Saam 89 - Intas Etipup

SAAM 89.

1 Et imiahpas Atua a Idan vai intas etipup o un, 5 va nemda o un er imiali vaig, 15 va nedo o un par aminjinaig nup an nakalasia o un, 19 va naiheuc o un va nelcau u Tevit. 38 Et asan ehti aien va namen has ura, 46 um imiisjis, um alaigaheni, um asan tas acis yi alwai vai Atua.

¹ EKPU acesaces nohranitai ainyak irai iji mesese va naiheuc o Ihova: ekpu lep asuptecnaig nedo inveijec unyum ainyak an nipjineucsek ehele atimi irai iji opan asega.

² Ek mun idim ika ainyak, Etpu amen aktit naiheuc unyum irai iji mesese: napu ati aktit nedo inveijec unyum aiek et idivaig nohatag.

³ As ika aiek, Ek mun asan tas etipup unyak ainyak ehelen kis ati yin ainyak, ek mun lep asig yi aktit intas unyak ainyak ehele Tevit naheca unyak.

⁴ Ekpu ikni aktit ilpu mapom ainyak irai iji mesese, um ika, yi amen aktit natimi alupas unyum irai iji opan asega. Sila.

⁵ Ak Ihova, er imiahpas nedo imiali unyum an nohatag: im nedo inveijec unyum an nasjapicnaig u ilpu agelo upene.

⁶ Et eti idivaig Ihova tah an nohatag; et lep eti idivaig Ihova tah irai ilpu hal u Atua emda acen.

⁷ Et upene mika eri imtitaig alupas Atua an nasjapicnaig u ilpu agelo upene; et lep upene mika eri ago nedo ecen vai yin ara asega ehelen.

⁸ Ak Ihova Atua esjilid acen, et idivaig euc a di? na emda aiek, ak Ihova, et arehed iram nedo inveijec unyum.

⁹ Et wat alupas injap, nai tas alep vaig aiek: etu wit elgei namilvai, nai ika aiek yi esjaigse.

¹⁰ As auahas nup Ijipt aiek is idivaig hal eris atgei ra; as imiterimterim ilpu atimi tak atimi iram aiek an nikmam emda.

¹¹ Et unyum nohatag, et lep unyum nobohtan: as lep ati aktit nobohtan aiek im niji itai asega et amen iran.

¹² As ago narutu im nuritoga aiek: erau imiacitak nidam nedoon Tebor im nedoon Hermon.

¹³ Et emda nikmam: et idim emda nikmam, et lep esjilid inmatam.

¹⁴ Et eteuc dorona unyum an nedo atoh im neruvaig atoh va atimi: etpu lep uhup iram nedo aiheuc in nedo inveijec.

¹⁵ Era mun ahesmoij natimi iji igki era ato intas upene unyum ara: ak Ihova, erupu atga ara an lah an nesganimtam.

¹⁶ Erupu imiacitak ara va nidam ira adiat asega: erupu lep esjilid ara va nedo atoh unyum.

¹⁷ Na ika aiek era eklim upene ara, um emda: napu aiheuc vai cama aiek, um imiaridjai nemda unyima.

¹⁸ Et idim ahes ehele Ihova nitai ahtaipup unyima; et lep ahes ehele Atua upene u nup Isreel a natimarid unyima.

¹⁹ As tas aiek ehele natimi upene unyum an nahuumtidec vaig o un, um ika, Ek mun ati tah ainyak et emda aien, mika yi atau imi atimi aien; ek mun ato tah et ethi ehele atimi ainyak, um imiaridjai yin.

²⁰ Ek mun ecet Tevit ainyak naheca unyak; ek mun aspi yin ainyak an narakei itap unyak:

²¹ etpu amen aktit ehelen nikmak ainyak: etpu lep emda aien va nikmak.

²² Eri eti imiedohalav yin a ilpu atimi tak atimi iran; eri eti lep auoh ohocred yin a Apu atimi auatatimi.

²³ Ekpu auwihi se ilpu atimi tak atimi iran ainyak au nuhup o un, um auud ra era amcel vai yin ara.

²⁴ Jai ekpu ago nedo inveijec im nedo aiheuc vai yin ainyak: uhpu lep imiaridjai nemda o un va nidak.

