Saam 80 - Intas Etipup

SAAM 80.

1 Et imitaig nup an nakalasia a Esaf va namen has ura. 8 Et isjeupigmoig naiheuc itu u Atua neruvaig o un ira ra. 14 Et ugyi Atua aien mika yi imiatamaig ra.

¹ AK Atua aminjinaig nup Isreel um atau irai ilpu mapoi Josef et idivaig inpak irai siip, namu atahaijeg aiek; ak Atua amen juju an niblai ohwat jerub, namu ememina upene aiek.

² Namu ahugni nemda unyum aiek an nuhup u ilpu mapoi Ifreem, im ilpu mapoi Benjamin, im ilpu mapoi Manasi, um apam, um imiatamaig cama.

³ Ak Atua, namu imiadumoij cama aiek, etmu lep ememina nesganimtam aiek; ja uhpu imiatamaig cama.

⁴ Ak Ihova Atua esjilid acen, napu edemda aiek va nalaigaheni u ilpu atimi unyum um yetpan an nahopan?

⁵ Na mun alaara aiek nidiimtara mika yi itai caig incara; na mun lep alumara alupas aiek nidiimtara.

⁶ Na ikni cama aiek mika eri ehtauo sjipe vai cama a ilpu atimi eblaamnem unyima: era lep imiafakahcil cama a ilpu atimi edemda vai cama.

⁷ Ak Atua esjilid acen, namu imiadumoij cama aiek, etmu lep ememina nesganimtam aiek; ja uhpu imiatamaig cama.

⁸ As atipagki vaine an pece Ijipt aiek: as ahlo nup urai iji pece aiek, um ahwaig.

⁹ As auorohos o un aiek, is eucvan, is lep ohua inpece vaig.

¹⁰ Is ataluopni niji edoon naiyu iran, is lep ataluopni niji sitar alupas niji ran.

¹¹ Is atgeig jipe niji ran, um yetpan an jap; is lep ehcohodaig niji ehlan, um yetpan an nofowai.

¹² As a uri aiek par auahas nirahed o un, mika eri aldei nohwan ara asega era atga an nefalaig ara?

¹³ Era auahas iran niji picad aleg et ahes an nese, era lep caig niji itai eklim edo irai pece aleg.

¹⁴ Ak Atua esjilid acen, namu idim adumoij pam aiek: na amen an nohatag aiek, namu ias se pam aiek, um almoi, um ateghe vaine inigki;

¹⁵ um asjiraig aktit vaine inig as ahwaig aiek an matam, um imiaras ilpu hal unyum as aminjinai ra aiek vai euc.

¹⁶ Eris atnamud an cap, um acaldei: as wat ated ra an nesganimtam aiek, eris emesmas ara.

¹⁷ Namu atijai inmatam aiek ijinies an natimi inig et amen an matam aien, inhal u natimi marom as ago emda yin aiek vai euc.

¹⁸ Ecrupu eti udei euc aijama: namu imiatumumoh cama aiek, ecrupu lep ahlaig va nidam aijama.

¹⁹ Ak Ihova Atua esjilid acen, namu imiadumoij cama aiek, etmu upene nesganimtam aiek va cama; ja uhpu imiatamaig cama.