Saam 88 - Intas Etipup

SAAM 88.

Intas alaigaheni, im intas taigtaig alupas.

¹ AK Ihova Atua imiatamaig nyak, kis ahlaig ainyak an nuhup unyum ira adiat im nepig:

² etmu yetpan an nuhup unyum nalaigaheni unyak: namu atgeig pam intikgam u nahlaig unyak aiek;

³ nikavaig, et ohocred alupas inliinmopok ainyak: ek ubutpotet u unmas unyak ainyak.

⁴ Er esvi nyak et tup ethi ache pan ira ra era asuol anliin nehpanitai ara: ek idivaig tah natimi ainyak et ti nemda o un:

⁵ um tup amen ehele ilpu atimi emesmas, ek idivaig ilpu atimi eris atgei ra ainyak, era asjeuc iraili ehpaiitai ara, na eti lep imiehva ra aiek: as lep auahas ra aiek an nikmam.

⁶ As atise nyak aiek anliin nehpanitai ubo acen, im lep au napat, an namilvai ubo.

⁷ Et ehtipidai nyak intavaitap unyum; na ika aiek ki ohocred ainyak va nepeau asega unyum. Sila.

⁸ Na mun ikni ilpu etwak itac acen vai nyak aiek; na mun ati nyak aiek mika eri amcel vai nyak ara: er idim atapnes nyak, et lep ehka vai nyak par alau ijo.

⁹ Et apat nesganimtak ainyak va nohocred unyak. Ak Ihova, ek ahlaig vai euc ainyak irai iji adiat, ek adaigjai nikmak ainyak ehelum.

¹⁰ Napu idim eti ago nedo imiali aiek vai ilpu atimi emesmas: erupu idim eti anusjai a ilpu atimi emesmas, um imiahpas euc. Sila.

¹¹ Uhpu idim eti asuptecnaig nedo aiheuc unyum an nehpanitai; im nedo aiheuc unyum an netheso.

¹² Uhpu idim eti ecetai nedo imiali unyum an napat; im nedo aiheuc unyum an pece er eti imiehva itai iran.

¹³ Ak Ihova, ek mun ahlaig vai euc ainyak; etpu lep aridjai nalaigaheni unyak an nuhup unyum j an nuhialeg.

¹⁴ Ak Ihova, na a uri aiek par atcijaig nyak? na a uri aiek par adenaig nesganimtam vai nyak?

¹⁵ Ek ohocred ainyak, kis lep ubutpotet u unmas unyak ainyak an halav unyak, um imihum pam an nopan inig: ek lucsei nohocred esjilid unyum ainyak um erekinman irak vaig.

¹⁶ Et mun yetpam irak intavaitap esjilid unyum; et mun lep auahas nyak nedo unyum er imtitaig vaig.

¹⁷ Et mun arehed irak et idivaig inwai ira adiat asega; et mun lep ehras atapnes nyak, um arehed mihtag.

¹⁸ Na mun ikni itac acen vai nyak aiek ilpu atimi merit vai nyak, im ilpu apa unyak; era amen an napat a ilpu etwak.