Saam 85 - Intas Etipup

SAAM 85.

1 Et imiehva nedo aiheuc o Atua vai yin a naprofeta an nopan iyehki, et ugyi yin aien mika yi aketo aien um aiheuc vai yin. 8 Et ika aien yi aitgai itai iji igki, et idim asgeig ira Atua aien va nedo upene o un.

¹ AK Ihova, is upene inliinmopom aiek vai nup uran pece unyum: as lep imiadumoij pam ilpu mapoi Jekob aiek eris lucsei pan ra.

² As atipagki neruvaig nedo has u ilpu atimi unyum aiek, as adahpoi nedo has asega ura aiek. Sila.

³ As iknipagki nedemda asega unyum aiek: as atidjum aiek vai intavaitap esjilid unyum.

⁴ Ak Atua imiatamaig cama, namu adumoij pam ehelema aiek, etmu lep tiih nedemda unyum vai cama.

⁵ Namu jim edemda vai cama aiek irai iji mesese? etmu jim eteuc nedemda unyum um yetpan irai iji opan asega.

⁶ Ecra merit aijama mika an adumoij aiek, um imiatumumoh cama, um ika eri imiacitak euc a ilpu atimi unyum.

⁷ Ak Ihova, namu ehvaig ehelema naiheuc unyum aiek, napu imiatamaig cama aiek.

⁸ Ekpu atahaijeg ainyak intas inig etpu asaig a Ihova Atua emda acen: etpu idim asan tas igpa aien ehele ilpu atimi o un im lep ehele ilpu atimi upene o un, el era eti adumoij pan u nedo ahnag ara.

⁹ Et ubutpotet aien par imiatamaig ra sji igki ache era imtitai yin ara; va etpu amen natimi alupas o un an pece uja.

¹⁰ Eh mun ehtet naiheuc im intas inveijec o un; eh mun aijumnyi nedo atoh im nigpa o un.

¹¹ Etpu ehcohos pam nedo inveijec ahes an nobohtan; etpu lep yias se pam nedo atoh an nohatag.

¹² Etpu lep alupai caija niji itai upene a Ihova; etpu lep ohwai itai upene irai uari obohtan uja.

¹³ Etpu atga nedo atoh um uhup iran; um asjaaicnaig an nefalaig o un imi caija.