Saam 69 - Intas Etipup

SAAM 69.

1 Et asan ehti a Tevit va nohocred o un. 13 Et ugyi Atua aien mika yi imiatamaig yin aien. 22 Et ika aien uhpu auahas ilpu atimi tak atimi iran. 30 Et imiahpas Atua aien, um naaurinig iran.

¹ AK Atua, namu imiatamaig nyak aiek; nikavaig, et mun idim yetpam inwai au liinmopok.

² Ek ete an nosal ubo ainyak, et ti tah nuarin naiji vaig iran: ek mun yetpam ainyak an wai ubo, et lep ataluopni nyak inwai alupas.

³ Ek auatialidi ainyak van taig unyak: et ti nohrak ainyak: et apat nesganimtak ainyak an naitgaig Atua unyak.

⁴ Era ahinag um idivaig umri idjinik ara sji igki, era ispara amcel vai nyak ara: era emda ara sji igki, era merit ara nauhas nyak vaig, era lep edemda vai nyak ara um efaifa; eris idim ika ara, ki lep asjapigmoig nitai iji igki ainyak, kis eti atoraliak ainyak.

⁵ Ak Atua, na ato nedo ahnag unyak aiek; er eti lep adenaig nedo has unyak vai euc.

⁶ Ak Natimarid Ihova esjilid acen, erumu jim ehcamai vai nyak ara sji igki era aitgai euc ara: ak Atua u nup Isreel, erumu jim ehcamai vai nyak ara sji igki era ahilek euc ara.

⁷ Er idim auoh ohocred nyak vai euc; et ehcamai alupas nesganimtak ainyak.

⁸ Ek up uran taka uarin ainyak vai ilpu etwak, im tak atimi vai ilpu hal u risik.

⁹ Ek idim mas ainyak va naktaktai unyak va neom unyum; et mun lep yetpam irak intas has ura eris asan tas has vai euc ara.

¹⁰ Kis wat auatiatidi ainyak van taig unyak im natwakam, eris lep imiafakahcil nyak vaig ara.

¹¹ Kis aso nyak ainyak an napelumai uucai; eris lep asan tas auyat vai nyak ara par imilaav nyak.

¹² Era asan tas has vai nyak ara sji igki, era ateuc ara an neucse nathatahau; eris lep atni neuhni irak a ilpu atimi umnyi kava.

¹³ Ja ek ago nalaigaheni vai euc ainyak, ak Ihova; etmu eteuc nopan upene: ak Atua, namu atahaijeg intas unyak aiek an naiheuc esjilid unyum, va nedo inveijec unyum par imiatamaig atimi.

¹⁴ Namu atipagki nyak an nosal aiek, vai ki jim ete ainyak: namu imiatamaig nyak aiek vai ilpu atimi amcel vai nyak, im lep vai inwai ubo.

¹⁵ Etu wit ahgarero inwai, etmu jim ataluopni nyak, etmu jim lep atleg nyak inwai ubo, uhmu jim atapnes neucsen nehpanitai irak.

¹⁶ Ak Ihova, namu atahaijeg intas unyak aiek; et idim esjilid naiheuc unyum: namu ahidaig pam euc ehelek aiek, et idivaig naiheuc upene unyum et ahinag.

¹⁷ Namu jim adenaig nesganimtam aiek vai naheca unyum; ek idim ohocred ainyak; namu auroauro aiek um atahaijeg intas unvak.

¹⁸ Namu apam ubutpotet ehelek aiek, um imiatumumoh nyak: namu imiatamaig nyak aiek vai ilpu atimi edemda vai nyak.

¹⁹ Na ato intas atuh nyak aiek, im nehcamai unvak, im nihkin natimi unyak: na idim ato upene aiek ilpu atimi edemda vai nyak asega.

²⁰ Et ohocred inliinmopok ainyak vai intas atuh nyak ura; ek lep auatialdi acen ainyak: kis aitgaig ilpu atimi ago eropse nyak ainyak, ja is ti tah; im ilpu atimi ago emda inliinmopok, jam eti ecet tah.

²¹ Eris lep alaak nitai acen incak; kis wat ahvig wai ainyak, eris alupai nyak vinecar lumak.

²² Etmu itai apro ra nitai caig ura: etmu lep itai alcei ra sji igki era eti aktaktai ara nitai hegaig ura.

²³ Etmu apat nesganimtara, va eri jim alum itai ara; etmu lep eucjeucjeucaij niji eduora, um eti atumop.

²⁴ Namu atladwi intavaitap unyum ira ra aiek; etmu lep uhum ra nedemda esjilid unyum.

²⁵ Etmu ahyuahyu nuarin amen iran ura; etmu jim amen tah irai iji imnim ura.

²⁶ Vaig inig nikavaig, era atmas vai ra sji igki ara, na mun ubli ra aiek: era lep tas ara um auoh ohocred ra sji igki, na mun ikni macop ira ra aiek.

²⁷ Etmu esjilid acen neruvaig nedo has ura; erumu jim leh nedo atoh unyum va atimi ara.

²⁸ Uhmu ohpodohpod nidara an nitaasviitai vai ilpu atimi umumoh, um jim aged nidara tup ethi ache pan nai ilpu atimi upene.

²⁹ Ek ihkin natimi ainyak um ohocred: namu imiatamig nyak aiek, ak Atua, um atijai nyak an nuarin ijinies.

³⁰ Ekpu imiahpas nidai Atua ainyak an nohranitai; ekpu asan tas ecen vai yin ainyak um naaurinig vai yin.

³¹ Etpu upene nedo inig an nuhup u Ihova, irai kurimatau atamaig alupas ka haklin, et eteuc nipat o un im lep nupseduon.

³² Era mun almoi a ilpu atimi upoupo inliinmopora; erupu imiacitak ara: etpu lep umoh inliinmopomia aijaua, ak ilpu atimi ahilek Atua.

³³ Et atahaijeg intas o ilpu ihki atimi a Ihova, um eti amcel vai ra sji igki er arore ra vai yin.

³⁴ Etmu imiahpas yin nohatag im nobohtan, im injap, im niji itai asega amen iran.

³⁵ Etpu idim imiatamaig nup u Saion a Atua, um uctaig niji maliyum u nup u Juta: erupu amen nan ara, um ohuun.

³⁶ Erupu lep ohuun a ilpu mapoi ilpu aheca o un: erupu lep amen iran ara et aiyu inliinmopora ara vai nidan.