Saam 77 - Intas Etipup

SAAM 77.

1 Et asuptecnaig a Esaf, um ika, is imiisjis emda aien va nauatialidi o un. 10 Is esjilid iran aien, vaig inig nikavaig, is aktaktai aien niji auritai alupas um upene u Atua.

¹ ETPU ahlaig vai Atua ainyak an nohrak, vai Atua marom an nohrak; etpu atahaijeg intas unyak aien.

² Kis ahilek Natimarid ainyak an nopan ohocred unyak: kis adaig jai nikmak ainyak an nepig um eti atumop: is ehka par ago eropse inliinmopok.

³ Ek imiehva Atua ainyak, um tas upoupo: ek aktaktai yin ainyak, ja et ehioehio inliinmopok ainyak. Sila.

⁴ Na mun atapnes numjeg unyak aiek: er auud nyak; et ehka vai nyak intas vaig unyak.

⁵ Kis aktaktai nadiat iji ehki itu acen ainyak, im inmesese iji ehki eris ti pan itac.

⁶ Etpu imiehva nohranitai unyak ainyak an nepig: etpu aktaktai inliinmopok ainyak: et lep ahilek emda nesgak, um ika,

⁷ Etpu atcijaig nyak a Natimarid nai iji opan, um eti lep aiheuc vai nyak irai iji mesese, ka oʼo?

⁸ Et mun ti naiheuc o un um yetpan irai iji mesese, ka oʼo? inyi auatialidi intas upyi asaig o un um yetpan irai iji opan asega, ka oʼo?

⁹ Et mun eti imiehva a Atua par aiheuc vai nyak; et mun atapnes naiheuc o un aien vai intavaitap o un, ka oʼo? Sila.

¹⁰ Kis ika ainyak, Nohocred unyak nigki irai iji mesese, vai inmatai Atua esjilid acen.

¹¹ Ekpu imiehva niji auritai u Ihova ainyak: ekpu idim imiehva nedo imiali unyum ainyak itu acen.

¹² Ekpu lep aktaktai nauritai asega unyum ainyak, um tas an liinmopok va nedo unyum.

¹³ Ak Atua, et upene nedo unyum: et idim eti eteuc tah et esjilid aien um idivaig euc, ak Atua unyima.

¹⁴ Na Atua ago nedo imiali aiek: na mun ehvaig nemda unyum aiek ehele nup uari iji pece.

¹⁵ Na mun imiatamaig ilpu atimi unyum aiek au nikmam, ilpu mapoi Jekob im lep ilpu mapoi Josef. Sila.

¹⁶ Is ecet euc injap, ak Atua, is idim ecet euc injap: is imtitaig euc namilvai: is lep ehioehio intupahuahau.

¹⁷ Is ahes inwai an napat: is eteuc inmotjan an nohatag: is lep ae sjipe nidjan nefana unyum.

¹⁸ Is atciteuc inmunuka unyum an narakiraki: is ememina niji pece an nawainapit: is eucjeujeucaij nobohtan um amaamai.

¹⁹ Is eteuc nefalaig unyum an jap im nuarin atga unyum irai wai alupas, eris lep eti ecetai nugnyan neduom.

²⁰ As atau irai ilpu atimi unyum aiek is idivaig inpak irai siip, irai ikmai Moses im Eron.