Saam 9 - Intas Etipup

SAAM 9.

1 Et imiahpas Atua a Tevit va neruvaig o un irai ilpu atimi auatatimi. 11 Et ahugni atimi aien mika eri imiahpas yin. 13 Et ugyi Atua aien va naiheuc o un mika yi imiahpas yin vaig.

¹ AK Ihova, ekpu naaurinig vai euc ainyak an liinmopok asega; ekpu asuptecnaig niji auritai asega unyum ainyak er imiali vaig.

² Ekpu cediaig vai euc ainyak, um imiacitak: ekpu acesaces nohrai itai ainyak va nidam, ak Atua esjilid acen.

³ Uhu wit imiadumoij pan itac ilpu atimi tak atimi irak, erupu epihtau ara, um emesmas an nuhup unyum.

⁴ Na mun tas alep upene vai nyak aiek va nedo atoh unyak; na mun ateuc aiek an nitai ateuc esjilid unyum, um tas alep atoh.

⁵ Na ated nup urai pece aiek; na mun auahas ilpu atimi auatatimi aiek; na mun ohpodohpod nidara aiek, mika yi tiih irai iji mesese.

⁶ Na mun auahas ehni ilpu atimi tak atimi irak aiek; na mun auahas niji maliyum ura aiek; er eti lep imiehva ra irai iji mesese.

⁷ Ja etpu amen a Ihova irai iji mesese: et mun ati nitai ateuc esjilid o un aien, mika yi tas alep iran.

⁸ Etpu tas alep vai nup uran nobohtan aien an nedo atoh o un; etpu lep tas alep atoh vai nup urai iji pece aien.

⁹ Etpu lep uarin atpuh iran a Ihova, vai ilpu atimi er ehcerucai ra; etpu uarin atpuh iran vai ra aien an nopan ohocred ura.

¹⁰ Erupu asgeig iram ara sji igki era ato nidam ara; nai idim eti udei ra sji igki aiek, ak Ihova, era ahilek euc ara.

¹¹ Akumu acesaces nohraiitai vai Ihova inig aijaua, et amen Saion aien: asuptecnaig niji auritai o un ehele nup urai iji pece.

¹² Etpu imiehva aien, um aru ira atimi, va natgei atmas ura; etpu eti ahnag an nahlaig u ilpu atimi ohocred aien.

¹³ Ak Ihova, namu aiheuc vai nyak aiek; almoi nohocred unyak, ek leh ainyak vai ra era amcel vai nyak ara; kis wat ubutpotet u unmas unyak ainyak, as iminusjai nyak aiek;

¹⁴ mika ki asan tas imiahpas euc asega ainyak irai eucse athatahau an maliyum Saion: ekpu imiacitak ainyak nitai imiatamaig atimi unyum.

¹⁵ Era mun edjo se a nup urai pece auliin nehpanitai inig eris ucji a ra; et lep ecen neduora an nopoig inig eris adenaig ara.

¹⁶ Er ato Ihova va neruvaig inig et ago aien: eh apro ilpu atimi auatatimi ira auritai irai ikmara. Aktaktai aijaua. Sila.

¹⁷ Erupu adumoij a ilpu atimi auatatimi um yetpan an pece has, im lep nup urai iji pece asega iji ig era eti imiehva Atua ara.

¹⁸ Eri idim eti ahnag irai ilpu ihki atimi irai iji adiat: eri eti aitgai itai a ilpu atimi upoupo irai iji mesese, erupu leh ara.

¹⁹ Ak Ihova, namu atidai aiek; erumu jim esjilid natimi: napu asuptecnaig nimtan imi nup mai iji pece an nuhup unyum aiek.

²⁰ Ak Ihova, namu ika aiek eri imtitai euc ara; erumu lep ato a nup urai iji pece mika era tup atimi ache ara. Sila.