Saam 73 - Intas Etipup

SAAM 73.

1 Et auatialidi inliinmopoi naprofeta va noop yin vaig; 2 et asuptecnaig aien, um ika, is auatialidi aien va namen upene u ilpu atimi auatatimi. 13 Eris auahas inliinmopon vaig. 15 Et esjilid iran aien, et wat ato intas anaclelen u Atua aien, mika yi auahas ilpu atimi auatatimi, um imiaras ilpu atimi upene.

¹ ET idim ago nedo upene ache a Atua vai uup Isreel, vai ra sji igki marom et adicinadicin inliinmopora ara.

² Jai kis ubutpotet u nepihtau vaig ainyak; is ubutpotet u inwuhiliek vaig unyak ainyak.

³ Kis idim auatitai ainyak vai ilpu atimi et ijinies inliinmopora, kis wat ecetai namen upene u ilpu atimi auatatimi ainyak.

⁴ Era idim eti ato nohocred ara an mas ura: ja et amen aktit nemda ura.

⁵ Era eti ato nohocred ara, et idivaig tak atimi; et eti erekinman ira ra ara et idivaig tak atimi.

⁶ Va nitai inigki, et anai ra inliinmopora ijinies et idivaig nitaahnaig; er aso ra an nehcerucai atimi ura et idivaig napelumai.

⁷ Et alupas nahpara ara: et idim uco, et ohua naktaktai has an liinmopora.

⁸ Era asan tas auyat ara im intas has: era asan tas ijinies ara, um ika, eri ehcerucai atimi ara.

⁹ Era tas ara et idivaig et ahes an nohatag intas ura; et lep atga jipe intas ura an nobohtan.

¹⁰ Va nitai inigki, et imiadumoij pam igcaki ilpu atimi o un aien: er lep alumara inwai an nohocred alupas.

¹¹ Era ika ara, Et echamecha, et ato nedo inigki a Atua, ka oʼo? et asjaaicnaig nan a Atua esjilid acen, ka oʼo?

¹² Era atimi auatatimi ara sji igki, era amen upene ara an nobohtan; era lep ikni itai alupas ara.

¹³ Et mun takitai ache mika, ek mun ago adicinadicin inliinmopok ainyak, um lep yiri nikmak vai ki jim ago nedo has.

¹⁴ Eris atijai nohocred irak ira adiat asega, eris lep ated nyak irai iji uhialeg.

¹⁵ El ek ika ainyak, Inyi uce intas unyak; ekpu idim auahas inliinmopoi ilpu hal unyum ainyak.

¹⁶ Kis wat aktaktai ainyak, mika ki ato nitai inigki ainyak, kis leh nohocred iran ainyak;

¹⁷ ja ekpu aktaktai nadiat apitac ura ainyak, um yetpan an nopan iyehki, ekpu apan irai uarin itap u Atua ainyak.

¹⁸ Napu idim ikni ra aiek irai iji ualin umlas ache: na mun erekhaig se ra aiek irai uarin auahas ra.

¹⁹ Awe! et auroauro nerekinman ira ra, et idivaig nasvapni nesganimta atimi: era atiih ara; era emesmas ara an nimtitaig ura.

²⁰ Et idivaig et wat aiji lahlah tah va numjeg ahnag o un; et idim uco, ak Natimarid, nau wit aiji aiek, napu amcel vai nalmura aiek.

²¹ Et ohocred inliinmopok ainyak; et lep has naktaktai unyak.

²² Et ti lelek ainyak, um eti ato itai: ek mun idivaig nitai eklim edo irai pece ainyak an nuhup unyum.

²³ Ja ek amen ehelum ainyak irai iji adiat: na mun asjiraig nyak aiek an matam.

²⁴ Napu atau irak aiek an tas unyum, ja par imiapan nyak an nuarin esjilid unyum.

²⁵ Et amen an nohatag a di vai nyak? aiek ache; ek lep eti merit vaig tah an nobohtan ainyak, vai euc ache.

²⁶ Et auatialidi nohuk ainyak im lep inliinmopok: et hehteuc vai inliinmopok a Atua, im nuarin amen upene unyak irai iji mesese.

²⁷ Vaig inig nikavaig, erupu emesmas a ilpu atimi amen itac acen vai euc: na mun auahas ra sji igki asega aiek era udei euc ara um ago nedo apat.

²⁸ Ja et upene vai nyak par apan ubutpotet ehele Atua: ek mun asgeig irai Ihova Natimarid unyak ainyak, mika ki asuptecnaig niji auritai asega unyum ainyak.