Saam 74 - Intas Etipup

SAAM 74.

1 Et asan ehti a naprofeta mika, et umaruma nimnim itap. 10 Et ugyi Atua aien mika yi atau ira ra aien va nemda o un, 18 um imiehva ilpu atimi edemda vai yin, im nedo amcel vaig ura, im lep ilpu hal o un, im intas etipup o un.

¹ AK Atua, na a uri aiek par ahlo pan cama irai iji adiat? et ere intavaitap unyum vai inpak irai siip na aminjinai ra aiek van he?

² Namu imiehva ilpu atimi unyum aiek, as auarimtara aiek itu acen; im natimi iji igki as ikni aiek vai euc, um imiatamai ra; im nedoon Saion inigki as amen iran aiek um itu iram.

³ Namu apam aiek an nuarin inig is umaruma itu acen; eris idim auahas niji itai asega an nuarin itap unyum a ilpu atimi tak atimi iram.

⁴ Era mun aunyauwaig an nasjapicnaig u ilpu atimi unyum a iipu atimi tak atimi iram; era atijai niji itai asjaaicnaig ura ara mika yi itai asjaaicnaig.

⁵ Er ato nedo ura mika, et idivaig tah et alcacsei inpas aien par acaldei nauicai an nese.

⁶ Era idim tup ethi ache ara um auud niji uarin et eteuc nalmui itai iran, irai pas im hamer ura.

⁷ Era mun ahli nuarin itap unyum ara, era mun auahas nuarin is amen nidam iran ara, um alcapdicraig ehni.

⁸ Era mun ika an liinmopora ara, Ti tup ethi ache akaija um auahas ra: era mun ahli niji eom asjapicnaig asega u Atua ara an pece.

⁹ Ecra eti ecetai niji itai asjaaicnaig unyima aijama: et eti lep eteuc tah naprofeta: et lep eti ato tah ehelema nopan inig mika etpu tiih nohocred inigki.

¹⁰ Ak Atua, erupu asan tas has a ilpu atimi edemda vai cama um yetpan an nahopan? erupu amcel vai nidam a ilpu atimi edemda vai cama irai iji mesese, ka oʼo?

¹¹ Na a uri aiek par asvahteuc nikmam et amen um itu iram, inmatam marom? namu atipagki aiek an ritum um atgeig yi apidi um auahas ra.

¹² Is Atimarid unyak a Atua itu acen um imihum pam an nopan inig, um auritai an nijihgan pece par imiatamaig atimi.

¹³ As atiakoai injap aiek an nemda unyum: as ahtagrei nidjini mu alupas aiek an jap.

¹⁴ As ehtoplecoplec nidjini krokotail aiek, um alupai nup an namasacen ra incara.

¹⁵ As atiakoai nimtanwai aiek im nofowai: as ika aiek yi ame niji ofowai alupas.

¹⁶ Et unyum nadiat, et lep unyum nepig: as ago inlah aiek im nagesega.

¹⁷ As asjaaicnaig niji tid au nobohtan asega aiek: as ati inlidija aiek im inmesese.

¹⁸ Ak Ihova, namu imiehva aiek mika, era mun asan tas has a ilpu atimi edemda vai euc, era mun lep amcel vai nidam a ilpu atimi ahnag.

¹⁹ Namu jim atcijaig nalaupa unyum aiek imi ilpu atimi auatatimi: namu jim ahnag irai ilpu atimi ohocred unyum aiek irai iji adiat.

²⁰ Namu aktaktai intas etipup unyum aiek: et idim ohua niji imnim u ilpu atimi auatatimi irai iji uarin apat an nobohtan.

²¹ Erumu jim adumoij um ehcamai a ilpu atimi er ago nedo ipjin vai ra: erumu imiahpas nidam a ilpu atimi ohocred im ilpu ihki atimi.

²² Ak Atua, namu atidai aiek, um imiisjis niji itai unyum: namu imiehva nedo o ilpu atimi ahnag aiek, nikavaig, era asan tas has vai euc ara irai iji adiat.

²³ Namu jim ahnag an nohrai ilpu atimi tak atimi iram aiek: et aridjipam um eti atumop naunyauwaig u ra sji igki era aat iram ara.