Sefanaia 3 - Intas Etipup

NUARIN TAS ALUPAS 3.

1 Er acaiji emda nup u Jerusalem va nedo has ura et acheiachei. 8 Er ahugni ra mika eri aitgaig va nimiadumoij pam u nup Isreel, 14 um imiacitak va nimiatamai ra u Atua.

¹ KAIHEUC vai nup uran maliyum inig era imipalea ara um has, nup uran maliyum inig marom era ehcerucai atimi iran ara!

² Eris eti atahaijeg intas o Atua ara: eris eti leh upene intas acaiji ra ara; eris eti asgeig irai Ihova ara; eris eti apan ubutpotet ehele Atua ura ara.

³ Era idivaig laion aunyauwaig a ilpu atimi alupas ura era amen ehelen ara; era idivaig kuri aleg irai iji jupura a ilpu atimi tas alep ura; era eti ehtoplecoplec niji eduei itai an nuhialeg.

⁴ Era atimi asaig intas alupas a ilpu profeta ura, era lep asan tas ahcil ara: era auahas niji uarin itap a ilpu atimi ahlap ura, era imipalea intas alep ara.

⁵ Et amen ehele ra a Ihova inig et atoh nedo o un; et eti ago tah nedo acalacal aien: et ika aien yi ehcohos pam irai iji uhialeg nedo atoh o un, et eti atumop aien par auritai; ja era eti ato nehcamai ara sji ig et acalacal nedo ura.

⁶ Et ika a Ihova, Ek mun auahas nup urai iji pece ainyak: et mun ahyuahyu niji imnim ura; ek mun ika ainyak yi eucaeucai niji efalaig irai maliyum ura, et eti atga iran tah: eh mun auahas niji maliyum ura, et ti tah natimi iran, et lep ti tah et amen iran.

⁷ Kis ika ainyak, Akumu idim imtitaig nyak aijaua, um leh upene intas esege imi caua, par eti auahas nuarin inig eka amen iran aijaua, et idivaig intas iyehki kis upyi asig yi aktit vai caua ainyak: ja eris auroauro ara um atidai an nuhialeg, um ika yi has niji auritai asega eris ago ara.

⁸ Im lep inig, et ika a Ihova, Akumu aitgai nyak aijaua um yetpan an nopan iyehki, ekpu atidai ainyak par atoraliak naga ura an nedoa: ek mun idim ika ainyak ki asjapicnaig nup urai iji pece, um ika eri ahtag pam a nup urai iji elcau, mika ki atladwi ira ra nedemda unyak, nedemda alupas asega unyak marom; etpu idim auahas nup uran nobohtan asega incap u intavaitap unyak.

⁹ Im lep inig, an nopan iyehki ekpu ahidan tas upene ainyak ehele nup urai iji pece, mika eri arohwai nidai Ihova ara asega, um auanaheca o un an liinmopora et ethi ache.

¹⁰ Ahes an nahaijin ofowai Idiopia igcapan, erupu imiapam nitai ahlap imi nyak a ilpu atimi ugyi itai unyak, ilpu mapoi nup urau pece unyak marom eris imiterimterim ra,

¹¹ An nopan iyehki akupu eti ehcamai aijaua va niji edo asega unyimia, eka mun imipalea nyak vaig aijaua: an nopan iyehki ekpu idim iknipagki ra sji igki iramia ainyak era imiacitak nedo ijinies ura ara, akupu eti lep ago nedo ijinies aijaua an nedoon itap unyak.

¹² Ekpu udei ehelemia ilpu atimi upoupo inliinmopora im ilpu ihki atimi ainyak, erupu lep asgeig an nidai Ihova ara.

¹³ Erupu eti ago nedo acalacal a ilpu ahri nup Isreel, erupu lep eti asan tas ahcil ara; eri eti ecetai intas efaifa irai ipjieucsera: ja erupu hag ara um asjeuc, inyi ti tah par ika eri imtitaig ara.

¹⁴ Ak nup u Saion, akumu acesaces nohranitai aijaua; ak nup Isreel, akumu ahlaig ijinies aijaua; ak nup u Jerusalem, akumu imiacitak aijaua um cediaig an liinmopomia asega.

¹⁵ Et mun atipagki nimtan nedo has unyimia a Ihova, et mun ahlo ilpu atimi edemda vai caua aien: et amen ehelemia a Natimarid u nup Isreel, Ihova marom: akupu eti lep ecetai tah nohocred aijaua.

¹⁶ An nopan iyehki eri ika ehele nup u Jerusalem, Akumu jim imtitaig aijaua: im lep ehele nup u Saion, Etmu jim auatialidi nikmamia aijaua.

¹⁷ Et amen ehelemia a Ihova Atua unyimia, et emda acen aien: etpu imiatamaig caua aien, etpu imiacitak caua aien um cediaig: etpu aiyu inliinmopon aieu vai caua um eti tas; etpu imiacitak caua aien um acesaces nohranitai.

¹⁸ Ekpu asjapicnai ra sji igki ainyak era ohocred ara va neti asjapicnaig u atimi, eris atimi unyimia ara, et mun ehtipidai ra nehcamai vaig ura.

¹⁹ Im lep inig, an nopan iyehki ekpu atijai nohocred irai ra sji igki asega ainyak era auoh ohocred caua ara: ekpu lep imiatamai ra sji igki ainyak era atga adjo ara, ekpu lep asjapicnai ra sji igki ainyak eris ahlo ra; ekpu lep ika ainyak eri imiahpas ra um anvi nidara irai iji pece asega eris ehcamai ara iran.

²⁰ Et ika a Ihova, An nopan iyehki ekpu imiapam caua ainyak, an nopan asjapicnaig caua unyak marom: maiya, ekpu ika ainyak eri anvi nidamia um lep imiahpas caua ehele nup urai iji pece asega an nobohtan, eku wit imiadumoij pam caua ainyak ahes irai pece iji ig eris lucsei pan caua an nedoa, akupu idim ecetai aijaua.