Saam 90 - Intas Etipup

SAAM 90.

1 Et asuptecnaig nedo o Atua a Moses. 3 Et asan ehti aien, vaig inig nikavaig, era auatialidi natimi, 7 et aredei ra a Atua, 10 et ipjidipjid namen ura an nobohtan. 12 Et alaigaheni aien mika yi ecetai aien um ato upene nedo aiheuc u Atua.

¹ AK Natimarid, nai uarin amen unyima aiek irai iji mesese asega.

² An nopan iyehki is pam eti eteuc niji edoon, um eti eteuc nobohtan im niji pece, as Atua aiek, ahes irai iji mesese um yetpan irai iji mesese.

³ Nai ika aiek eri lep obohtan natimi; um lep, Akumu adumoij pan iran aijaua, ak ilpu mapoi Atam.

⁴ Et idivaig ianiv, et wat ti pan itac, inmesese et wun dausant an nuhup unyum, um lep idivaig nahaijin et ethi irai ahaiji epig.

⁵ Na ahrei ra aiek et idivaig an wai alupas; era idivaig nopan umjeg u atimi ara, et wat lahlah: era idivaig nefelelicai ara, era idim tiih ara.

⁶ Et ededel an nuhialeg, ja par auroauro um tiih; er ucsei an jupura; et lep imlai.

⁷ Ecra idim emesmas ehni aijama va nedemda unyum; ecra lep ohocred aijama va intavaitap unyum.

⁸ Na mun ikni nedo has unyima aiek an nuhup unyum, im nedo has adenaig unyima au lah an nesganimtam.

⁹ Et idim ti pan itac niji adiat asega irama an tavaitap unyum: er ahni niji mesese irama et idivaig intas iji ig era asaig a ilpu atimi oyag.

¹⁰ Et yetpan irai mesese et sevente niji adiat irama; ja el et yetpan irai mesese et eete va nemda o un tah, et idim ohocred um takitai nemda o un; nikavaig, et auroauro aien um ahau cama, ecra lep ae pan aijama.

¹¹ Et ato nemda u intavaitap unyum a di im nedemda unyum? et idivaig et upene eri imtitai euc.

¹² Namu ika aiek, ecri ato aijama par esvi niji adiat irama; ecrupu leh inliinmopoma arapakau aijama.

¹³ Ak Ihova, namu adumoij pam aiek; napu udei cama aiek um yetpan an nahopan? etmu lep eche inliinmopom aiek vai ilpu aheca unyum.

¹⁴ Namu ika aiek, ecri geije aijama an nuhihialeg va naiheuc unyum; vai ecrupu imiacitak aijama um cediaig irai iji adiat asega.

¹⁵ Namu ika aiek, ecri imiacitak aijama et idivaig nadiat iji ehki as ati nohocred irama aiek, im inmesese iji ehki ecris amen has iran aijama.

¹⁶ Namu ehvaig nauritai unyum aiek ehele ilpu aheca unyum, im natimi alupas unyum ehele ilpu hal ura.

¹⁷ Etmu amen ehelema naiheuc u Ihova Atua unyima: namu lep ago aktit ehelema aiek nauritai irai ikmama; maiya, namu ago aktit nauritai irai ikmama aiek.