Saam 94 - Intas Etipup

SAAM 94.

1 Et ugyi Atua a naprofeta va neruvaig nedo has u atimi; et asan ehti aien vai ilpu atimi ehcerucai atimi, im ilpu atimi auahas nalaigaheni. 8 Et asuptecnaig nedo o Atua aien. 12 Et tas aien, um ika, era ahesmoig ara sji igki et acaiji ra a Atua. 16 Et imicoho ilpu atimi ohocred a Atua.

¹ AK Ihova, na Atua aru nedo has aiek; ak Atua aru nedo has, etmu ehcohos pam natimi alupas unyum.

² Namu atidai aiek, ak Atua aru irai nup uran nobohtan: namu ati neruvaig aiek vai ilpu atimi et ijinies inliinmopora.

³ Ak Ihova, erupu imiacitak a ilpu atimi auatatimi um yetpan an nahopan? erupu imiacitak a ilpu atimi auatatimi um yetpan an nahopan?

⁴ Erupu amen ara, um asan tas has, um asan tas ijinies; erupu lep imiacitak a ilpu atimi auatatimi asega um yetpan an nahopan?

⁵ Era ehtoplecoplec ilpu atimi unyum ara, ak Ihova, um ehcerucai nup uran pece unyum.

⁶ Era atgei ilpu takata ara eris emesmas a ilpu atamnyura, im nup urai taka pece; era lep atgei ilpu umnij ara.

⁷ Ja era ika ara, Etpu eti ato caija a Ihova, etpu eti aktaktai a Atua u ilpu mapoi Jekob.

⁸ Akumu aktaktai aijaua, ak ilpu atimi et eti eteuc lelmia ira atimi: akupu arapakau aijaua an nahopan, ak ilpu atimi ahnag?

⁹ Et idim ahgei itai aien is ago intikgaija aien; et idim alum itai aien is ago nesganimtama aien.

¹⁰ Etpu idim ated caija aien, et aredei nup urai iji pece aien; et idim ato itai aien et esege imi atimi narapakau aien.

¹¹ Et ato naktaktai u atimi a Ihova, mika et takitai.

¹² Ak Ihova, et mun ahesmoij a natimi inig na ated yiu aiek, um esege imi yin irai tas alep unyum;

¹³ um ika, yi atumop aien va niji adiat ohocred o un, um yetpan an nopan iyehki eri ucji nehpanitai va ilpu atimi auatatimi.

¹⁴ Inyi idim eti atcijaig ilpu atimi o un a Ihova, inyi eti lep udei nup uran pece o un aien.

¹⁵ Uhpu lep ago neruvaig atoh va atimi: erupu lep apitac ara asega et inveijec inliinmopora ara.

¹⁶ Etpu atidai ehelek a di vai ilpu atimi auatatimi? etpu atau irak a di um aat irai ilpu atimi ago nedo has?

¹⁷ El et eti atau imi nyak a Ihova, el ek auroauro ainyak um amen an nuarin u unmas.

¹⁸ El ek wauhieliek ainyak, na asjiraig jai nyak aiek, ak Ihova, an naiheuc unyum.

¹⁹ Et wat ahinag naktaktai u inliinmopok ainyak, et imiacitak inliinmopok ainyak va niji itai eropse nyak unyum.

²⁰ Erupu idim eti ehras amen ehelum a ilpu atimarid iji ig era ehcerucai atimi ara, um tas alep par auahas ra.

²¹ Era telohteloh pan ara ehele ilpu atimi et atoh nedo ura, um ika eri atgei ilpu atimi upene.

²² Ja et imiatamaig nyak a Ihova; et lep imiaras nyak a Atua unyak.

²³ Etpu lep atijai ira ra aien nedo acalacal ura; etpu auahas ra aien an nedo has ura; etpu auahas ra a Ihova Atua uja.