Saam 76 - Intas Etipup

SAAM 76.

1 Er asuptecnaig natimi alupas u Atua irai up an nakalasia o un. 11 Er ahugni atimi mika eri alaigaheni vai Atua um ecen vai yin. Imi Natimi inig et esjilid irai ilpu atimi aces ohraiitai aien, irai itai er atcei et eteuc niji ya iran. Saam u Esaf nigki, par imiahpas Atua.

¹ ER ato Atua au pece Juta: et esjilid nidan an pece Isreel.

² Is lep eteuc neom atga o un Selem, im nimnim amen iran o un Saion.

³ Is auahas nidjan nefana cap eahki aien, im nitai ahtaipup, im nauitoga, im nedoa. Sila.

⁴ Ak Atua, et esjilid natimi alupas unyum im naijoran lah unyum irai edoon iji ehki era amen iran a ilpu eucsupo.

⁵ Er atoraliak itai u ilpu atimi emda inliinmopora, era mun umjeg se ara: et eti lep ecetai nikman tah irai ilpu atimi emda asega.

⁶ Ak Atua u Jekob, era idim umjeg se jariot im hors va nated ra unyum.

⁷ Et upene mika eri imtitai euc ache: nau wit edemda aiek, et emda a di par aiji an nuhup unyum?

⁸ Na mun ika aiek eri atahaijeg an nobohtan nated atimi unyum et ahes an nohatag; eris imtitaig a nup urau nobohtan um eklim tup amen;

⁹ is wat atidai a Atua par aru ira atimi, um imiatamaig ilpu atimi upoupo asega an nobohtan. Sila.

¹⁰ Uhpu idim imiahpas euc vai tavaitap u atimi: napu atapnes nahaijin tavaitap ura aiek.

¹¹ Akumu asan tas aktit unyimia aijaua ehele Ihova Atua unyimia, um ehneijid: erumu imiapan niji itai tup ahtai imi yin eris idim ika eri imtitai yin ara asega era arehed iran ara.

¹² Et iknipagki nesgai ilpu atimi alupas aien: et upene mika eri imtitai yin a ilpu atimarid an nobohtan.