Sekaraia 10 - Intas Etipup

NUARIN TAS ALUPAS 10.

1 Eris idim ika eri ahilek Atua natimi, jam eti ahilek ilpu atmas. 5 Is aru irai ilpu atimi o un aien va nedo has ura, et idim uco, etpu imiatamai ra aien um, imiadumoij ra.

¹ AKUMU ugyi Ihova aijaua mika yi ehe an nopan u incopda apitac: etpu ati nauwainapit a Ihova, im lep incopda, alupas, etpu lep alupai ra nefelelicai an pece ura aien, athi um athi ehni.

² Eris idim asaig intakitai a ilpu atmas ura, eris ecetai nitai ahcil a ilpu atimi itap ura, eris asuptecnaig numjeg ahnag ahcil ara; is takitai nedo ura par ago eropse inliinmopoi atimi vaig: va nitai inigki eris atga ura a ilpu retpoija, um idivaig siip, eris lucsei nohocred ara, vaig inig nikavaig, is ti natimi aminjinai ra.

³ Et ika a Ihova esjilid acen; Is eteuc nedemda unyak vai ilpu atimi asgi siip unyak, kis aru nedo o anin atamaig ainyak, ilpu atimi alupas marom: ja ek mun idim ateghe inpak irai siip unyak ainyak, nup u Juta marom, um ika eri idivaig niji hors esjilid ura an nedoa.

⁴ Erupu ahes ehele ra a ilpu atimarid ura, erupu ahes ehele ra a ilpu atimi tas alep, erupu ahes ehele ra a ilpu eucsupo, erupu ehrahes ehele ra a ilpu atimi alupas asega.

⁵ Erupu idivaig ilpu atimi emda ara, erupu auwihise ilpu atimi tak atimi ira ra ara an nosal irai efalaig an nedoa: erupu lep ago nedoa ara, et idim amen ehele ra a Ihova, erupu auoh ehcamai ilpu atimi ateuc irai hors ara.

⁶ Ekpu ago emda nup u Juta ainyak, ekpu imiatamaig ilpu mapoi Josef ainyak, ekpu ika ainyak eri amen aktit ara; ek mun idim aiheuc alupas vai ra ainyak: erupu idivaig atimi iji ig ara kis eti erekhaig pan ra ainyak: ek idim Ihova Atua ura ainyak, ekpu atahaijeg vai ra ainyak.

⁷ Erupu idivaig ilpu atimi emda a nup Ifreem, etpu imiacitak inliinmopora ara et idivaig ilpu atimi umnyi nide vaine: erupu almoi nedo ura a ilpu hal ura, um imiacitak; etpu cediaig inliinmopora ara vai Ihova.

⁸ Ekpu ahlaig vai ra ainyak, um asjapicnai ra; ek mun idim auarimtara ainyak: erupu ahinag ara, et idivaig eris ahinag ara an nopan iyehki.

⁹ Kis idim imiterimterim ra ehele nup urai iji pece ainyak: ja erupu imiehva nyak ara irai iji pece itac acen; erupu umumoh ara um tup ethi ache pan irai ilpu hal ura, erupu lep adumoij pam ara.

¹⁰ Ekpu lep imiadumoij pam ra ainyak ahes an pece Ijipt, ekpu asjapicnaig pam ra ainyak ahes an pece Asiria; ekpu imiapam ra ainyak an pece Cileat im lep an nedoon Lebanon; etpu haklin inpece ura vai ra par amen iran.

¹¹ Etpu atga ijinies an jap a Ihova, um atiakoai injap; etpu auud niji epeau an jap aien; etpu ame niji uarin ubo asega an nofowai: eri imiasuol nemda u nup Asiria, etpu tup tiih pan a natimarid u nup Ijipt.

¹² Et ika a Ihova, Ekpu ago emda ra ainyak vai Ihova, erupu apol upene an nidan ura.