Saam 79 - Intas Etipup

SAAM 79.

1 Et asan ehti a Esaf, vaig inig nikavaig, et umaruma Jerusalem. 8 Et ugyi Atua aien mika yi imiatamai ra aien, 13 um ika eri ago naaurinig vaig.

¹ AK Atua, eris ham a ilpu atimi apat an pece inig na ohuun aiek; eris auahas nimnim itap unyum ara; eris uhpoditai Jerusalem ara.

² Eris ikni nohui ilpu aheca unyum ara eris emesmas ara incai inman an nohatag, im nohui ilpu atimi upene unyum incai niji itai eklim edo irai pece aleg.

³ Eris atgei ra ara; is idivaig inwai inja ira ra Jerusalem um arehed mihtag; is eti eteuc tah par atelmoi ra.

⁴ Era asan tas has vai cama a ilpu atimi eblaamnem unyima, era lep amcel vai cama ara sji igki era arehed irama ara, um imiafakahcil cama.

⁵ Ak Ihova, napu edemda vai cama aiek um yetpan an nohopan? etpu ere intavaitap unyum et idivaig incap irai iji mesese, ka oʼo?

⁶ Namu atladwi intavaitap unyum aiek vai nup urai pece iji ig era eti ato euc ara, im lep vai nup urai elcau iji ig era eti arohwai euc ara.

⁷ Va nedo ura, nikavaig, era mun auahas ehni ilpu mapoi Jekob ara, eris lep ika ara yi umaruma nuarin amen iran ura.

⁸ Namu jim imiehva nedo has u ilpu retpoma vai cama aiek: namu auroauro aiek um ehtet, irama an naiheuc esjilid unyum: ecra idim auatialidi aijama.

⁹ Ak Atua imiatamaig cama, namu atau imi cama aiek va nidam esjilid: um imiatumumoh cama, um ohpodopod nedo has unyima, va nidam.

¹⁰ Era a uri a nup urai iji pece par ika, Atua ura yek eda? erumu ato euc a nup urai iji pece an nuhup unyima, an neruvaig inmas u ilpu aheca unyum iji ig eris atgei ra.

¹¹ Etmu yetpan ehelum intaig u ilpu atimi eris arore ra; namu imiaras ra sji igki aiek eris asan mas ura et idivaig nemda esjilid unyum;

¹² namu eceseven aru aiek an riti ilpu atimi eblaamnem unyima, vai intas has ura eris asaig vai euc ara, ak Natimarid.

¹³ Ecra ika aijama, ilpu atimi unyum, ecrupu ago naaurinig vai euc aijama irai iji mesese: ecra idim ika aijama, inpak irai siip unyum, na alaama aiek, ecrupu imiahpas euc aijama irai iji opan asega.