Sefanaia 2 - Intas Etipup

NUARIN TAS ALUPAS 2.

1 Intas ahugni atimi mika eri adumoij an liinmopora. 4 Neruvaig irai nup u Filistia, 8 im nup u Moab, im nup u Amon, 12 im nup Idiopia, im nup Asiria.

¹ AKUMU asjapicnaig caua aijaua, uhmu asjapicnaig caua, ak nup uran pece inig er eti merit vai caua;

² et wat eti fi ehneijid intas alep, et wat eti apan itac nadiat et idivaig narasi itai, et wat eti fi yetpam ehelemia nedemda alupas u Ihova, et wat eti fi yetpam ehelemia nopan nedemda u Ihova.

³ Akumu ahilek Ihova aijaua asega, et upoupo inliinmopomia aijaua an pece inigki, eka mun imiaiji intas alep o un aijaua; akumu ahilek nedo atoh aijaua, akumu ahilek inliinmopomia upoupo aijaua: kit uhpu adenaig caua an nopan edemda u Ihova.

⁴ Etpu eucaeucai inmaliyum Cesa, etpu umaruma inmaliyum Askelon: erupu ahlo nup Astot an nadiatadiat ara, eri iknipagki ehni nup Ekron.

⁵ Kaiheuc vai nup u Kired, era amen an nelcau u unjap ara! et eteuc intas o Ihova vai caua: ak inpece Kenan, inpece u nup u Filistia, ekpu auahas euc ainyak, inyi eti amen iram tah natimi.

⁶ Etpu lelitai nelcau u unjap, im lep nehpai wai u ilpu atimi asgi siip, im lep nokoro o siip.

⁷ Erupu ohuun inpece iyehki a ilpu ahri nup u Juta; erupu alayi niji itai eklim edo irai pece ura iran ara: erupu asjeuc ara irai iji jupura irai imnim u nup Askelon: etpu idim ateghe ra a Ihova Atua ura, um imiadumoij pam ra sji ig eris lucsei pan ra irai taka pece.

⁸ Ek mun atahaijeg intas auyat u nup u Moab ainyak, im lep intas has u ilpu mapoi Amon, era mun asan tas auyat vai ilpu atimi unyak ara, um asan tas ijinies va atimi iji ig era amen ubutpotet an nahaijin pece ura.

⁹ Va nitai inigki et ika a Ihova esjilid acen, Atua u nup Isreel; Ek idim umoh ainyak, et idim uco, erupu idivaig nup u Sotom a nup u Moab, erupu lep idivaig nup u Comora a ilpu mapoi Amon, etpu uarin amen iran nefelelicai has inpece ura, im nehpai moho an jap, etpu umaruma irai iji mesese: erupu atoraliak itai ura a ilpu ahri nup uran pece unyak, erupu ohuun ra a nahri ilpu atimi unyak.

¹⁰ Etpu yetpam ehele ra nitai inigki va nedo ijinies ura, eris idim asan tas auyat ara vai ilpu atimi u Ihova esjilid acen, um asan tas ijinies vai ra.

¹¹ Eris idim ika eri ecen vai Ihova natimi, jam eti ecen vaig tah irai ilpu atmas asega an nobohtan; etpu ika aien eri atiih a ilpu atmas asega: erupu alaigaheni vai yin a nup urai iji elcau u unjap asega irai iji uarin ura, athi um athi ehni.

¹² Im lep caua, ak nup Idiopia, eri atgei caua an nedoa unyak.

¹³ Etpu atgeig yi apidi nikman aien vai inpece inig et ahes narutu iran, um auahas nup Asiria; etpu lep ika aien yi uarin eucaeucai inmaliyum Ninevi, inuarin pece inig et ti inwai iran um idivaig namasacen.

¹⁴ Erupu asjeuc iran inpak irai siip, im niji obotpot itai eklim edo irai pece asega irai iji pece: erupu umjeg niji man an namasacen irai ili oboatau iran; etpu laav nalidmot irai mai iyum; etpu ahyuahyu neucse eom: etpu ateucrad niji uarin eris ago irai cai sitar.

¹⁵ Nup urai maliyum ji igki era tas alupas ara, eris tup eklim amen ara, eris ika ara an linmopora, Inta eteuc akaija, et lep ti tah, akaija ache: kaiheuc vai ra, eris idim ika yi eucaeucai inmaliyum ura, im nuarin eri atumop iran niji itai aleg! erupu laav natimi asega eri ahtaregdei ra ara, um auhohoig nidjinira.