Saam 91 - Intas Etipup

SAAM 91.

1 Intas va namen u ilpu atimi ecen va Atua. 3 Namen upene ura. 9 Nuarin amen iran ura. 11 Ilpu aheca ura. 14 A apa ura, im nitai iji igki asega eh ago vaig.

¹ ET mun ahesmoij aien, et amen aien an nuarin adenaig u Atua esjilid acen; etpu amen aktit aien itlian naiyu o un et emda acen aien.

² Ekpu ika ehele Ihova ainyak, Et uarin adenaig unyak aien, im neom emda unyak, im Atua unyak: ekpu asgeig iran ainyak.

³ Etpu idim imiatamaig euc aien va nopoig u ilpu atimi ahilek man, im lep naktaktai u ilpu atimi auatatimi.

⁴ Etpu aibuthan euc aien an nalau iran; napu atpuh aiek ithan ehpan: inyi itai atapin im nitai ahtaipup unyum intas inveijec o un.

⁵ Napu eti imtitaig aiek nitai er imtitaig vaig an nepig; im lep nidjan nefana er atcijaig an nadiat;

⁶ im lep nemehe has et atga an napat; im lep inmas et auahas atimi an nadiatadiat.

⁷ Erupu eropropse natimi inyi ahinag an nahaijum, im lep natimi inyi ahinag acen au matam; jai inyi eti yetpam iram inmas inigki.

⁸ Napu almoi ache an nesganimtam aiek, um ato nimtan imi ilpu atimi auatatimi.

⁹ Nai idim uarin adenaig unyak aiek, ak Ihova; as lep ika aiek, et uarin amen unyum a Atua ijinies acen.

¹⁰ Inyi eti yetpam iram tah nohocred, inyi eti lep yetpam an nimnim unyum tah nitai auahas atimi.

¹¹ Etpu idim tas alep ehele ilpui agelo o un aien vai euc, mika eri amin jinai euc irai efalaig asega unyum.

¹² Erupu apos jai euc ara irai ikmara, va an jim atgeig yi oplec neduom aiek an hat.

¹³ Napu idim auwihi laion aiek im nimyeuv: napu lep auwihise laion emda im nispeuv.

¹⁴ Et mun idim aiyu inliinmopon aien vai nyak, ekpu imicoho yin ainyak: ekpu imiaridjai yin ainyak; vaig inig nikavaig, et idim ato nidak aien.

¹⁵ Etpu ahlaig vai nyak aien, ekpu lep adai intas o un ainyak: ekpu amen ehelen ainyak an nohocred o un; ekpu imiatamaig yin ainyak, um ika eri ago nedo ecen vai yin.

¹⁶ Ekpu ika ainyak yi ahinag nadiat iran et idivaig inmerit o un; ekpu lep ehvaig ehelen ainyak nitai imiatamaig yin unyak.