Saam 78 - Intas Etipup

SAAM 78.

1 Et ahugni atimi a Esaf mika eri ato intas o Atua ara um asuptecnaig ehele atimi. 9 Intas va nedemda u Atua vai ilpu atimi imiisjis nahcil im ilpu atimi imipalea. 67 Is wat atcijaig nup Isreel a Atua, is ikni nup u Juta aien, im nedoon Saion, im lep Tevit, par asjeupigmoig ra.

¹ AK ilpu atimi unyak, akumu atahaijeg intas alep unyak aijaua: akumu atgeig pam intikgamia aijaua u intas an nipjineucsek.

² Ekpu asan tas ecsipece an nipjineucsek ainyak: ekpu asuptecnaig nesgan tas irai tas itu acen ainyak:

³ intis atahaijeg akaija, um ato; eris lep asuptecnaig eheleija a ilpu retpoija.

⁴ Intupu eti adenaig nitai iji igki vai ilpu mapora akaija, jam asuptecnaig ehele atimi an taka opan, nikavaig, nimiahpas vai Ihova, im nemda o un, im nedo imiali is ago aien.

⁵ Is ati intas asuptecnaig o un aien ehele ilpu mapoi Jekob, um ati aktit intas alep o un ehele nup Isreel; is lep asaig intas ehele ilpu retpoija aien, mika eri esege nitai iji igki imi ilpu hal ura ara:

⁶ mika eri ato natimi an taka opan, ilpu hal ura marom eri apos ra; um atidai um asuptecnaig ehele ilpu hal ura:

⁷ va erupu asgeig irai Atua ara, um imiehva niji auritai u Atua, um lep apos intas alep o un:

⁸ um eti idivaig ilpu retpora, eris ilpu atimi atladwi intas o un ara um imipalea; eris ilpu atimi eti yecrei upene inliinmopora ara; is lep eti inveijec inliinmopora ara ehele Atua.

⁹ Eris apos nij va atimi a ilpu mapoi Ifreem, jam aha an nopan ago nedoa.

¹⁰ Eris eti apos intas etipup u Atua ara; eris lep esjum ara par imiaiji intas alep o un;

¹¹ um eti imiehva niji auritai o un, im nedo imiali o un is ehvaig ehele ra aien.

¹² Is ago nedo imiali aien an nuhup u ilpu retpora, an pece Ijipt, an nuarin pece Soan.

¹³ Is atiakoai injap aien, um imiatga ra juju an niblan jap; is ika aien yi aridjai injap et idivaig nedoon ijinies.

¹⁴ Is lep atau ira ra aien an napat ira adiat, im lep an cap alahala irai epig asega.

¹⁵ Is auud inhehteuc aien an namasacen, is lep alumara alupas inwai aien.

¹⁶ Is ika aien yi ahes inwai alupas an hehteuc, um lep ika yi yah inwai et idivaig nofowai.

¹⁷ Ja eris aketo ara um ago nedo has vai yin, um auahas inliinmopoi Atua esjilid acen an namasacen.

¹⁸ Eris oop Atua an liinmopora ara, um ugyi njii itai caig eris ahvig ara.

¹⁹ Eris idim tas vai Atua ara; eris ika ara, Et emda a Atua par ago niji itai hegaig an namasacen, ka oʼo?

²⁰ Is idim auud inhehteuc aien, ja is par ahlau ohua inwai iran, is lep alupas inwai yah; ja eris lep ika ara, Et lep emda aien par alupai caija nitai caig, um ikni ohui iji itai eklim edo irai pece incai ilpu atimi o un, ka oʼo?

²¹ Va nitai inigki, is atahaijeg a Ihova, um edemda alupas: is adnan cap aien vai ilpu mapoi Jekob, is lep yetpam intavaitap o un irai up Isreel;

²² va nedo ura, nikavaig, eris eti imiisjis ninveijec intas o Atua ara, um eti asgeig iran mika yi imiatamaig ra aien.

²³ Is tas aien ehele napat ijinies, is lep asalgei niji tapnes an nohatag aieu;

²⁴ is imiasuol mana ehele ra aien incara, is lep alupai ra korn an nohatag aien.

²⁵ Eris caig nareto o ilpu agelo ara asega, athi um athi ehni: is alupai ra niji itai hegaig aien, eris geije ara um eti atahni.

²⁶ Is ika aien yi ehlehel natoga: is imiapam nuritoga aien an nemda o un.

²⁷ Is lep imiasuol inman ira ra, is idivaig inmah an nobohtan; im inman esjilid, is idivaig nauanahvig an nohmunjap:

²⁸ is ika aien eri asuol an nuarin amen ura, um lep arehed irai iji inmim ura.

²⁹ Eris hag, ara, um geije upene: is alupai ra nitai merit ura aien;

³⁰ eris pam eti udei nitai merit ura ara; ja is wat amen nitai caig ura an nipjineucsera,

³¹ is yetpam ira ra intavaitap u Atua, um auahas ilpu atimi emda ira ra, um auud ilpu takuras esjilid u nup Isreel.

³² Is ago nitai iji igki asega aien, ja eris lep imiisjis ara, um ago nedo has, um eti imiisjis ninveijec intas o un va nedo imiali o un.

³³ Va nitai inigki, is ika aien eri amen ara um auoh takitai irai iji adiat, um lep ika eri imtitaig alupas ara irai iji mesese.

³⁴ Is wat atgei ra aien, eris ahilek yin ara: eris ahidai ra ara um ahodai emda Atua.

³⁵ Eris imiehva ara mika is hehteuc ura a Atua, um lep imiatamaig ra a Atua esjilid acen.

