Sekaraia 1 - Intas Etipup

1 Et ahugni atimi a Sekaraia mika eri adumoij an liinmopora ara. 7 Et ah lumtidec aien um ecetai niji hors. 12 Va nalaigaheni u nagelo iyehki er asaig intas upene ehele nup u Jerusalem. 18 Et ecetai nipat et for aien, im ilpu atimi auritai et for.

¹ AN nopan iyehki an mohoc eetd, an mesese sekunt irai Taraius, is yetpam intas o Ihova ehele Sekaraia naprofeta, inhal u Berekaia, is hal u Ito aien, um ika,

² Is alupas nedemda u Ihova vai ilpu retpomia.

³ Et ika a Ihova esjilid acen; Namu tas ehele ra aiek, um ika, Et ika a Ihova esjilid acen; Akumu adumoij pam ehelek aijaua; et lep ika a Ihova esjilid acen, Ekpu adumoij pam ehelemia ainyak.

⁴ Akumu jim idivaig ilpu retpomia aijaua, eris tas emda ehele ra a ilpu profeta eris uhup ara, um ika, Et ika a Ihova esjilid acen; Akumu adumoij aijaua an nopan inig irai efalaig has unyimia, im nauritai has unyimia: ja et ika a Ihova, Eris eti atahaijeg ara, um eti atgeig pam intikgara vai nyak.

⁵ Ilpu retpomia ji yek eda? era idim eti umumoh a ilpu profeta irai iji mesese.

⁶ Is idim uhum pan ilpu retpomia niji tas unyak im niji tas alep unyak, kis asaig ainyak ehele ilpu aheca unyak, ilpu profeta marom; va nitai inigki eris adumoij pam ara, um ika, Is ago iraija a Ihova esjilid acen is idivaig inmerit o un iyehki, is ika aien yi ago vai caija, is idivaig nedo uja, im nauritai uja.

⁷ Im lep inig, an nadiat twente ford an mohoc elevend, inmohoc Sibat marom, an mesese sekunt irai Taraius, is yetpam intas o Ihova ehele Sekaraia naprofeta, inhal u Berekaia, is hal u Ito aien, um ika,

⁸ Kis yaspan ainyak an nepig um ecet natimi is ethi, is ateuc irai hors cap aien, is aiji aien irai iblai cai mat an naiyu; eris um amen an cehen niji hors is cap, im niji hors is ilmaicap, im niji hors is ahi.

⁹ Kis ika ainyak, Ak natimi alupas unyak, inhe nitai iji igki? Is ika a nagelo iyehki is tas ehelek aien, Ekpu asuptecnaig ehelum ainyak va nitai iji igki.

¹⁰ Is tas a natimi iyehki is aiji aien irai iblai cai mat, um ika, is abrai ra sji igki a Ihova mika eri atga jipe an nobohtan ara.

¹¹ Eris tas ara ehele nagelo iyehki u Ihova is aiji aien irai iblai cai mat, um ika, Ecra mun atga jipe an nobohtan aijama, um almoi, mika era tup eklim amen a nup uran nobohtan asega, um atumop.

¹² Is tas a nagelo o Ihova, um ika, Ak Ihova esjilid acen, napu eti aiheuc vai nup u Jerusalem aiek, im nup urai iji maliyum an pece Juta, um yetpan an nahopan, as id im edemda vai ra aiek irai mesese iji igki is sevente?

¹³ Is tas a Ihova ehele nagelo iyehki is tas ehelek aien irai tas upene im lep irai tas ago eropse inliinmopon.

¹⁴ Is ika ehelek a nagelo iyehki is tas ehelek aien, Namu efehtas aiek, um ika, Et ika a Ihova esjilid acen; Ek aktaktai nup u Jerusalem ainyak, um aktaktai alupas nup u Saion.

¹⁵ Ek edemda alupas ainyak vai nup urai pece iji ig era tup eklim amen ara: kis idim edemda tintin ainyak, ja eris ika ara yi alupas nohocred u ilpu atimi unyak.

¹⁶ Va nitai inigki et ika a Ihova; Ek mun lep adumoij pam ehele nup u Jerusalem ainyak par aiheuc vai ra: et ika a Ihova esjilid acen; Eri lep actaig neom unyak iran, uhpu athai inya asjaaicnaig irai Jerusalem.

¹⁷ Namu aketo aiek um efehtas, um ika, Et ika a Ihova esjilid acen; Etpu lep apaahni niji maliyum unyak va niji itai upene iran; etpu lep ago eropse inliinmopoi nup u Saion a Ihova, etpu lep imiacitak nup u Jerusalem aien.

¹⁸ Kis yasjipan ainyak, um almoi nipat is for.

¹⁹ Kis ika ainyak ehele nagelo iyehki is tas ehelek aien, Inhe nitai iji igki? Is ika ehelek aien, Nipat ji igki eris imiterimterim nup u Juta, im nup Isreel, im nup u Jerusalem ara.

²⁰ Is ehvaig ehelek ilpu atimi auritai is for a Ihova.

²¹ Kis um ika ainyak, Era mun ham ara sji igki par ago inhe? Is tas aien, um ika, Nipat ji igki eris imiterimterim nup u Juta ara, mika is eti yasjipan tah natimi: ja era mun ham ara sji igki mika eri imiaha ra ara, um erekhaigse niji ipat u nup urai pece iji ehki, eris imiatidai nipat ura mika eri imiterimterim nup uran pece Juta.