Saam 84 - Intas Etipup

SAAM 84.

1 Et merit alupas a naprofeta mika yi asipiaig niji itai upene u neom itap. 4 Et ika aien era ahesmoij ara era amen iran ara. 8 Et ugyi Atua aien mika yi imiadumoij yin eahki aien.

¹ AK Ihova esjilid acen, ek merit alupas ainyak vai niji uarin amen iran unyum!

² Et merit inliinmopok ainyak par apan an nokoro o Ihova, et idim mas vaig: et ahlaig vai Atua umoh inliinmopok ainyak im lep nohuk.

³ Maiya, et mun ecetai neom imi yin inheleuc, et mun lep ago nasiom imi yin nohopcap mika yi ahad iran; et idim uco, ek ahilek natau unyum ainyak, ak Ihova esjilid acen, Natimarid unyak, im Atua unyak.

⁴ Era mun ahesmoij ara sji igki era amen anliin neom unyum ara: era imiahpas euc ara. Sila.

⁵ Era mun ahesmoij ara sji igki et ahes ehelum nemda ura; era lep merit vai niji efalaig unyum ara.

⁶ Era atga ara an niskanse ehtigtaig, um ago nimtanwai iran; er aso natimi esege irai tas upene.

⁷ Era atga ara, et lep esjilid nemda ura; era ehcohos Saion ara an nuhup u Atua.

⁸ Ak Ihova Atua esjilid acen, namu atahaijeg intas alaigaheni unyak aiek: ak Atua u ilpu mapoi Jekob, namu atgeig pam intikgam aiek vai nyak. Sila.

⁹ Ak Atua imiatamaig cama, namu almoi aiek um aktaktai upe-ne yin as ati yin aiek.

¹⁰ Et idim esjilid nadiat et ethi anliin nokoro unyum ira adiat et ahinag an taka uarin. Ek merit alupas ainyak naiji vaig an neucse neom u Atua unyak, jam eti merit namen vaig irai imnim u ilpu atimi auatatimi.

¹¹ Et idim agesega a Ihova Atua uja im nitai ahtaipup uja: etpu aiheuc vai caija a Ihova, um alupai caija natimi alupas uja: inyi eti imiaaij tah nitai upene aien vai ra sji igki et atoh nedo ura.

¹² Ak Ihova esjilid acen, et mun ahesmoij a natimi inig et asgeig iram aien.