³⁶ Ja eris imiahpas yin ara an tas ura, eris lep asan tas ahcil ehelen ara an nipjineucsera.

³⁷ Is eti amen aktit ehelen inliinmopora ara, eris lep eti inveijec ara u intas etipup o un.

³⁸ Ja is esjilid acen naiheuc o un; is eti imiehva nedo has ura aien, um eti auahas ehni ra: is ecahinag imiadumoij intavaitap o un aien; is eti ika aien yi ehcohos asega nedemda o un.

³⁹ Is aktaktai aien mika eris atimi ache ara; nimtinjap inig et yetpan um lep eti adumoij pam.

⁴⁰ Eris ecahinag imiisjis ehelen ara an namasacen, um auahas inliinmopon an tup auun!

⁴¹ Eris idim adumoij pan itac ara um oop Atua; eris lep asan tas has vai Atua upene u nup Isreel ara.

⁴² Eris eti imiehva nauritai an nikman ara, im lep nadiat iyehki is imiatamai ra aien va nohocred ura.

⁴³ Is ago niji itai asjaaicnaig aien an pece Ijipt, im nedo imiali o un an nuarin pece Soan:

⁴⁴ is ika aien yi ja niji ofowai; is elika vai ra par umnyi inwai yah ura ara.

⁴⁵ Is ikni niji pak irai lag ehele ra aien; eris aces ra ara; im lep nomopmop an wai eris auahas ra ara.

⁴⁶ Is atcijaig nohwai itai ura ehele nimyeuv aien, um lep alupai niji heled niji auritai ura.

⁴⁷ Is auahas vaine ura aien an copda hat, im nauyerop ura an nara.

⁴⁸ Is lep atcijaig kurimatau ura aien ehele incopda hat, im siip ura ui nawainapit.

⁴⁹ Is ika aien yi yetpan ira ra intavaitap esjilid o un, im nedemda, im nehniv, im nohocred, is wat abraig pan ehele ra ilpu aheca auahas itai.

⁵⁰ Is ago nefalaig vai intavaitap o un aien; is eti imiatamai ra aien vai inmas, ja is atcijai ra aien ehele nemehe has esjilid;

⁵¹ is auud ilpu halav inmeto asega aien an pece Ijipt; inmeto an nemda esjilid ura marom, eris amen irai imnim u ilpu mapoi Ham.

⁵² Is iknipagki ilpu atimi o un aien is idivaig siip, um atau ira ra an namasacen is idivaig inpak irai itai eklim edo irai pece auata upene.

⁵³ Is atau upene ira ra aien, eris eti imtitaig ara: ja is ataluopni ilpu atimi tak atimi ira ra injap.

⁵⁴ Is imiapan ra aien an pece itap o un, nedoon inigki marom is leh imi yin aien an matan.

⁵⁵ Is ahlo nup urai iji pece aien an nuhup ura; is asjaaicnaig irai urai obohtan ura aien, mika eri ohuun ara; um ika eri amen a ilpu mapoi Isreel irai imnim u ra sji ehki.

⁵⁶ Ja eris oop Atua esjilid acen ara, um imipalea intas o un, um eti imiaiji niji tas alep o un:

⁵⁷ jam adumoij, um ago nedo efaifa et idivaig ilpu retpora: eris ahidai ra ara et idivaig inceen nefana ahcil.

⁵⁸ Eris ago ara mika yi atavaitap vai ra aien va niji itap ura; um edemda, um idivaig natimi oporei, va niji atmasimai ura.

⁵⁹ Is wat atahaijeg a Atua, is ehniv aien um amcel alupas vai nup Isreel:

⁶⁰ islep udei nimnim o un Sailo aien, im neom atga iyehki is ati ehele atimi aien;

⁶¹ is atcijaig nemda o un aien mika eri imiapan an taka pece, is lep atcijaig natimi alupas o un aien an nikmai ilpu atimi edemda vai ra.

⁶² Is atcijaig ilpu atimi o un aien an nedoa; is lep edemda aien vai ilpu atimi is ikni ra an pece o un aien.

⁶³ Is auahas ilpu takuras ura incap; eris lep eti asa atmehgan ura a ilpu atahig ura.

⁶⁴ Eris atgei ilpu atirai ahlap ura an nedoa; eris lep eti imitaig ra a ilpu ehnaa ura.

⁶⁵ Ja is aiji lahlah a Natimarid, et idivaig tah an numjeg o un, um lep idivaig tah neucsupo emda et ahlaig ijinies aien va waina;

⁶⁶ um auud yi aijiraig ilpu atimi tak atimi iran an cehera: is ika aien eri ehcamai ara irai iji adiat.

⁶⁷ Is esjum aien vai ilpu mapoi Josef, um eti merit vai ilpu mapoi Ifreem:

⁶⁸ ja is ikni ilpu mapoi Juta aien, im nedoon Saion iyehki is merit vaig aien.

⁶⁹ Is ago nuarin itap o un aien is idivaig tah nedoon ijinies, um lep idivaig nobohtan, is ati aktit aien irai iji mesese.

⁷⁰ Is lep ehtai Tevit aien mika yi naheca o un, um atipagki yin irai irahed u siip:

⁷¹ is wat aminjinaig siip aien eris alidai ilpu hal ura ara, is atipagki yin aien par alacai ilpu mapoi Jekob ilpu atimi o un, im lep nup Isreel is ohuun ra aien.

⁷² Et mun aminjinai ra aien an liinmopon inveijec; etpu lep atau ira ra aien an nikman arapakau.