Saam 95 - Intas Etipup

SAAM 95.

1 Et ahugni atimi a naprofeta par imiahpas Atua, 3 va natimi alupas o un, 6 im nedo upene o un, 8 um ika, eri jim oop yin.

¹ AKUMU apam aijaua, ti acesaces nohranitai vai Ihova akaija: intumu ahlaig ijinies akaija van hehteuc imiatamaig caija,

² Intumu apan akaija an nuhup o un, um ago naaurinig, um acesaces nohranitai vai yin, um imiacitak.

³ Et idim Atua esjilid a Ihova, et Atimarid esjilid aien: era takitai a ilpu atmas asega.

⁴ Et amen an nikman niji uarin ubo an nobohtan: et lep o un niji lola au ijinies.

⁵ Et o un injap, is idim ago aien: is lep ago nobohtan aien an nikman.

⁶ Akumu apam aijaua, ti apan akaija um alaigaheni vai yin: intumu atpuse an nuhup u Ihova akaija, is ago caija aien.

⁷ Et Atua uja aien; inta idim ilpu atimi o im akaija; et lep alaaija aien et idivaig siip an nikman. El eka atahaijeg intas o un inpig aijaua,

⁸ akumu jim ago ipjin inliinmopomia aijaua, et idivaig nimiisjis ui wai Meriba, um lep idivaig nedo auahas inliinmopon ui wai Masa, an nopan iyehki an namasacen:

⁹ eris wat auahas inliinmopok a ilpu retpomia; eris wat oop nyak ara, um almoi nauritai unyak.

¹⁰ Eris amcel vai nyak natimi an nopan iyehki irai mesese is forte; kis ika ainyak, Et ahnag inliinmopoi natimi iji igki, era lep eti ato nedo unyak ara:

¹¹ kis asig yi aktit intas ehele ra ainyak an tavaitap unyak, um ika, eri jim apan ara an nuarin atumop unyak.