Saam 66 - Intas Etipup

SAAM 66.

1 Et ahugni atimi a Tevit mika eri imiahpas Atua ara, 5 um almuktit niji auritai alupas o un, 8 um ago naaurinig va nedo aiheuc o un, 12 Et tas etipup aien mika yi ahlap irai itai ahlap aien, um alaigaheni vai Atua. 16 kit asuptecnaig nedo upene esjilid u Atua vai yin aien.

¹ AKUMU ahlaig ijines vai Atua aijaua, ak nup uran nobohtan asega:

² akumu acesaces nohranitai aijaua va nidan et esjilid; ago nedo ecen vai yin, um imiahpas yin.

³ Akumu ika ehele Atua aijaua, Er imtitaig alupas nauritai unyum! erupu imiahpas euc jam ahcil a ilpu atimi tak atimi iram va nemda unyum.

⁴ Erupu atpuse an nuhup unyum a nup uran nobohtan asega, um acesaces nohranitai vai euc; erupu acesaces nohranitai ara va nidam. Sila.

⁵ Apam aijaua, um almoi niji auritai u Atua; er imtitaig nedo o un et ago aien va atimi.

⁶ Is ika aien yi ame injap: eris atga algaunyi nofowai ara; intis imiacitak eahki akaija vai yin.

⁷ Et atimarid aieu va nemda o un irai iji mesese; et almuktit nup urai iji pece aien an nesganimtan; etmu jim ijinies inliinmopoi ilpu atimi imipalea. Sila.

⁸ Ak nup urai pece, akumu ago naaurinig vai Atua uja aijaua, akumu imiahpas yin aijaua mika eri ahgei nohramia natimi:

⁹ et atapnes inmas vai caija aien, um ika yi jim epihtau nedueija.

¹⁰ Ak Atua, na mun ago adicinadicin cama aiek: na mun ago upene cama aiek, et idivaig er ago upene silver.

¹¹ Na mun imiapam cama aiek anliin nopoig; na mun atijai nohocred aiek an cehema.

¹² Na mun ika aiek eri atga ijinies irama a ilpu atimi ateuc irai hors; ecris atga an cap aijama im lep an wai: ja par imiapam cama aiek an nuarin amen upene.

¹³ Ekpu apan ainyak anliin neom unyum, um apos niji itai ahlap atnamud: ekpu ehneijid intas upyi asaig iji ehki unyak ehelum ainyak;

¹⁴ is ahes an nipjineucsek, kis lep asaig ainyak an nopan iyehki, kis wat ohocred ainyak.

¹⁵ Ekpu ahlap vai euc ainyak irai iji itai ahlap atnamud irai siip upene, im lep nagako irai siip atamaig; ekpu ahlap ainyak irai kurimatau im lep nanin atamaig. Sila.

¹⁶ Ak ilpu atimi imtitai Atua asega, apam aijaua um atahaijeg, ekpu asuptecnaig nitai iji igki ainyak is ago vai nyak aien.

¹⁷ Kis ahlaig vai yin ainyak an nipjineucsek, lus lep imiahpas alupas yin ainyak an nohrak.

¹⁸ El ek apos tah nedo has an liinmopok ainyak, inyi eti atahaijeg intas unyak a Natimarid:

¹⁹ ja is idim atahaijeg intas unyak a Atua: is adai intas alaigaheni unyak aien.

²⁰ Naaurinig vai Atua, is eti atipagki nalaigaheni unyak aien, im naiheuc o un vai nyak.