Saam 96 - Intas Etipup

SAAM 96.

1 Et ahugni atimi a naprofeta par imiahpas Atua, 4 va natimi alupas o un, 8 im nelcau o un, 11 im nadiat almaijidjid o un.

¹ AKUMU acesaces nohranitai vai Ihova aijaua an nohranitai mat: akumu acesaces nohranitai vai Ihova aijaua, ak nup uran nobohtan asega.

² Akumu acesaces nohranitai vai Ihova aijaua, um imiahpas nidan: akumu asuptecnaig aijaua irai iji adiat nitai imiatamaig atimi o un.

³ Akumu asuptecnaig natimi alupas o un aijaua ehele nup urai iji pece, im nedo imiali o un ehele nup urai iji elcau asega.

⁴ Et idim esjilid a Ihova, et upene par imiahpas alupas yin: et lep upene eri imtitai yin, jam jim imtitai tah irai ilpu atmas asega.

⁵ Era idim takitai a ilpu atmas asega u nup urai iji pece: ja is ago nohatag a Ihova.

⁶ Et uhup iran natimi alupas o un: et lep emda aien, um upene an nuarin itap o un.

⁷ Akumu imiahpas Ihova aijaua, ak nup urai iji elcau; akumu imi-ahpas Ihova aijaua, va natimi alupas o un, im nemda o un.

⁸ Akumu imiahpas nidai Ihova aijaua; akumu apos nitai ahlap aijaua, um apam anliin nokoro o un.

⁹ Akumu atpuse an nuhup u Ihova aijaua an nuarin itap o un; akumuimtitai yin aijaua, ak nup uran nobohtan asega.

¹⁰ Akumu asaig aijaua ehele nup urai iji elcau mika, et atimarid a Ihova: etpu lep amen aktit nobohtan um eti amaamai: etpu asuptecnaig nimtan imi nup urai iji pece aieu an nedo atoh o un.

¹¹ Etmu imiacitak nohatag, um lep cediaig nobohtan; etmu yia injap, im niji itai asega et amen iran.

¹² Etmu imiacitak nahapol, im niji itai asega iran: etpu lep cediaig niji cai asega irai ese,

¹³ an nuhup u Ihova: et idim ham aien, et ham aien um asuptecnaig nimtan imi nup uran nobohtan: etpu asuptecnaig nimtan imi nup urai iji pece aien an nedo atoh o un, um lep asuptecnaig nimtan imi nup urai iji elcau an nedo inveijec o un.