Saam 98 - Intas Etipup

SAAM 98.

1 Et ahugni nup Isreel a naprofeta, 4 im nup urai iji pece, 7 im niji itai asega, mika eri imiahpas Atua ara.

¹ AKUMU acesaces nohranitai vai Ihova aijaua an nohranitai mat; nikavaig, et mun ago niji itai imiali aien: et mun imiatamaig ilpu atimi o un aien an nikman inmatan, nikman upene marom.

² Et mun ehvaig nitai imiatamaig atimi o un a Ihova: et mun asuptecnaig upene nedo atoh o un aien an nuhup u nup urai iji pece.

³ Et mun imiehva naiheuc o un aien im intas inveijec o un vai nup Isreel: eris almoi nitai imiatamaig ilpu atimi u Atua uja a nup uran nobohtan asega.

⁴ Akumu ahlaig vai Ihova aijaua, ak nup uran nobohtan asega: akumu ahlaig ijinies aijaua, um imiacitak, um acesaces nohranitai.

⁵ Akumu acesaces nohranitai vai Ihova aijaua irai harp; irai harp marom, um imiahpas yin an nohramia.

⁶ Akumu imiacitak aijaua an nuhup u Ihova Natimarid an nohran toho, im nohrai nipat.

⁷ Etmu yia injap, im niji itai asega iran; im lep nobohtan, im natimi amen iran.

⁸ Etmu imiacitak niji ofowai: etmu lep ehras cediag niji edoon,

⁹ an nuhup u Ihova; et idim ham aien par tas alep vai nup uran nobohtan: etpu tas alep aien vai nup uran nobohtan an nedo atoh o un, im lep vai nup urai iji pece an nedo inveijec o un.