Saam 81 - Intas Etipup

SAAM 81.

1 Et ahugni atimi a Esaf mika eri ecen rai Atua um imiahpas yin. 4 Et ika a Atua, eri ago nedo inigki ara, um imiehva nedo aiheuc o un vai ra. 8 Et ahugni ra a Atua, mika eri imiaiji intas o un, et lep asan ehti aien va nedo imipalea ura, eris auahas ra vaig.

¹ AKUMU acesaces nohranitai ijinies aijaua vai Atua uja et emda aien: etmu lep cediaig nohramia vai Atua u ilpu mapoi Jekob.

² Akumu leh nohranitai aijaua, um atcei timbrel, im harp et upene nohran, im lep saltere.

³ Akumu ahlai intoho aijaua, an mohoc uhup, an nehtele-cin-nayi o un, an nadiat asjapicnaig uja.

⁴ Intas alep vai nup Isreel nigki, im intas is asaig a Atua u ilpu mapoi Jekob.

⁵ Is ati nedo inigki a Atua, mika eri apos a ilpu mapoi Josef, eris wat ahes ara pan an pece Ijipt: eris atahaijeg intas eahki ara eris eti ato ara.

⁶ Kis atipagki nitai ahelwei ainyak an nuhlira: is lep atcijaig naburabura nikmara.

⁷ Akis ahlaig aijaua an nohocred unyimia, kis lep imiatamaig caua ainyak; kis adai intas unyimia ainyak irai uarin adenaig is atciteuc inmunuka iran: kis ahilek inliinmopomia ainyak ui wai Meriba. Sila.

⁸ Akumu atahaijeg aijaua, ak ilpu atimi unvak, ekpu lep asuptecnaig nedo unyimia ainyak: ak nup Isreel, akumu atahaijeg intas unyak aijaua;

⁹ etmu jim amen ehelemia tah natmas; um jim ago nalaigaheni vaig tah natmas u nup urai taka pece.

¹⁰ Ek Ihova ainyak Atua unyimia, kis iknipagki caua ainyak an pece Ijipt: akumu asalgei alupas nipjineucsemia aijaua, ekpu alaamia alupas ainyak.

¹¹ Ja eris eti atahaijeg intas unyak a ilpu atimi unyak; eris lep esjum vai nyak a nup Isreel.

¹² Va nitai inigki, kis atcijai ra ainyak mika eri ago nitai merit u inliinmopora imiisjisitai ara: eris lep ago nedo inig ara eris ispara aktaktai ara.

¹³ El era atahaijeg intas unyak a ilpu atimi unyak, el eris lep ahced nefalaig unyak a nup Isreel;

¹⁴ ekpu auroauro ainyak um imiasuol ilpu atimi tak atimi ira ra, um arahpan vai ra an nikmak, um ahau ilpu atimi edemda vai ra.

¹⁵ Erupu ika a ilpu atimi amcel vai Ihova eri ecen vai ra ara: erupu lep amen ara irai iji mesese.

¹⁶ Ekpu alaa ra hwiit esjilid acen ainyak: um lep ika eri geije ara irai hune ahes irai hehteuc.