Saam 86 - Intas Etipup

SAAM 86.

1 Et emda a Tevit um ugyi Atua; et idim ato aien mika, et inveijec nalaigaheni o un, 5 et upene um emda a Atua. 11 Et merit aien mika yi lep aiheuc vai yin a Atua et idivaig an nopan iyehki. 14 Et asan ehti aien vai ilpu atimi et ijinies inliinmopora, um ugyi Atua mika yi ehvaig tah nitai asjaaicnaig ehelen an nedo upene o un.

¹ AK Ihova, namu atgeig pam intikgam aiek um atahaijeig intas unyak: ek idim ohocred ainyak um ihkin natimi.

² Namu aminjinaig nesgak aiek; ek atimi upene ainyak: ak Atua unyak, namu imiatamaig naheca unyum aiek, et asgeig iram aien.

³ Ak Natimarid, namu aiheuc vai nyak aiek: ekpu idim ahlaig vai euc ainyak irai iji adiat.

⁴ Namu ika aiek yi imiacitak alupas inliinmopok ainyak et idim aheca unyum: vaig inig nikavaig, ek ika ainyak, ak Natimarid, et merit vai euc inliinmopok.

⁵ Ak Natimarid, na idim upene aiek, um eti fi aru nedo has; et lep esjilid naiheuc unyum vai ra asega era ahlaig vai euc ara.

⁶ Ak Ihova, namu atgeig pam intikgam aiek vai intas alaigaheni unyak; um atahaijeg intas ugyi euc unyak.

⁷ Ekpu ahlaig vai euc ainyak an nopan ohocred unyak: vaig inig nikavaig, napu lep adai intas unyak aiek.

⁸ Ak Natimarid, et eti eteuc tah et idivai euc irai ilpu atmas; et lep eti idivaig niji auritai unyum tah nauritai ura.

⁹ Ak Natimarid, erupu ahtag pam a nup urai iji pece asega as ago ra aiek, um atpuse an nuhup unyum; erupu imiahpas nidam ara.

¹⁰ Nai idim esjilid aiek, um ago niji auritai imiali: na Atua aiek ache.

¹¹ Ak Ihova, namu asjaaicnaig an nefalaig unyum imi nyak aiek; ekpu atga an tas inveijec unyum ainyak: namu ika aiek yi ethi ache inliinmopok ainyak, mika ki imtitaig nidam ainyak.

¹² Ekpu ago naaurinig vai euc ainyak, ak Natimarid Atua unyak, an liinmopok asega: ekpu lep imiahpas nidam ainyak irai iji mesese.

¹³ Et mun esjilid naiheuc unyum vai nyak: na mun imiatamaig nesgak va uma atmas sepagko aiek, va nuarin has ubo acen.

¹⁴ Ak Atua, era mun ehrati nedoa vai nyak a ilpu atimi ijinies inliinmopora ara; era mun lep ehras ahilek nyak a ilpu atimi edemda, mika eri atgei nyak; era mun eti aktaktai euc ara.

¹⁵ Ak Natimarid, na Atua aiheuc va atimi aiek, um eti eriss ira ra, um eti auatiemda nedo unyum: et esjilid naiheuc unyum im nedo inveijec unyum.

¹⁶ Namu ahidaig pam euc ehelek aiek, um aiheuc vai nyak; namu alupai naheca unyum nemda unyum aiek, um imiatamaig inhalav atamaig u naheca atahig unyum.

¹⁷ Namu ago tah nitai asjaaicnaig irak aiek, mika ki amen upene ainyak; erupu almoi a ilpu atimi amcel vai nyak um ehcamai: vaig inig nikavaig, na mun atau imi nyak aiek, ak Ihova, um ago eropse inliinmopok.