²⁵ Ekpu ika ainyak, yi yetpan an jap nikman, im lep inmatan nai ofowai.

²⁶ Etpu ahlaig vai nyak aien, um ika, Nai etmak aiek, Atua unyak, im inhehteuc par imiatamaig nyak.

²⁷ Ekpu ati yin ainyak, mika yi halav meto unyak aien, um esjilid irai ilpu atimirad an nobohtan.

²⁸ Etpu amen irai iji mesese naiheuc unyak vai yin; etpu lep amen aktit ehelen intas etipup unyak.

²⁹ Ekpu ikni aktit ilpu mapon nai iji mesese ainyak, im lep natimi alupas o un et idivaig namen u nohatag.

³⁰ El era udei intas alep unyak a ilpu hal o un, um eti atga an nedo atoh unyak;

³¹ el era auahas intas alep unyak ara, um eti apos intas unyak;

³² ekpu ated ra ainyak va nedo imipalea ura, um aredei ra va nedo has ura.

³³ Jai inki eti atipagki naiheuc unyak ehelen ainyak, inyi eti lep ahcil nedo inveijec unyak.

³⁴ Inki eti auahas intas etipup unyak ainyak, inyi eti lep eche intas is ahes an nipjineucsek.

³⁵ Kis ecethi asan tas aktit ainyak an nedo upene unyak, mika inki eti asan tas ahcil ehele Tevit ainyak.

³⁶ Erupu amen a ilpu mapon irai iji mesese, im lep natimi alupas o un et idivaig nagesega an nuhup unyak.

³⁷ Uhpu ati aktit irai iji mesese et idivaig inmohoc, um lep idivaig nitai inig et asuptecnaig inveijec an nohatag. Sila.

³⁸ Jai na mun atcijaig yin aiek um amcel vai yin, na edemda aiek vai yin as aspi yiu aiek.

³⁹ Na mun eti ehneijid intas etipup unyum aiek ehele naheca unyum: as auahas korona o un an nobohtan aiek.

⁴⁰ Na mun alcapdicraig niji athatahau asega o un aiek; na mun ika aiek yi lep echedeliekse niji eom emda asega o un.

⁴¹ Era atoraliak niji itai o un ara asega era atga an nefalaig ara: era lep imiafakahcil yin a ilpu atimi eblaamnem o un.

⁴² Na mun imiaridjai inmatai ilpu atimi tak atimi iran aiek; na mun ika aiek eri imiacitak a ilpu atimi edemda vai yin.

⁴³ Na lep ahidaig pan neijin nauitoga o un aiek; na eti ika aiek yi aiji aktit aien an nedoa.

⁴⁴ Na mun ika aiek yi tiih natimi alupas o un; na mun ethaigse dorona o un aiek an nobohtan.

⁴⁵ Na mun ika aiek yi ipjidipjid intakuras o un: na mun ataluopni pam yin aiek an nehcamai o im. Sila.

⁴⁶ Ak Ihova, napu adenai euc aiek um yetpan an nahopan? um yetpan irai iji mesese, ka oʼo? etpu ere intavaitap unyum et idivaig incap, um yetpan an nahopan?

⁴⁷ Namu aktaktai aiek mika, et ipjidipjid numoh unyak: et echamecha et takitai nagovaig natimi asega unyum?

⁴⁸ Natimi inig yek eda, etpu umoh aien um eti ato inmas; jam imiatamaig yin va nemda u uma atmas? Sila.

⁴⁹ Ak Natimarid, naiheuc unyum itu acen eda, as upyi asaig aktit ehele Tevit aiek an nedo inveijec unyum?

⁵⁰ Ak Natimarid, namu aktaktai aiek nehcamai u ilpu aheca unyum; nikavaig, ek apos au liinmopok ainyak intas has u nup urai pece asega et ahinag:

⁵¹ va nitai inigki, eris atuh nyak a ilpu atimi tak atimi iram, ak Ihova; va nitai inigki, era mun lep apitac yin ara as ati yin aiek, um atuh yin iran.

⁵² Naaurinig vai Ihova irai iji mesese. Emen, um Emen.