a nup u Jerusalem an maliyum ura, Jerusalem marom.

⁷ Etpu lep upyi hup a Ihova um imiatamaig niji imnim u nup u Juta, va yi jim esjilid nimiahpas vai ilpu mapoi Tevit, im lep nimiahpas vai nup u Jerusalem, irai nimiahpas vai nup u Juta.

⁸ An nopan iyehki etpu imialep nupu Jerusalem a Ihova; im lep inig, aien et auatialidi aien ira ra an nopan iyehki etpu idivaig Tevit aien; erupu idivaig Atua a ilpu mapoi Tevit, um idivaig Nagelo o Ihova an nuhup ura.

⁹ An nopan iyehki ekpu auritai ainyak, mika ki auahas nup urai pece asega, era ham ara par aat irai nup u Jerusalem.

¹⁰ Ekpu atladwi Nesgak ainyak irai ilpu mapoi Tevit, im lep irai nup u Jerusalem, et idivaig nesgai naiheuc im lep nesgai nugyi itai: erupu yasjipam nyak ara eris ahcai nyak ara, erupu imitaig yin ara, et idivaig tah et imitaig inhalav atamaig o un aien et ethi ache aien, um imitaig afakatotau yin, et idivaig tah et imitaig afakatotau inhal o un inmeto.

¹¹ An nopan iyehki inyi alupas nehtigtaig an maliyum Jerusalem, um idivaig nehtigtaig u Hetatrimon an niskanse Meciton.

¹² Erupu ehtigtaig a nup uran pece, erupu echim amen a nup urai iji uari pece asega, athi um athi ehni; erupu echim amen a ilpu mapoi Tevit, erupu lep echim amen a ilpu ehnaa ura; erupu echim amen a ilpu mapoi Nedan, erupu lep echim amen a ilpu ehnaa ura;

¹³ erupu echim amen a ilpu mapoi Livai, erupu lep echim amen a ilpu ehnaa ura; erupu echim amen a ilpu mapoi Simeai, erupu lep echim amen a ilpu ehnaa ura;

¹⁴ erupu echim amen a ilpu eteuc asega et eche, athi um athi ehni; erupu lep echim amen a ilpu ehnaa ura, athi um athi ehni.