Sekaraia 11 - Intas Etipup

NUARIN TAS ALUPAS 11.

1 Nauahas vaig u nup u Jerusalem. 3 Eri aminjinaig ilpu atimi eris ikni ra, er atcijai atimi et eche. 10 Eh asvi niseuc Naiheuc im Niji wau an natcijaig vaig u Kristo. 15 Intas va natimi asgi siip et ahnag.

¹ AK neom itap eris ago an cai Lebanon, asalgei tapnes unyum, mika yi auahas sitar unyum incap.

² Ak niji eijiv, aunyauwaig aijaua, et mun idim eropropse niji sitar; et mun atiih niji cai alupas; ak niji cai alupas an pece Besan, aunyauwaig aijaua; vaig inig nikavaig, et mun eropropse nesei inig is ehka nefalaig yetpan o un.

³ Et eteuc inmotjan naunyauwaig u ilpu atimi asgi siip; et mun idim tiih neklim upene ura: et eteuc inmotjan naunyauwaig u hakli laion; vaig inig nikavaig, et mun tiih neklim upene u Jortan.

⁴ Et ika a Ihova Atua unyak, Namu asgi aiek inpak irai siip uhpu atgei ra;

⁵ era atgei ra a ilpu atimi ohuun ra, ja era ika ara era eti ago nedo has ara vaig: era lep ika a ilpu atimi ahtai ra va mune, athi um athi ehni, Naaurinig vai Ihova; ek ikni itai ainyak: et lep eti aiheuc vai ra tah irai ilpu atimi asgi siip ura.

⁶ Et ika a Ihova, Inki eti lep aiheuc vai nup uran pece inigki ainyak, ekpu idim atcijaig jipe ra ehele ra ainyak, im lep pan ehele natimarid ura: erupu auahas inpece ara, jai inki eti imiatamai ra ainyak vai ikmara.

⁷ Kis asgi ainyak inpak irai siip uhpu atgei ra, inpak irai siip marom is ohocred alupas. Kis leh imi nyak niseuc is ero ainyak; kis anvi nidan is ethi ainyak par ika Naiheuc, jam anvi nidan is eche par ika Niji wau; kis asgi inpak nai siip ainyak.

⁸ Kis iknipagki natimi asgi siip is dri ainyak an mohoc is ethi ache; is ohocred inliinmopok ainyak vai ehtaij, is lep esjum inliinmopoi ehtaij ahtaij vai nyak.

⁹ Va nitai inigki kis ika ainyak, Inki eti aminjinaig caua ainyak: etmu mas nitai inig er ika yi mas; uhmu auahas nitai inig er ika eri auahas; ja erumu caig jipe ra nahrira.

¹⁰ Kis par apitac ainyak um leh niseuc unyak Naiheuc, um asvi, mika ki atcijaig intas etipup unyak iyehki kis asaig ainyak ehele nup urai iji pece asega.

¹¹ Eris idim asvi niseuc iyehki an nadiat iyehki: eris ato upene ara, inpak irai siip marom eris ohocred ara, jam atahaijeg intas unyak, mika is asan tas iyehki a Ihova.

¹² Kis um ika ehele ra ainyak, El et upene iramia, akumu alupai nyak nimtan imi nyak aijaua; ja el et eti upene iramia, jim alupai nyak. Eris asjaaicnaig an nimtan imi nyak ara, nikavaig, nuari silver is dirte.

¹³ Is ika a Ihova ehelek, Ethaig pan nimtan ehele natimi ago ipjiitai an tan apol: nimtan esjilid marom eris ika ara is tau upene irak! Kis um leh nuari silver is dirte ainyak, um erekhaig pan anliin neom u Ihova, ehele natimi ago ipjiitai an tan apol.

¹⁴ Kis par apitac ainyak um asvi niseuc unyak is eche, nidan Niji wau, mika eri ahtakoai jipe inraimu u nup u Juta im nup Isreel.

¹⁵ Is ika a Ihova ehelek, Namu aketo aiek um lucsei imi euc niji itai o un tah natimi asgi siip et eti lelen aien.

¹⁶ Vaig inig nikavaig, etpu ati natimi asgi siip an pece inigki ainyak, inyi eti ateghe ra sji igki aien era emehe ara, inyi eti ahilek vai ra sji igki aien era terimterim ara, inyi eti ago cehcehe ra sji igki aien eris asvi niji eduora, inyi eti alayi ra sji igki aien era tup aiji ara: ja etpu caig siip alupas um upene aien, etpu auoplecoplec nihinagai neduora aien.

¹⁷ Awe, kaiheuc vai natimi asgi siip et takitai aien, um udei inpak irai siip o un! etpu amen nauitoga an nikman, im lep an nesganimtan inmatan; etpu urauo nikman aien, um apat asega nesganimtan inmatan.