Sefanaia 1 - Intas Etipup

NUARIN TAS ALUPAS 1.

Neruvaig alupas u Atua irai nup u Juta va nedo has ura et acheiachei.

¹ INTAS o Ihova nigki is yetpam ehele Sefanaia inhal u Kusai, inhal u Cetalaia, inhal u Amaraia, inhal u Hiskaia, an nopan umoh u Josaia inhal u Emon, natimarid an pece Juta.

² Et ika a Ihova, Ekpu idim iknipagki ehni niji itai asega an pece ainyak.

³ Et ika a Ihova, Ekpu iknipagki atimi ainyak im niji itai eklim edo irai pece; ekpu iknipagki inman an nauanohatag ainyak, im lep numu an jap, im nitai iji igki er epihtau vaig, im lep ilpu atimi auatatimi: etpu auahas ehni atimi an pece ainyak.

⁴ Ekpu lep atgeig yi apidi nikmak ainyak vai nup u Juta, im lep vai nup u Jerusalem asega; ekpu lep auahas ainyak nahri itai u Beal an nuarin pece inigki, im lep nidai ilpu atimi iji ig era alaigaheni vai ilpu atmas ara, im lep ilpu atimi ahlap et eche;

⁵ im lep ra sji ig era alaigaheni ara vai niji itai an nohatag an nijintin eom ura; im lep ra sij ig era alaigaheni vai Ihova ara um asig yi aktit intas vai yin, um lep asig yi aktit intas vai Molok;

⁶ im lep ra sji ig era mun udei Ihova ara; era eti ahilek Ihova ara, um eti ahodai yin.

⁷ Namu jim tas aiek an nuhup u Ihova Natimarid: et idim ubutpotet pam nadiat u Ihova: et mun idim ati nitai ahlap a Ihova, et mun ago upene ra sji igki aien et imiacaij ra aien.

⁸ Im lep inig, an nadiat vai nitai ahlap u Ihova, ekpu aru ainyak irai ilpu atimi alupas, im ilpu hal u natimarid, im lep ra asega era aso ra ara ira apelumai u nup urai taka pece.

⁹ Im lep inig, an nadiat iyehki ekpu aru ainyak ira ra asega era eliaujai jipe an nauincai atgeig irai eucse eom ura ara, um ika yi ohua nedo ipjin im nedo efaifa irai imnim u ilpu atimi alupas ura.

¹⁰ Et ika a Ihova. An nadiat iyehki eri ahgei inmotjan nahlaig an neucse nathatahau u mu, im naunyauwaig an nuarin sekunt, im inyah vaig alupas va nauahas itai irai edoon.

¹¹ Akumu aunyauwaig aijaua, ak nup u niskanse iyehki, er idim auahas ilpu atimi auarimtai itai asega; er atgei ra sji igki asega era apos cat silver ara.

¹² Im lep inig, an nopan iyehki ekpu ahilek nedo o nup u Jerusalem ainyak irai cap alahala, ja par aru ira atimi iji ig et ipjin inliinmopora ara um idivaig nohok u waina: era ika ara an liinmopora, Etpu eti aru tah nedo upene uja a Ihova, etpu lep eti aru tah nedo has uja aien.

¹³ Uhpu atoraliak inpadiaig ura an nedoa, etpu ahyuahyu niji imnim ura: eri actai iyum ara, jam eti amen iran; erupu ago ahapol vaine ara, jam eti umnyi nide vaine iran.

¹⁴ Et ubutpotet pam nadiat alupas u Ihova, et idim ubutpotet, um auroauro alupas par yetpam, inmotjan nadiat u Ihova marom: erupu ehtigtaig alupas nan a ilpu atimi emda.

¹⁵ Etpu adiat vai nedemda nadiat iyehki, etpu adiat vai nohocred im namen has, etpu adiat par auahas itai um ehtoplecoplec itai, etpu adiat vai napat im inmehcim, etpu adiat u napat an nohatag im naimoc,

¹⁶ etpu adiat va nahlai intoho im naunyauwaig an nedoa, eri aat irai maliyum et amen nathatahau iran, im lep irai iyum ijinies um emda.

¹⁷ Ekpu atijai nohocred ira atimi ainyak, erupu idim atga ara um idivaig ilpu atimi et apat nesganimtara ara, vaig inig nikavaig, era mun ago nedo has ara vai Ihova: eri atladwi inja ira ra et idivaig inmah an nobohtan, etpu lep idivaig nohok nohura ara.

¹⁸ Etpu auatialidi silver ura im colt ura par imiatamai ra an nadiat u nedemda u Ihova: jai uhpu auahas inpece asega an cap vai intavaitap o un: etpu idim auroauro alupas aien um auahas atimi asega era amen an pece ara.