Saam 99 - Intas Etipup

SAAM 99.

1 Et asuptecnaig nelcau u Atua an nedoon Saion a naprofeta, 5 um ahugni atimi asega, mika eri alaigaheni vai Atua ara an nedoon itap o un, et idivaig nedo o ilpu retpora.

¹ ET atimarid a Ihova; era eucjeucjeucaij a nup urai iji pece: et ateuc juju an niblai jerub erahki aien; et amaamai nobohtan.

² Et esjilid a Ihova an lolan nedoon Saion; et lep esjilid aien irai nup urai iji pece asega.

³ Erupu imiahpas nidam ara et esjilid, er imtitaig vaig; et upene aien.

⁴ Et emda a natimarid, ja et merit va neruvaig atoh va atimi; na mun ika aiek, yi amen aktit nedo atoh; na mun ago nedo atoh aiek im nedo upene vai ilpu mapoi Jekob.

⁵ Akumu imiahpas Ihova Atua uja aijaua, um atpuse u nitai atijai neduon iran; et idim upene aien.

⁶ Erus amen a Moses im Eron ehele ilpu atimi ahlap o un, im lep Samuel ehele ra eris ahlaig va nidan ara; ehtijis ahlaig vai Ihova; ahtaij, is adai intas u ehtaij aien.;

⁷ Is tas ehele ehtaij aien an napat iyehki: ehtijis apos intas asuptecnaig o un ahtaij, im lep intas alep is alupai ehtaij aien.

⁸ Ak Ihova Atua unyima, as adai intas u ehtaij aiek: as Atua eti aru nedo has ura aiek, ja as ago neruvaig nedo has ura aiek.

⁹ Akumu imiahpas Ihova Atua uja aijaua, um atpuse an nedoon itap o un; et idim upene a Ihova Atua uja.