Saam 71 - Intas Etipup

SAAM 71.

1 Et ika a Tevit et asgeig ira Atua aien, um ato nedo o un: et ugyi Atua aien, mika yi aiheuc vai yin aien, um aat irai ilpu atimi tak atimi iran. 14 Et ika aien, etpu amen aktit aien. 17 Et ugyi Atua aien mika yi imiisjis ninveijec aien. 19 Et imiahpas Atua aien, um ika, yi ago nedo inigki an liinmopon aien.

¹ AK Ihova, ek mun asgeig iram ainyak: ekmu jim ehcamai ainyak um yetpan irai iji mesese.

² Napu ahiyi nyak aiek an nedo atoh unyum, um imicoho nyak: namu atgeig pam intikgam aiek ehelek, um imiatamaig nyak.

³ Namu hehteuc amen iran unyak aiek, ekpu apan o un ainyak irai iji adiat: as asaig aiek mika uhpu imiatamaig nyak; na hehteuc unyak aiek im neom emda unyak.

⁴ Ak Atua unyak, namu imicoho nyak aiek vai nikmai ilpu atimi auatatimi, nikmai ilpu atimi iji ig, era ago nedo ipjim ara im nedo acalacal.

⁵ Ak Ihova Natimarid unyak, ek idim aitgai euc ainyak: kis idim asgeig iram ainyak an nadualep unvak um imihum pam an nopan inig.

⁶ As aminjinaig nyak aiek an nopan iyehki eris apos nyak, um imihum pam an nopan inig: as atipagki nyak aiek an nipjinetgai risik: ekpu imiahpas euc ainyak irai iji mesese.

⁷ Era mun imiali nyak natimi et ahinag; ja na uarin atpuh iran emda unyak aiek.

⁸ Etpu ohua nimiahpas euc an nipjineucsck, im natimi alupas unyum an nadiat asega.

⁹ Namu jim atcijai nyak aiek an nefatimi unyak; namu jim udei nyak aiek an nauatialidi unyak.

¹⁰ Era mun tas vai nyak a ilpu atimi edemda vai nyak; era mun tas jipe ara sji igki, era atpaijinai nyak ara par atgei nyak,

¹¹ um ika, Et mun udei yin a Atua: ahau yin um arop iran; et idim eti eteuc tah par imiatamaig yin.

¹² Ak Atua, jim amen itac acen vai nyak aiek: ak Atua unyak, namu auroauro aiek um atau imi nyak.

¹³ Erupu ehcamai um emesmas ara sji igki, era edemda vai nyak ara; erupu lep ehcami alupas um hakli atmas ara sji igki, era merit ara nauahas nyak vaig.

¹⁴ Ja ekpu asgeig iram ainyak irai iji adiat, um lep imiahpas alupas euc.

¹⁵ Ekpu asuptecnaig nedo unyum ainyak im nimiatamaig atimi unyum an nadiat asega; ja et ehka vai nyak nesvi ehni vaig.

¹⁶ Ekpu tas va niji auritai emda u Ihova Natimarid unyak ainyak: ekpu asuptecnaig nedo atoh unyum va atimi ainyak, unyum ache.

¹⁷ Ak Atua, as mun esege imtak aiek, ahes an halav unyak: kis lep asuptecnaig niji auritai imiali unyum ainyak, um yetpam an nopan inig.

¹⁸ Ak Atua, namu jim udei nyak aiek, um yetpan an nopan iyehki, eku wit efatimi ainyak, um ahleuco; mika ki asuptecnaig nauritai unyum ainyak ehele ilpu atimi an nopan iyehki, im nemda unyum ehele ilpu atimi an taka opan.

¹⁹ Ak Atua, et ijinies acen nedo atoh unyum va atimi, na mun ago niji itai ehka aien: ak Atua, et idivai euc a di!

²⁰ Na mun atijai irak nohocred et ahinag um esjilid, ja napu lep adumoij aiek um imiatumumoh nyak aiek, napu lep adumoij aiek um imiatidai nyak va niji uarin ubo an nobohtan.

²¹ Napu lep ago niji itai ehka vai nyak aiek, napu lep ahidaig euc aiek, um ago eropse inliinmopok ainyak.

²² Ak Atua unyak, ekpu lep imiahpas euc ainyak irai saltare va nedo inveijec unyum: ak Atua upene ache u nup Isreel, ekpu acesaces nohranitai vai euc ainyak irai harp.

²³ Etpu imiacitak alupas nipjineucsek ainyak, eku wit acesaces nohranitai vai euc ainyak; im lep inliinmopok, as imiatamaig nyak aiek.

²⁴ Ekpu lep tas ainyak va nedo atoh unyum va atimi an nadiat asega: vaig inig nikavaig, era idim imtitaig um ehcamai ara sji igki era merit ara nauahas nyak vaig.