Saam 72 - Intas Etipup

SAAM 72.

1 Et alaigaheni vai Solomon a Tevit, um ika et idivaig nelcau u Kristo nelcau u Solomon, an nedo upene o un im natimi alupas o un. 18 Et imiahpas Atua aien.

¹ AK Atua, namu ati intas alep unyum aiek ehele natimarid, im nedo atoh unyum va atimi ehele inhal u natimarid.

² Etpu tas alep aien vai ilpu atimi unyum an nedo atoh o un va atimi, im lep vai ilpu atimi ohocred unyum an nedo upene o un.

³ Erupu amen igpa natimi irai iji au, im lep irai iji edoon va nedo atoh o un.

⁴ Etpu ika aien eri ago nedo atoh vai ilpu atimi ohocred irai ilpu atimi o un; etpu lep imiatamaig ilpu ihki atimi aien; etpu auoh ohocred ilpu atimi ehcerucai ra aien.

⁵ Erupu imtitai euc ara an namen u nagesega im inmohoc, um yetpan irai iji mesese.

⁶ Etpu asuol sepam aien et idivaig incopda irai efelelicai er ucsei: umlep idivaig nisjiisji et mulmul nobohtan vaig.

⁷ Erupu esjilid a ilpu atimi upene an nopan umoh o un; etpu lep eteuc nigpa alupas um yetpan an nopan iyehki etpu tiih inmohoc.

⁸ Etpu atimarid aien ahes an jap um yetpan an jap, etpu lep ahes an nofowai iyehki um yetpan an tid an nobohtan.

⁹ Erupu apakapak an nuhup o un ara sji ehki, era amen an namasacen ara; erupu lep eluun nobohtan a ilpu atimi tak atimi iran.

¹⁰ Erupu imiapan imi yin niji itai tup ahtai a ilpu atimarid Tarsis, im lep nup urai iji pece u unjap: erupu lep ikni niji itai tup ahtai imi yin a ilpu atimarid Siba im lep ilpu atimi alupas Idiopia.

¹¹ Erupu idim atpuse an nuhup o un a ilpu atimarid asega: erupu lep aheca o un a nup urai iji pece asega.

¹² Vaig inig nikavaig, etpu imiatamaig ilpu ihki atimi aien, eru wit ahlaig vai yin ara; im lep ilpu atimi ohocred, etu wit ti tah par atau imi ra.

¹³ Etpu aiheuc vai ilpu atimi ohocred aien im ilpu atimi auatialidi, etpu lep imiatamaig ilpu atimi auatialidi aien.

¹⁴ Etpu imiatamaig ra aien vai ilpu atimi ehcerucai ra, im ilpu atimi atoraliak itai urai etpu ika aien, etmu jim atgei ra tah.

¹⁵ Erupu umumoh ara, um alupai yin colt an pece Siba: erupu lep ago nalaigaheni vai yin ara um eti atumop; erupu imiahpas yin ara irai iji adiat.

¹⁶ El et eteuc korn an nahaijin nikma atimi et ethi an pece ijinies irai lolo au; etpu alupas nohwan et idivaig Lebanon: erupu lep umumoh upene a nup an maliyum, et idivaig nefelelicai an nobohtan.

¹⁷ Etpu amen nidan irai iji mesese: etpu amen aktit nidan an na-men u nagesega: erupu amen upene natimi vai yin: erupu ika a nup urai iji pece asega, et mun ahesmoij aien.

¹⁸ Naaurinig vai Ihova Atua, Atua u nup Isreel marom, et ago niji itai imiali aien ache.

¹⁹ Uhmu imiahpas nidan esjilid irai iji mesese: uhmu imiahpas alupas nidan an nobohtan asega; Emen, um Emen.

²⁰ Et mun ehneijid intas alaigaheni u Tevit inhal u Jese.